កាលពីថ្ងៃសៅរ៍នៅម៉ោងប្រហែល៤និង៣០នាទីរសៀល កូនស្រីអាយុ៨ឆ្នាំរបស់លោក ប្រាក់ ឡាំហុង បានដាស់លោកពីដំណេកថ្ងៃ ខណៈសំឡេងផ្ទុះធ្វើឱ្យកក្រើកជាន់ខាងក្រោមនៃហាងបញ្ចូលហ្គាសរបស់ក្រុមគ្រួសារលោកនៅក្នុងខណ្ឌដូនពេញ។
លោក ប្រាក់ ឡាំហុង អាយុ៧០ឆ្នាំ ភរិយានិងកូនពីរនាក់ទៀតរបស់លោកបានជាប់នៅជាន់ខាងលើ ពីព្រោះកូនប្រុសវ័យ២៧ឆ្នាំដែលកាន់សោរផ្ទះនោះកំពុងធ្វើការងារនៅជាន់ខាងក្រោម។ ភរិយារបស់លោកគឺអ្នកស្រី លី សឿង បានជួយសង្គ្រោះលោក កូនប្រុសនិងខ្លួនគាត់ដោយយកដែកមកបុកទម្លុះជញ្ជាំង ទើបពួកគាត់អាចគេចខ្លួនបាន។
ខណៈអង្គុយនៅពីមុខគំនរបាក់បែកកាលពីព្រឹកថ្ងៃច័ន្ទ លោកបានប្រាប់វីអូឌីថា៖ «ខ្ញុំមានសំណាងដែលប្រពន្ធរបស់ខ្ញុំបានទម្លុះជញ្ជាំងនិងបានសង្គ្រោះយើង។ កុំអីយើងអាចនឹងជាប់នៅខាងក្នុង[…]កូនប្រុសខ្ញុំម្នាក់ទៀតអត់មានកម្លាំងទម្លុះជញ្ជាំងទេ។ យើងបានរស់ដោយសារប្រពន្ធរបស់ខ្ញុំ»។
ប៉ុន្តែនៅពេលដែលកំពុងភ័យស្លន់ស្លោ លោក ឡាំហុង បាននិយាយថា លោកមិនអាចបីកូនស្រី ឡាំ គីមឡាង ចេញពីអណ្តាតភ្លើងបានទេ។ អ្នកជិតខាងព្យាយាមចូលជួយ ប៉ុន្តែនាងស្លាប់ចំពេលមានការផ្ទុះខ្លាំង។
បន្ទាប់ពីរួចផុតពីសេចក្តីស្លាប់ដោយសារការផ្ទុះនិងអគ្គិភ័យដែលគេមើលឃើញពីអគារផ្សេងៗទូទាំងរាជធានីភ្នំពេញ និងបណ្តាលឱ្យមនុស្ស៤នាក់ស្លាប់និង៥នាក់ផ្សេងទៀតរងរបួសនោះ លោក ឡាំហុង និងពលរដ្ឋដែលរស់នៅក្បែរហាងបញ្ចូលហ្គាសនៅផ្លូវលេខ៦៣នេះ កំពុងតែប្រឈមនឹងគំនរបាក់បែក បំណុលនិងខ្មោចដែលពួកគាត់និយាយថា មិនទាន់ទៅណាទេ ក្រោយពីមានសោកនាដកម្មកាលពីថ្ងៃសៅរ៍នេះ។
បើតាមលោក ឡាំហុង បានឱ្យដឹងថា មានមនុស្សបួននាក់ស្លាប់នៅក្នុងភ្នក់ភ្លើង ក្នុងនោះមាន កូនប្រុសរបស់លោកឈ្មោះ ឡាំ សេងហាវ អាយុ២៧ឆ្នាំ ដែលបើកហាងបញ្ចូលហ្គាសនៅខាងក្រោមផ្ទះរបស់គ្រួសារនេះ បុគ្គលិកពីរនាក់ឈ្មោះ ម៉ៅ ស៊ីណាត អាយុ២២ឆ្នាំនិង ម៉ុន មករា អាយុ១៨ឆ្នាំ និងកូនស្រី ឡាំ គីមឡាង អាយុ៨ឆ្នាំ។
