ធនាគារពិភពលោក (World Bank) នៅទី១៧ ខែកក្កដានេះ បានអនុម័តផ្តល់ឥណទាន ១០០លានដុល្លារសម្រាប់ជួយគាំទ្រគម្រោងកែលម្អបណ្តាញផ្លូវគមនាគមន៍នៅប្រទេសកម្ពុជា។
សេចក្ដីប្រកាសព័ត៌មានរបស់ធនាគារពិភពលោកដែលចេញនៅថ្ងៃនេះ បញ្ជាក់ថា គម្រោងនេះនឹងពង្រីកលទ្ធភាពសម្រាប់សហគមន៍ជនបទឱ្យទទួលបានសេវាចាំបាច់នានា ដូចជា មណ្ឌលសុខភាព មន្ទីរពេទ្យបង្អែក សាលារៀន និងទីផ្សារ តាមរយៈការកែលម្អផ្លូវជនបទឱ្យកាន់តែមានភាពធន់ទៅនឹងកត្តាប្រែប្រួលអាកាសធាតុ។
ធនាគារពិភពលោកកត់សម្គាល់ថា ការកែលម្អផ្លូវនេះនឹងជួយកាត់បន្ថយថ្លៃចំណាយលើការដឹកជញ្ជូន និងហានិភ័យគ្រោះថ្នាក់ដោយសារតែផ្លូវខូច និងជួយសម្រួលដល់ខ្សែចង្វាក់ផ្គត់ផ្គង់ក្នុងវិស័យកសិកម្ម និងការអភិវឌ្ឍវិស័យទេសចរណ៍។
ប្រធានគ្រប់គ្រងនៃធនាគារពិភពលោកប្រចាំកម្ពុជាលើកឡើងក្នុងសេចក្ដីប្រកាសព័ត៌មានដដែលថា៖ «កង្វះលទ្ធភាពសម្រាប់ទទួលបានសេវាមន្ទីរពេទ្យ សាលារៀន និងសម្រាប់ដឹកទំនិញទៅកាន់ទីផ្សារ ជាពិសេសក្នុងរដូវវស្សា នៅតែចោទជាបញ្ហាប្រឈមធំមួយសម្រាប់ប្រជាជនកម្ពុជានៅតាមតំបន់ជនបទ។ គម្រោងថ្មីនេះគឺជាការបន្តការប្តេជ្ញាចិត្តរបស់យើងក្នុងការជួយដល់ការអភិវឌ្ឍហេដ្ឋារចនាសម្ព័ន្ធផ្លូវរបស់កម្ពុជា។ វានឹងរួមចំណែកធ្វើឱ្យសេដ្ឋកិច្ចងើបឡើងវិញទៀតផង។»
ប្រភពដដែលបញ្ជាក់ថា គម្រោងនេះត្រូវអនុវត្តដោយក្រសួងសាធារណការ និងដឹកជញ្ជូន និងក្រសួងអភិវឌ្ឍន៍ជនបទ។
ធនាគារពិភពលោកលើកឡើងបន្តថា ការជ្រើសរើសផ្លូវសម្រាប់ការវិនិយោគនៃគម្រោងនេះផ្តល់អាទិភាពដល់ផ្លូវទាំងឡាយណាដែលតភ្ជាប់ផ្ទះអ្នកស្រុកជាមួយមន្ទីរពេទ្យ សាលារៀន និងទីផ្សារ។ តំបន់គោលដៅរបស់គម្រោងនេះមាន ផ្លូវនៅក្នុងខេត្តកំពង់ចាម ត្បូងឃ្មុំ និងក្រចេះ ដែលគ្របដណ្តប់លើប្រជាជនជាង២លាននាក់ ក្នុងនោះ៨០ភាគរយរស់នៅតាមទីជនបទដាច់ស្រយាល។
