ក្រសួងសុខាភិបាលនៅព្រឹកនេះបានប្រកាសពីការរកឃើញអ្នកឆ្លងកូវីដ១៩ចំនួន១ករណីថ្មីទៀតដែលជាករណីនាំចូលមកពីក្រៅប្រទេស។
តាមសេចក្តីជូនព័ត៌មានរបស់ក្រសួងសុខាភិបាលចេញនៅថ្ងៃនេះ ករណីថ្មីនេះត្រូវបានរកឃើញលើបុរសជនជាតិខ្មែរម្នាក់ដែលបានធ្វើដំណើរមកពីប្រទេសរុស្សីតាមជើងហោះហើររបស់ប្រទេសម៉ាឡេស៊ី។ បច្ចុប្បន្នគាត់កំពុងសម្រាកព្យាបាលនៅមណ្ឌលសុខភាពចាក់អង្រែ រាជធានីភ្នំពេញ។
ដោយឡែក ក្រសួងក៏បានប្រកាសផងដែរថា អ្នកជំងឺចំនួន២នាក់ត្រូវបានព្យាបាលជាសះស្បើយ ដោយទទួលបានលទ្ធផលតេស្តអវិជ្ជមានវីរុសកូវីដ១៩ ចំនួន២ដង និងត្រូវបានអនុញ្ញាតឱ្យចេញពីមន្ទីរពេទ្យ។
តាមក្រសួងសុខាភិបាល គិតត្រឹមថ្ងៃទី២៣ ខែកក្កដា ឆ្នាំ២០២០នេះ កម្ពុជាមានអ្នកឆ្លងសរុបចំនួន១៩៨នាក់ ក្នុងនោះអ្នកជាសះស្បើយសរុបចំនួន១៤២នាក់ និងអ្នកកំពុងសម្រាកព្យាបាលជំងឺចំនួន៥៤នាក់៕