សមាជិកគ្រួសារ៥នាក់ផ្សេងទៀតបានរងរបួសនៅក្នុងអគ្គិភ័យនេះមានលោក ឡាំហុង ភរិយារបស់លោកឈ្មោះ សឿង អាយុ៤៩ឆ្នាំ កូនប្រុស ឡាំ សេងតាយ អាយុ១៩ឆ្នាំ កូនស្រី ឡាំ គីមជូ អាយុ១៣ឆ្នាំ និងប្អូនស្រីឈ្មោះ ប្រាក់ សេងគា អាយុ៣២ឆ្នាំ។
លោក ឡាំហុង ដែលជាម្ចាស់ផ្ទះបាននិយាយថា លោកមិនច្បាស់ពីមូលហេតុនៃការផ្ទុះឆេះកាលពីថ្ងៃសៅរ៍នេះទេ ដោយសារលោកសម្រាន្តនៅជាន់ទី១តាំងពីម៉ោង៣រសៀល។ ទោះបីជាយ៉ាងណា លោកបានឮកូនរបស់លោកថា បុគ្គលិកម្នាក់នៅជាន់ខាងក្រោមបានឈប់សម្រាកពីការផ្សារធុងហ្គាសទៅហូបបបរនៅពេលដែលមានអគ្គិភ័យឆាបឆេះឡើង ហើយរាលដាលទៅធុងហ្គាសផ្សេងទៀតនៅក្នុងហាងនេះ។
ក្នុងសេចក្តីថ្លែងការណ៍កាលពីថ្ងៃសៅរ៍ នគរបាលជាតិបានឱ្យដឹងថា ផ្កាភ្លើងដែលកើតចេញពីការផ្សារដែកត្រូវគេជឿថាបានធ្វើឱ្យហ្គាសឆាបឆេះ។ ធុងហ្គាសរាប់សិបត្រូវបានគេជញ្ជូនចេញពីកន្លែងកើតហេតុ ខណៈការងារសង្គ្រោះបានប្រើពេលប្រហែលពីរម៉ោងដើម្បីពន្លត់អគ្គិភ័យកាលពីថ្ងៃសៅរ៍។
ខ្លាចខ្មោច
លោក ឡាំហុង បាននិយាយថា កូនប្រុសឈ្មោះ សេង តាយ អាយុ១៩ឆ្នាំ បានខ្ទាតចេញពីអគារនិងហួសទៅម្ខាងផ្លូវដោយសារកម្លាំងផ្ទុះ ហើយកំពុងសម្រាកព្យាបាលរបួសធ្ងន់ធ្ងរនៅមន្ទីរពេទ្យកាល់ម៉ែត។
បុរសម្នាក់ជាអ្នកជិតខាងអាយុ២៥ឆ្នាំ ដែលគេហៅថា តាក់ បាននិយាយថា លោកបានព្យាយាមជួយទាញ ឡាំ គីមឡាង ចេញពីអណ្តាតភ្លើង ប៉ុន្តែនាងជាប់នៅខាងក្នុងផ្ទះដែលកំពុងឆេះ ហើយលោកពិបាកដកដង្ហើមដោយសារតែហ្គាសធ្លាយនិងផ្សែង។
លោក តាក់ បានប្រាប់វីអូឌីកាលពីថ្ងៃចន្ទថា៖ «សំណាងណាស់ដែលយើងបានទម្លុះចូលផ្ទះនិងជញ្ជូនធុងហ្គាសទាំងអស់ចេញ។ បើមិនដូច្នេះទេ ផ្ទះទាំងអស់នៅក្បែរផ្ទះគាត់និងមនុស្សផ្សេងទៀតនៅទីនេះនឹងត្រូវឆេះផងដែរ»។
ហាងលក់សត្វចិញ្ចឹមនៅក្បែរហាងបញ្ចូលហ្គាសនេះ ក៏ត្រូវបានបំផ្លាញក្នុងអគ្គិភ័យនេះដែរ។ អ្នក ជិតខាងបាននិយាយថា ពួកគេមិនឃើញម្ចាស់ហាងសក់សត្វចិញ្ចឹមនេះទេចាប់តាំងពីមានករណីផ្ទុះឆេះនេះ ដោយប៉ាន់ប្រមាណថា ពួកគេប្រហែលរួចផុតពីអណ្តាតភ្លើងនេះ។
តាក់ បាននិយាយថា មានឆ្កែមួយក្បាលនៅរស់រានមានជីវិតដោយសារវាលាក់ខ្លួនក្នុងបន្ទប់ទឹក។ ទ្រុងបក្សីនិងសត្វទន្សាយដែលងាប់ដោយសារអគ្គិភ័យនេះមិនទាន់យកចេញទៅណាទេកាលពីព្រឹកថ្ងៃចន្ទ។
