អភិបាលខេត្តកំពង់ស្ពឺ លោក វ៉ី សំណាង អះអាងថា រដ្ឋបាលខេត្តនេះបានដកហូតដីទំហំជាង ៤,០០០ហិកតា ដើម្បីយកមករក្សាទុកជាសម្បត្តិរដ្ឋវិញ ក្រោយពីរកឃើញថា ដីនោះត្រូវបានជនខិលខូចទន្ទ្រានយកធ្វើជាកម្មសិទ្ធិ។
ក្នុងសន្និសីទសារព័ត៌មានស្ដីពី «វឌ្ឍនភាពនិងទិសដៅការងារបន្ដរបស់រដ្ឋបាលខេត្តកំពង់ស្ពឺ» នៅថ្ងៃនេះ អភិបាលខេត្តកំពង់ស្ពឺ លោក វ៉ី សំណាង លើកឡើងថា ចាប់ពីឆ្នាំ២០១៩ ដល់ឆ្នាំ២០២០ អាជ្ញាធរខេត្តបានដកហូតដីទំហំ ៤,៤៣៣ហិកតាពីជនខិលខូចដែលបានកាប់ទន្ទា្រនដីព្រៃរបស់រដ្ឋយកមកធ្វើជាកម្មសិទ្ធិផ្ទាល់ខ្លួន។
លោកបន្តថា ដីធ្លីដែលត្រូវបានអាជ្ញាធរដកហូតមាននៅស្រុកឱរ៉ាល់ចំនួន ៦កន្លែង ដែលមានទំហំដី ២,៧៣២ហិកតា និងនៅតំបន់ឧទ្យានជាតិព្រះសុរាម្រិត «គីរីរម្យ» ស្រុកភ្នំស្រួច មានចំនួន ១,៧០១ហិកតា។
លោក សំណាង បានប្រាប់វីអូឌីបន្ថែមថា បច្ចុប្បន្ននេះ គ្មានបុគ្គលណាម្នាក់ត្រូវបានចាប់ខ្លួនពាក់ព័ន្ធនឹងបទល្មើសរំលោភយកដីធ្លីសាធារណៈរបស់រដ្ឋនៅឡើយទេ ប៉ុន្តែ លោកថា អាជ្ញាធរកំពុងស្វែងរកជនខិលខូច ឬអ្នកពាក់ព័ន្ធផ្សេងទៀតដើម្បីចាត់ការតាមនីតិវិធីច្បាប់។
លោក វ៉ី សំណាង ថ្លែងថា៖ «ដូចខ្ញុំបានបញ្ជាក់អ៊ីចឹង យើងខិតខំស្រាវជ្រាវរកជនពាក់ព័ន្ធ ប៉ុន្តែ រកមិនទាន់ឃើញ ហើយបើឃើញ យើងបញ្ជូនទៅតុលាការអនុវត្តច្បាប់»។
មន្ត្រីសម្របសម្រួលសមាគមការពារសិទ្ធិមនុស្សអាដហុកប្រចាំខេត្តកំពង់ស្ពឺ លោក រ័ត្ន ថាវី ជំរុញឱ្យអាជ្ញាធរចាត់វិធានការចំពោះអ្នកដែលបានទន្ទា្រនដីរដ្ឋឱ្យមានតម្លាភាព។
លោក រ័ត្ន ថាវី ប្រាប់ថា៖ «ប្រជាពលរដ្ឋធម្មតា គាត់មិនហ៊ានទេ ទៅចាប់ ឬទៅទន្ទ្រានយកដីសាធារណៈរបស់រដ្ឋធ្វើជាកម្មសិទ្ធិហ្នឹង វាមានតែអ្នកមានអំណាចទេដែលគាត់ហ៊ាននោះ។ បើតាមច្បាប់ អ្នកទន្រ្ទានយកដីសាធារណៈរដ្ឋ អ្នកដែលចាប់យក ត្រូវទទួលទោសតាមច្បាប់ ដើម្បីព្រមានទៅដល់អ្នកផ្សេងទៀតកុំឱ្យប្រព្រឹត្តអំពើហ្នឹង»។
វីអូឌីបានស្វែងរកការបកស្រាយពីអ្នកនាំពាក្យក្រសួងបរិស្ថាន លោក នេត្រ ភក្ត្រា ជុំវិញករណីនេះ ប៉ុន្តែ លោកមិនបានឆ្លើយតបនោះឡើយនៅថ្ងៃនេះ៕