អភិបាលស្រុកកោះសូទិន ខេត្តកំពង់ចាម លោក យី វណ្ណៈ មានប្រសាសន៍ថា ផ្លូវលំជនបទយ៉ាងតិចចំនួន៣ខ្សែក្នុងឃុំចំនួន៣ ក្នុងស្រុកកោះសូទិន ត្រូវបានរងការខូចខាតដោយសារគ្រោះទឹកជំនន់កាលពីឆ្នាំ២០១៩។ លោកថា អាជ្ញាធរកំពុងជួសជុល និងស្តារផ្លូវទាំងនោះ។ លោកបញ្ជាក់ថា ជំនួយស្ដារប្រព័ន្ធគមនាគមន៍មានសារសំខាន់ណាស់ចំពោះជីវភាពរបស់ប្រជាពលរដ្ឋ។
លោក យី វណ្ណៈ មានប្រសាសន៍ថា៖ «ស្រុកកោះសូទិនខ្ញុំនេះ លិចទឹកធ្ងន់ជាងគេក្នុងចំណោម១០ក្រុងស្រុកក្នុងខេត្តកំពង់ចាម។ យើងខ្ញុំចង់បានជំនួយពីថ្នាក់ជាតិ ឬដៃគូអភិវឌ្ឍន៍ ដើម្បីស្តារផ្លូវបេតុងឬកៅស៊ូដែលមានកម្ពស់ផុតពីទឹក ទើបឱ្យពលរដ្ឋងាយស្រួលធ្វើដំណើរ ពិសេសពេលខែវស្សា ដែលអាចឱ្យអ្នកជំងឺអាចមកពេទ្យឬហៅឡានពេទ្យអីហ្នឹងទាន់ស្ថានភាពជំងឺ»។
ការសិក្សារបស់ធនាគារពិភពលោកបង្ហាញថា ផ្លូវជនបទនៅកម្ពុជាមានជាង៧៥ភាគរយនៃបណ្តាញផ្លូវសរុបទូទាំងប្រទេស ប៉ុន្តែមានតែ៥ភាគរយប៉ុណ្ណោះដែលជាផ្លូវក្រាលកៅស៊ូ។ ភ្លៀងខ្លាំង និងទឹកជំនន់ធំៗបង្កហានិភ័យខូចខាតកាន់តែខ្លាំងដល់ប្រព័ន្ធផ្លូវនៅជនបទ។
ប្រធានមជ្ឈមណ្ឌលប្រជាពលរដ្ឋដើម្បីអភិវឌ្ឍន៍ និងសន្តិភាព លោក យង់ គីមអេង មានប្រសាសន៍ថា ភាគីម្ចាស់កម្ចី (World Bank ) និងស្ថាប័នពាក់ព័ន្ធចាំបាច់ត្រូវតាមដាន និងត្រួតពិនិត្យលើការអនុវត្តគម្រោងឱ្យបានហ្មត់ចត់ជាងគម្រោងមុនៗ ទើបអាចធានាគុណភាពផ្លូវជាប់បានយូរអង្វែង។
លោក យង់ គីមអេង លើកឡើងថា៖ «គុណភាពផ្លូវលំជនបទនេះជាការប្រឈមមួយដែរ កន្លងមកការធ្វើរួចហ្នឹងមិនសូវជាប់បានយូរទេ។ ខ្ញុំថាសំខាន់បំផុតចាំបាច់ត្រូវរៀបចំយ៉ាងម៉េច ពិនិត្យគុណភាពយ៉ាងម៉េច ស្ដង់ដារយ៉ាងម៉េច? បើមិនអ៊ីចឹងទេ យើងនៅតែចាយលុយជាតិដដែលៗ នៅតែមានបញ្ហាចំពោះគុណភាពផ្លូវ។ ម្យ៉ាងទៀតគួរតែមានការចូលរួមមតិយោបល់ពីប្រជាពលរដ្ឋដែលជាអ្នកឃ្លាំមើល និងរស់នៅទីតាំងអនុវត្តន៍គម្រោង»។
របាយការណ៍របស់ក្រសួងសេដ្ឋកិច្ចបង្ហាញថា កម្ពុជាបានជំពាក់បំណុលធនាគារពិភពលោកចំនួនជាង១ពាន់៣រយលានដុល្លារ ឬស្មើនឹងជាង១០%នៃបំណុលសរុបដែលកម្ពុជាជំពាក់បរទេស។ គិតត្រឹមដំណាច់ឆ្នាំ២០១៩ កម្ពុជាជំពាក់បំណុលបរទេសសរុបជាង១២ពាន់លានដុល្លារសហរដ្ឋអាមេរិក៕