ស្ត្រីវ័យ២៥ឆ្នាំម្នាក់ដែលលក់សម្ភារសំណង់នៅក្បែរហាងលក់សត្វចិញ្ចឹមនិងបានបដិសេធមិនប្រាក់ឈ្មោះ បាននិយាយថា ហាងរបស់នាងត្រូវបានសង្គ្រោះដោយផ្ទាំងកម្រាលឥដ្ឋដែលបង្កើតបានជាខែលការពារអណ្តាតភ្លើងដែលកើតចេញពីការផ្ទុះឆេះនេះ។
បុរសវ័យ២៣ឆ្នាំម្នាក់ដែលសុំមិនបញ្ចេញឈ្មោះ បាននិយាយថា គ្រួសារនោះធ្លាប់បានមកមើលនៅហាងលក់បាយរបស់គាត់ផងដែរ ដែលមានទីតាំងនៅខាងក្រោយផ្ទះលក់សម្ភារសំណង់ខាងលើ។
គាត់បានប្រាប់វីអូឌីថា៖ «ខ្ញុំមិនហ៊ានទាំងដើរកាត់នៅពេលយប់ផង ពីព្រោះខ្ញុំខ្លាចខ្មោច។ ពួកគាត់ធ្លាប់ទិញភេសជ្ជៈរបស់ពួកយើងជាញឹកញាប់។ ពួកគាត់គឺជាមនុស្សរួសរាយរាក់ទាក់។ ពួកយើងមានការសោកស្ដាយសម្រាប់ការបាត់បង់ពួកគាត់»។
ការខាតបង់សរុប
លោក នេត វ៉ាន់ថា ប្រធាននាយកដ្ឋានបង្ការអគ្គិភ័យនៃក្រសួងមហាផ្ទៃ បានឱ្យដឹងថា ការយល់ដឹងរបស់សាធារណជនអំពីវិធីសាស្រ្ដក្នុងការបង្ការការឆាបឆេះនិងការផ្ទុះនៅមានកម្រិតនៅឡើយ។
លោកបានមានប្រសាសន៍នៅថ្ងៃចន្ទថា៖ «ដោយសារតែការមិនសូវយល់ដឹងរបស់ប្រជាជន ពួកគេបានធ្វើការផ្សារទៅលើធុងហ្គាសរាងស៊ីឡាំងដែលលេចធ្លាយ។ ពួកយើងបានកត់សម្គាល់ថា កន្លែងលក់ហ្គាសមួយចំនួនមានលេចចេញនូវឧស្ម័នហ្គាសក្នុងកំឡុងពេលដើរល្បាត ហើយពួកគេបានប្រើប្រាស់ភ្លើងដើម្បីផ្សារវាវិញ។ ការយល់ដឹងរបស់មនុស្សមួយចំនួនគឺមានកម្រិត»។
លោក វ៉ាន់ថា បានឱ្យដឹងថា ក្នុងឆ្នាំនេះមានករណីអគ្គិភ័យប្រមាណជា៦០០ករណីទូទាំងប្រទេស ដែលនេះគឺវាច្រើនជាង២០០ករណីបើធៀបជាមួយឆ្នាំមុនក្នុងថេរវេលាដូចគ្នា។
លោកបានកត់សម្គាល់ថា អាជ្ញាធរតាមតំបន់ត្រូវការមានទំនួលខុសត្រូវបន្ថែមចំពោះការគ្រប់គ្រងអាជីវកម្មដែលអាចប្រឈមមុខនឹងហានិភ័យខ្លាំងដោយការផ្ទុះឬការបំផ្លិចបំផ្លាញផ្សេងៗ ដូចជាហាងបញ្ចូលហ្គាសជាដើម។
គាត់និយាយថា៖ «អាជ្ញាធរតាមតំបន់ក៏មានទំនួលខុសត្រូវទៅលើវាដែរ ពីព្រោះអាជ្ញាធរតាមតំបន់អនុម័ត អនុញ្ញាតឬគ្រប់គ្រងប្រតិបត្តិការអាជីវកម្ម។ ទី២ សាលាក្រុងក៏ត្រូវមានទំនួលខុសត្រូវផងដែរ ពីព្រោះមានអនុក្រឹត្យមួយស្ដីអំពីការទុកដាក់ [កំប៉ុងហ្គាស] ដែលទាមទារឱ្យ [ជំនួញ] រក្សាវាទុកឱ្យឆ្ងាយពីតំបន់ទីប្រជុំជន សាលារៀន មូលដ្ឋានកងទ័ព ហើយជំនួញមួយនេះបានដំណើរការនៅទីប្រជុំជនដែលវាជាអំពើខុសច្បាប់»។
