អាជ្ញាធរក្រុងប៉ោយប៉ែតខេត្តបន្ទាយមានជ័យឱ្យដឹងថា យ៉ាងតិចណាស់មានមនុស្ស៥៤នាក់បានឆ្លងជំងឺគ្រុនឈីកគិតត្រឹមព្រលប់ថ្ងៃទី២២ ខែកក្កដា។
ប្រភពដដែលឱ្យដឹងថា អ្នកជំងឺទាំងនោះកំពុងសម្រាកព្យាបាលនៅតាមផ្ទះនិងតាមមន្ទីរពេទ្យនៅក្រុងប៉ោយប៉ែត ខេត្តបន្ទាយមានជ័យ។
អភិបាលក្រុងប៉ោយប៉ែត លោក គាត ហ៊ុល ថ្លែងប្រាប់វីអូឌីថា កាលពីថ្ងៃទី១៩ ខែកក្កដាមនុស្ស១១នាក់ធ្លាក់ខ្លួនឈឺមកសម្រាកព្យាបាលនៅមន្ទីរពេទ្យបង្អែកក្រុងប៉ោយប៉ែត ជាហេតុធ្វើឱ្យអាជ្ញាធរសង្ស័យខ្លាចមានអ្នកឆ្លងកូវីដ១៩ ទើបចាត់វិធានការរកអ្នកឈឺផ្សេងទៀតនៅតាមផ្ទះសរុប៥៤នាក់ដើម្បីធ្វើតេស្តរកមេរោគ។ លោកបន្តថា លទ្ធផលតេស្តឈាមនិងសំណាករកឃើញថា អ្នកទាំងនោះមានផ្ទុកមេរោគគ្រុនឈីក។
លោក គាត ហ៊ុល មានប្រសាសន៍បន្ថែមថា៖ «អ្នកឈឺទាំងជាង៥០នាក់ហ្នឹងក្នុងនោះក៏មានកម្លាំងប៉ូលិស២នាក់ដែរ។ ពួកគាត់មួយចំនួនហ្នឹងធូរស្រាលគ្រាន់បើហើយ។ ករណីផ្ទុះគ្រុនឈីកធំបែបនេះយើងមិនធ្លាប់ជួបទេ លើកនេះលើកដំបូង។ អាជ្ញាធរយើងយកចិត្តទុកដាក់ណាស់ ទាំងអាជ្ញាធរខេត្តនិងក្រសួងសុខាភិបាល»។
បើតាមលោក គាត ហ៊ុល បញ្ជាក់ថា អាជ្ញាធរក្រុងនិងផ្នែកសុខាភិបាលកំពុងចាត់វិធានការបាញ់ថ្នាំសម្លាប់មូស និងចាត់វិធានការសម្អាតអនាម័យទូទាំងក្រុង ដើម្បីទប់ស្កាត់ការឆ្លងរីករាលដាលនៃជំងឺនេះ។
អ្នកនាំពាក្យក្រសួងសុខាភិបាល លោក លី សូវ៉ាន់ មានប្រសាសន៍ថា ជំងឺគ្រុនឈីកនេះមិនបណ្ដាលឱ្យមនុស្សស្លាប់នោះទេ ជំងឺនេះអាចជាសះស្បើយដោយឯកឯងដោយគ្រាន់តែផ្ដល់ថ្នាំបំបាត់គ្រុនក្ដៅធម្មតា ប៉ុន្តែអ្នកដែលសង្ស័យថាខ្លួនកើតជំងឺនេះ ត្រូវទៅមណ្ឌលសុខភាពឬមន្ទីរពេទ្យដើម្បីពិគ្រោះបន្ទាន់។ លោកបន្ថែមថា ការផ្ទុះជំងឺគ្រុនឈីកនៅប៉ោយប៉ែតនេះ គឺជាវដ្ដនៃជំងឺដែលតែងតែកើតឡើងជារឿយៗ។
លោក លី សូវ៉ាន់ ប្រាប់ថា៖ «បាទ! នៅប៉ោយប៉ែតនេះ ពួកគាត់កើតគ្រុនឈីក។ អាជំងឺហ្នឹងផ្ទុះបីឬបួនឆ្នាំម្ដង វាកើតមកពីមូសជាភ្នាក់ងារចម្លងជំងឺ គ្រាន់តែថាលើកនេះកើតឡើងច្រើន។ ក្រសួងសុខាភិបាលយកចិត្តទុកដាក់តាមដានយ៉ាងដិតដល់ចំពោះបញ្ហានេះ»។
តាមមជ្ឈមណ្ឌលប្រយុទ្ធនឹងជំងឺឆ្លងនៃក្រសួងសុខាភិបាល ជំងឺគ្រុនឈីក (CHIK) បណ្ដាលមកពីវីរុស ឈីគុនហ្គុនយ៉ា (Chikungunya Virus = CHIKV)។ ជំងឺនេះឆ្លងតាមរយៈមូសខាំ ជំងឺនេះគ្មានថ្នាំព្យាបាលជាក់លាក់ទេ ប៉ុន្តែគ្រូពេទ្យអាចព្យាបាលអ្នកជំងឺដាក់ថ្នាំតាមរោគសញ្ញា។
ខិតបណ្ណរបស់ក្រសួងសុខាភិបាលដែលចេញផ្សាយកាលពីខែមិថុនា ឆ្នាំ២០១៦ បង្ហាញថា ជំងឺគ្រុនឈីកកើតឡើងដោយសារមូសខ្លាខាំ ធ្វើឱ្យអ្នកជំងឺគ្រុនក្តៅពី ៣៩ ទៅ ៤០អង្សាសេ។ អ្នកជំងឺមានស្នាមកន្ទួលក្រហមលើស្បែក អ្នកជំងឺអាចខ្សោះជាតិទឹកដោយសារក្អួត ឯសាច់ដុំចុះខ្សោយ ហើមប្រអប់ដៃប្រអប់ជើង ឈឺសន្លាក់ម្រាមដៃម្រាមជើង ឈឺក្បាលខ្លាំង ឈឺចង្កេះ អស់កម្លាំងខ្លាំងជាដើម។ គ្រុនឈីក អាចឱ្យអ្នកជំងឺឈឺរយៈពេលពី ៥ថ្ងៃ ទៅ ១សប្ដាហ៍ ហើយជាធូរស្បើយ។
វិធីបង្ការជំងឺគ្រុនឈីក គឺដូចវិធីបង្ការជំងឺគ្រុនឈាមដែរ គឺលុបទឹកថ្លុក កប់ចោលទឹកដក់នៅក្នុងសំបកកង់សំបកកំប៉ុង ហើយដុតកម្ទេចសំរាមសើម កាប់ស្លឹកឈើស៊ុបទ្រុបនៅក្បែរផ្ទះឱ្យស្រឡះ បោសសំរាមសម្អាតក្នុងផ្ទះ លាងសម្អាតពាង ប៉ោត ធុង ថូផ្កា ហើយត្រូវដាក់ថ្នាំអាប៊ែត និងចិញ្ចឹមត្រី៧ពណ៌ឱ្យវាស៊ីដង្កូវទឹកកុំឱ្យកើតមូស។ ចំណែកមនុស្សវិញ ទាំងចាស់ទាំងក្មេងត្រូវសម្រាកក្នុងមុង ស្លៀកពាក់ខោអាវឱ្យជិត និងកុំឱ្យកុមារទៅលេងនៅកន្លែងងងឹត ជាដើម៕