តំណាងអង្គការការពារសត្វព្រៃមួយបានបញ្ជាក់ថា តុលាការប៉ាគីស្ថានបានសម្រេចបញ្ជូនដំរីដែលមានសម្ពាធផ្លូវចិត្តមករស់នៅក្នុងដែនជម្រកសត្វព្រៃក្នុងប្រទេសកម្ពុជាវិញ។
តំណាងអង្គការអភិរក្សសត្វព្រៃកម្ពុជា (Cambodia Wildlife Sanctuary) លោក ផេដ្រូ វីលឡា (Pedro Villa) បានប្រាប់វីអូឌីថា កាលពីថ្ងៃទី១៨ ខែកក្កដា តុលាការក្រុងអ៊ីស្លាមាបាដ នៃប្រទេសប៉ាគីស្ថាន បានសម្រេចបញ្ជូនដំរីឈ្មោះកាវ៉ាន់ (Kaavan) មកកាន់ប្រទេសកម្ពុជា។ តាមមន្រ្តីអង្គការមួយនេះ កាវ៉ាន់អាចនឹងមកដល់កម្ពុជានៅអំឡុងខែកញ្ញាខាងមុខ។
លោក ផេដ្រូ វីលឡា (Pedro Villa) បានប្រាប់វីអូឌីឱ្យដឹងថា ប្រទេសប៉ាគីស្ថានបានសម្រេចចិត្តបញ្ជូនកាវ៉ាន់មកប្រទេសកម្ពុជានៅក្នុងតំបន់ដែនជម្រកសត្វព្រៃគូលែនព្រហ្មទេព ដែលមានទំហំដីសរុបចំនួន៤៣៦១ហិកតា ស្ថិតនៅចន្លោះស្រុកត្រពាំងប្រាសាទនិងស្រុកអន្លង់វែង។
លោកបានប្រាប់បន្ថែមថា៖ «ហេតុផលដែលអង្គការអភិរក្សសត្វព្រៃកម្ពុជាត្រូវបានជ្រើសរើសក្នុងការថែទាំដំរីមួយនេះ ដោយហេតុថា អង្គការរបស់ពួកយើងសម្បូរទៅដោយអ្នកជំនាញផ្នែកថែទាំដំរីពីទូទាំងពិភពលោក ដូចជា អ្នកស្រី Saengduean Lek Chailert ដែលជាស្ថាបនិក នៃគម្រោងជួយសង្គ្រោះសត្វដំរី ដែលបានជួយសង្គ្រោះដំរីប្រមាណជា ១០០ក្បាលមកហើយ ហើយម្យ៉ាងវិញទៀត[ដែនជម្រកសត្វព្រៃ]របស់យើងមានផ្ទៃដីប្រមាណជា២៥០០០អា ដែលមានកន្លែងជាច្រើនសម្រាប់ដំរីកាវ៉ាន់ [Kaavan] ហើយម្យ៉ាងវិញទៀតអង្គការរបស់ពួកយើងគឺជាផ្នែកមួយនៃមូលនិធិសង្គ្រោះដំរី»។
យោងតាមការចុះផ្សាយរបស់សារព័ត៌មាន The News របស់ប្រទេសប៉ាគីស្ថានដែលបានចេញកាលពីថ្ងៃទី១៩ ខែកក្កដា ឆ្នាំ២០២០ បានឱ្យដឹងថា កាវ៉ាន់ត្រូវបានគេដាក់ច្រវាក់ក្នុងទីតាំងដែលមានលក្ខណៈតូចចង្អៀតដែលមានទំហំត្រឹមតែ៨២អា ស្ថិតក្នុងសួនសត្វអ៊ីស្លាមាបាដ(Islamabad Zoo)។
ប្រភពដដែលឱ្យដឹងថា មន្រ្តីជំនាញបានរកឃើញថា កាវ៉ាន់មានវិបត្តិផ្តូវចិត្តធ្ងន់ធ្ងរក្រោយពីបាត់បង់ដៃគូរបស់ខ្លួនកាលពីឆ្នាំ២០១២។ កាវ៉ាន់ត្រូវបានប្រទេសស្រីលង្កាផ្តល់ជាអំណោយដល់ប្រទេសប៉ាគីស្ថានកាលពីឆ្នាំ១៩៨៥ នៅពេលដែលវាមានអាយុ១ឆ្នាំ។
បន្ទាប់ពីទទួលបានព័ត៌មាននេះ តារាចម្រៀងជនជាតិអាមេរិក លោកស្រី Cherilyn Sarkisian ដែលត្រូវបានស្គាល់ក្នុងពិភពសិល្បៈថា Cher បានបង្កើតយុទ្ធនាការអនឡាញអំពាវនាវឱ្យផ្តល់សេរីភាពព្រមទាំងផ្តល់ការព្យាបាលដល់ដំរីនោះ។ ប្រទេសប៉ាគីស្ថានក៏បានចាប់ផ្ដើមដាក់កាវ៉ាន់ស្ថិតក្នុងការដេញថ្លៃដោយគិតទៅលើលក្ខខណ្ឌទីតាំងជម្រកល្អសម្រាប់ដំរីមួយក្បាលនេះ។