អ្នកនាំពាក្យសាលាក្រុងភ្នំពេញ លោក មេត មាសភក្ដី មិនបានមានមតិសម្រាប់ថ្ងៃអង្គារបានទេ។
លោក ងី ប៊ុនលី ប្រធានមន្ទីរថាមពលរាជធានីភ្នំពេញ បានថ្លែងនៅថ្ងៃអង្គារថា អាជីវកម្មបញ្ចូលហ្គាសគឺជាដំណើរការខុសច្បាប់មួយ ហើយម្ចាស់អាជីវកម្មមិនមានអាជ្ញាបណ្ណឡើយ។
ដោយឡែក ឡាំហុង បានអះអាងថា គ្រួសាររបស់លោកមានអាជ្ញាបណ្ណសម្រាប់អាជីវកម្មមួយនេះ ប៉ុន្តែមិនបានបញ្ជាក់ថា អាជ្ញាបណ្ណដែលពួកគេមានជាប្រភេទអាជ្ញាបណ្ណអ្វីឡើយ។
អ្នកជិតខាង៣នាក់បានអះអាងថា កូនប្រុសរបស់លោក ឡាំ ហុង គឺលោក ឡាំ សេងហាវ ដែលបានកាន់កាប់នូវមុខរបស់នេះ ហើយត្រូវផ្ទុះស្លាប់នោះ គឺត្រូវបានគេប្រទះឃើញថា កំពុងរៀនផ្សារធុងហ្គាសដោយខ្លួនឯងក្នុងគោលបំណងចង់សន្សំសំចៃលុយ ហើយអ្នកជិតខាងទាំងនោះបានសង្ស័យថា វាអាចនឹងបង្កឱ្យមានអគ្គិភ័យឆាបឆេះ។
តាក់ គឺជាបុរសម្នាក់ដែលព្យាយាមជួយក្មេងអាយុ៨ឆ្នាំពីការផ្ទុះនោះ បាននិយាយថា សេង ហាវ បានចាប់ផ្ដើមព្យាយាមផ្សារដែកនៅក្នុងហាងរបស់គាត់អស់រយៈពេល៥ថ្ងៃមកហើយមុននឹងមានអគ្គិភ័យនេះកើតឡើង ពោលគឺក្នុងគោលបំណងសន្សំលុយដែលពួកគេបានចំណាយទៅលើជាងផ្សារដែកទាំងអស់នោះ។
បុរសវ័យ២៣ឆ្នាំម្នាក់ដែលលក់អាហារនៅជិតនោះក៏បានឱ្យដឹងស្រដៀងគ្នានេះផងដែរ គាត់និយាយថា ម្ចាស់ហាងបានព្យាយាមកាត់បន្ថយតម្លៃ។
គាត់បាននិយាយកាលពីថ្ងៃចន្ទថា៖ «កូនប្រុសរបស់ ឡាំ ហុង បានព្យាយាមផ្សារនូវធុងហ្គាសលេចធ្លាយដោយខ្លួនឯង ទាំងដែលគាត់មិនមានជំនាញច្បាស់លាស់ជាមួយវាឡើយ។ ដូចនេះឧស្ម័នហ្គាសក៏ចេញមក ហើយវាជាហេតុដែលនាំឱ្យមានការផ្ទុះនេះកើតឡើង។ គាត់ចង់សន្សំសំចៃលុយ តែវាបែរក្លាយទៅជាការខាតបង់សរុបទៅវិញ»។
ប្រផ្នូលអាក្រក់
បន្ទាប់ពីការផ្ទុះនេះ ឡាំ ហុង បាននិយាយថា លោកបានដើរឆ្លងកាត់ក្នុងការបំផ្លិចបំផ្លាញនោះ ដើម្បីស្វែងរកកូនៗដែលនៅសល់។ លោកឪពុកម្នាក់នេះបាននិយាយថា គាត់បានទុកឆ្អឹង៥ខាំដែលគាត់រកឃើញ ហើយបូជាឆ្អឹងដែលនៅសេសសល់ រួចបោះចូលទៅក្នុងទន្លេ។
