ក្រសួងមហាផ្ទៃសម្រេចអនុញ្ញាតឲ្យបង្កើតគណបក្សនយោបាយថ្មីមួយឈ្មោះ គណបក្សប្រយោជន៍ខ្មែរ តាមការស្នើសុំរបស់តំណាងស្ថាបនិកនៃគណបក្សនេះ។
ក្នុងលិខិតមួយរបស់ក្រសួងមហាផ្ទៃចុះផ្សាយកាលពីថ្ងៃទី១៧ ខែកក្កដា ម្សិលមិញថា ក្រសួងសម្រេចអនុញ្ញាតឲ្យបង្កើតគណបក្សប្រយោជន៍ខ្មែរ ហៅកាត់ថា គ.ប.ខ តាមការស្នើសុំរបស់តំណាងស្ថាបនិកគណបក្សឈ្មោះ លោក សុខ គឹមរស្មី កាលពីថ្ងៃទី៤ ខែមិថុនា ឆ្នាំ២០២០ ដែលស្នាក់ការកណ្តាលបក្សនេះមានទីតាំងនៅផ្ទះ 69Eo មហាវិថីសម្តេចសុធារស ភូមិ៥ សង្កាត់ទន្លេបាសាក់ ខណ្ឌចំការមន រាជធានីភ្នំពេញ។
ក្រសួងមហាផ្ទៃបញ្ជាក់ថា ដើម្បីទទួលបានសុពលភាព និងអាចធ្វើសកម្មភាពស្របតាមច្បាប់ស្តីពីគណបក្សនយោបាយ គឺគណបក្សប្រយោជន៍ខ្មែរ ត្រូវសុំចុះបញ្ជីនៅក្រសួងមហាផ្ទៃស្របតាមវាក្យខណ្ឌទី២ មាត្រា៩ មាត្រា១៨ មាត្រា១៩ថ្មី និងមាត្រា២០ នៃច្បាប់ស្តីពី គណបក្សនយោបាយ។
យោងតាមសេចក្ដីប្រកាសព័ត៌មានរបស់ក្រសួងមហាផ្ទៃកាលពីឆ្នាំ២០១៨ ឲ្យដឹងថា គណបក្សនយោបាយដែលបានចុះបញ្ជីនៅក្នុងក្រសួងមហាផ្ទៃចំនួន ៤១ គណបក្ស៕