ប្រភពពីសារព័ត៌មានប៉ាគីស្ថានដដែលឱ្យដឹងថា ប្រជាជនទូទាំងពិភពលោកប្រមាណជា៤សែននាក់បានសម្រេចចិត្តដាក់ញត្តិដោយការចុះហត្ថលេខាតាមរយៈប្រព័ន្ធអនឡាញដែលបង្កើតដោយតារាចម្រៀងអាមេរិករូបនេះ។ អ្នកចម្រៀងនិងជាសកម្មជនលើកកម្ពស់សិទ្ធសត្វ ជនជាតិអាមេរិករូបនេះ បានបង្ហាញក្ដីសាទរនៅពេលបានដឹងថា កាវ៉ាន់ត្រូវបានផ្តល់សេរីភាពឡើងវិញ។
លោកស្រីបានសរសេរនៅលើ Twitter ផ្លូវការរបស់ខ្លួននៅថ្ងៃនេះ៖ «វាជារឿងដែលអស្ចារ្យបំផុតក្នុងជីវិតខ្ញុំ ខ្ញុំសូមអគុណដល់រដ្ឋាភិបាលប៉ាគីស្ថានដែលបានដោះលែងកាវ៉ាន់ឱ្យមានសេរីភាព»។
តាមការចុះផ្សាយរបស់សារព័ត៌មាន The News កាលពីថ្ងៃសៅរ៍ ទី១៨ ខែកក្កដា ឆ្នាំ២០២០កន្លងទៅនេះ តុលាការជាន់ខ្ពស់របស់ទីក្រុងអ៊ីស្លាមាបាដ នៃប្រទេសប៉ាគីស្ថាន សម្រេចចិត្តផ្លាស់ប្ដូរទីដែនជម្រករបស់សត្វដំរីកាវ៉ាន់ ក្រោយពីបានរកឃើញថា ដំរីនេះទទួលរងនូវសម្ពាធផ្លូវចិត្ត ម៉្យាងវិញទៀតជម្រករបស់សត្វដំរីមានលក្ខណៈតូចចង្អៀតនិងក្តៅខ្លាំងនៅរដូវក្តៅ។
បើតាមលោក ផេដ្រូ វីលឡា អ្នកដែលត្រូវទៅទទួលដំរីនេះពីប្រទេសប៉ាគីស្ថាន ប្រហែលជាអ្នកស្រី សែងឌឿន ឡែក ឆាឡើត (Saengduean Lek Chailert) ដែលជាស្ថាបនិកនៃគម្រោងជួយសង្គ្រោះសត្វដំរី ឬក៏ស្វាមីរបស់គាត់ លោក ដារីក (Darrick) ព្រមទាំងក្រុមគ្រូពេទ្យដែលថែរក្សាដំរីមួយចំនួនទៀតនៃអង្គការដែនជម្រកសត្វព្រៃនៃកម្ពុជា។
លោក ផេដ្រូ វីលឡា បានបន្ថែមថា៖ «ដំរីកាវ៉ាន់ពិតជាមាននូវជំងឺផ្លូវអារម្មណ៍ដូចជាដំរីមួយចំនួនដែលយើងធ្លាប់បានជួបពីមុនមក អង្គការដែនជម្រកសត្វព្រៃនៃកម្ពុជានឹងអនុញ្ញាតឱ្យដំរីមួយនេះមានសេរីភាព ហើយអាចឱ្យគាត់បានជួបនូវដំរីបីក្បាលផ្សេងទៀតនៅក្នុងទីជម្រកព្រៃស្បោងដ៏ធំដែលជាផ្ទះថ្មីរបស់គាត់»។
លោកសង្ឃឹមថា កាវ៉ាន់នឹងរីករាយជាមួយនឹងបរិយាកាសនៅដែនជម្រកសត្វព្រៃគូលែនព្រហ្មទេព ហើយលោកជឿជាក់ថា ធម្មជាតិទាំងនោះគឺជាឱសថព្យាបាលដ៏ល្អបំផុត។
តាមលោក ផេដ្រូ វីលឡា កាវ៉ាន់ដែលជាដំរីឈ្មោលវ័យ៣៦ឆ្នាំនេះនឹងត្រូវរស់នៅជាមួយដំរីចំនួន៣ក្បាលផ្សេងទៀតដែលកំពុងមានវត្តមាននៅក្នុងដែនជម្រកនោះ។
គួរបញ្ជាក់ផងដែរថា ស្ថាប័នព័ត៌មានវីអូឌីក៏បានធ្វើការទាក់ទងទៅលោក នេត្រ ភក្រ្តា ដើម្បីសុំការបញ្ជាក់បន្ថែមជុំវិញការបញ្ជូនសត្វដំរីនេះ ប៉ុន្តែយើងមិនទទួលបានការឆ្លើយតបពីលោកទេ គិតត្រឹមព្រឹកថ្ងៃពុធនេះ។
វីអូឌីមិនអាចទាក់ទងសុំការអត្ថាធិប្បាយបន្ថែមពីអ្នកនាំពាក្យក្រសួងបរិស្ថាន លោក នេត្រ ភក្រា បានទេគិតត្រឹមរសៀលថ្ងៃពុធនេះ៕