បន្ទាប់ពីបានបូជាសព្វសមាជិកគ្រួសាររបស់លោកនិងកម្មកររួចហើយ ឡាំ ហុង ដែលជាម្ចាស់ផ្ទះបាននិយាយថា ឥលូវនេះលោកត្រូវប្រយុទ្ធប្រឆាំងជាមួយបំណុលរបស់គ្រួសារនិងការបាត់បង់ទ្រព្យសម្បត្តិ។
គាត់បានប៉ាន់ស្មានថា ក្នុងករណីអគ្គិភ័យនេះ វាបានបំផ្លាញទ្រព្យសម្បត្តិរបស់លោកប្រមាណជាជាង២០០ ០០០ដុល្លារ ហើយគាត់បានកំពុងមានគម្រោងសម្របសម្រួលជាមួយម្ចាស់ហាងសត្វចិញ្ចឹមដែលត្រូវទទួលរងការខូចខាតក្នុងហេតុការណ៍ផ្ទុះនេះផងដែរ។
លោកបាននិយាយថា៖ «ពួកយើងមិនបានចង់ឱ្យរឿងនេះកើតឡើងឡើយ ហើយពួកយើងក៏បានបាត់បង់សមាជិកគ្រួសាររបស់យើងដែរ កូនរបស់ខ្ញុំពីរនាក់និងកម្មករពីរនាក់»។
ឡាំ ហុង បានបន្តថា គ្រួសាររបស់គាត់ទើបតែខ្ចីលុយ៤០ ០០០ដុល្លារពីកន្លែងផ្ដល់ប្រាក់កម្ចីយកមកផ្គត់ផ្គង់ក្នុងមុខជំនួញរបស់គេ។ ប៉ុន្តែបច្ចុប្បន្នអាជីវកម្មនេះត្រូវបញ្ឈប់ ហើយពួកគេគ្មានគម្រោងសម្រាប់បន្តអាជីវកម្មនេះឡើយ។
គាត់បន្តទៀតថា៖ «អ្វីដែលពួកខ្ញុំខំរកមួយជីវិតមកនេះ ត្រួវបានបំផ្លាញដោយអគ្គិភ័យមួយនេះ។ បន្ថែមពីលើនេះ ពួកយើងត្រូវជំពាក់បំណុលធនាគារក្នុងការដំណើរការអាជីវកម្មមួយនេះ»។
កាលពីមួយថ្ងៃទៅពីរថ្ងៃមុន គាត់ត្រូវបានដាស់ឱ្យក្រោកដោយកូនស្រីដែលស្លាប់នៅក្នុងអគ្គិភ័យនោះ ឡាំ ហុង បាននិយាយថា គាត់ត្រូវបានរំខានដោយសុបិនអាក្រក់អំឡុងពេលដេករបស់គាត់។ គាត់ថ្លែងថា គាត់យល់សប្តិឃើញផ្ទះរបស់គាត់តាំងពីឆ្នាំ១៩៩១ដែលគ្មានអ្វីទាំងអស់ ហើយសមាជិកគ្រួសារដែលជារឿយៗនៅក្នុងផ្ទះនេះត្រូវបានបាត់ខ្លួន។
យោងតាមសេចក្ដីសន្និដ្ឋាន គាត់ជឿថា សុបិន្ដនេះគឺជាប្រផ្នូលអាក្រក់មួយ ប៉ុន្តែនៅពេលដំបូងដែលគាត់ភ្ញាក់ពីដំណេក គាត់បានសង្កត់ធ្ងន់ទៅលើភាពពិតជាក់ស្ដែងរបស់អាជីវកម្មនិងបំណុលបច្ចុប្បន្នរបស់គាត់ជាង។
គាត់ថ្លែងថា៖ «ខ្ញុំមិនបានយកចិត្តទុកដាក់ទៅលើរឿងនេះឡើយ ដោយសារតែខ្ញុំគិតតែអំពីការធ្វើអាជីវកម្ម»។
បកប្រែពីអត្ថបទដើមជាភាសាអង់គ្លេស
