អាជ្ញាធរខណ្ឌ៧មករា បានបំបែកក្រុមគ្រួសារអតីតមន្ត្រីនិងសកម្មជនគណបក្សប្រឆាំងមិនឱ្យឈរតវ៉ានៅជាប់របងសាលាដំបូងរាជធានីភ្នំពេញ ដើម្បីទាមទារឱ្យដោះលែងស្វាមីរបស់ពួកគេចំនួន១៧នាក់ដែលកំពុងជាប់ឃុំនៅក្នុងពន្ធនាគារនោះឡើយ។
ភរិយា កូនៗ និងសាច់ញាតិរបស់អតីតមន្ត្រី និងសកម្មជនគណបក្សសង្គ្រោះជាតិ ប្រហែល៥០នាក់បានប្រមូលផ្ដុំគ្នាលើកបដា និងតវ៉ានៅមុខសាលាដំបូងរាជធានីភ្នំពេញជាថ្មីទៀតនៅថ្ងៃនេះ ដើម្បីទាមទារទៅតុលាការឱ្យដោះលែងស្វាមីរបស់ពួកគេចំនួន១៧នាក់ដែលកំពុងជាប់ឃុំក្នុងពន្ធនាគារ។
ការតវ៉ាពួកគេធ្វើឡើងស្របពេលដែលសាលាដំបូងរាជធានីភ្នំពេញនិងសាលាឧទ្ធរណ៍បើកសវនាការសំណុំរឿងអតីតមន្ត្រីបក្សសង្គ្រោះជាតិពីរនាក់នៅថ្ងៃនេះ ប៉ុន្តែការជួបជុំនិងតវ៉ានេះត្រូវបានក្រុមសន្តិសុខខណ្ឌ៧មករាចាប់និងបំបែកពួកគេ។
ប្រាប់អ្នកសារព័ត៌មានបន្ទាប់ក្រុមសន្តិសុខចាប់បំបែក អ្នកស្រី ព្រំ ចន្ថា ដែលត្រូវជាភរិយាលោក កាក់ កុម្ភារ សមាជិកជាប់ឆ្នោតនៃក្រុមប្រឹក្សារាជធានីភ្នំពេញមកពីគណបក្សសង្គ្រោះជាតិ ប្រាប់ថា ស្វាមីគាត់ត្រូវបានសមត្ថកិច្ចចាប់ខ្លួននៅថ្ងៃទី៣១ ខែឧសភាក្នុងឆ្នាំនេះ ដោយតុលាការចោទប្រកាន់ពីបទ «រួមគំនិតក្បត់ និងញុះញង់»។
អ្នកស្រីបន្តថា ពួកគាត់នឹងនាំគ្នាមកតវ៉ានៅមុខសាលារាជធានីភ្នំពេញម្ដងហើយម្ដងទៀត បើសិនជាតុលាការមិនដោះលែងស្វាមីនិងអ្នកជាប់ឃុំផ្សេងទៀត បើទោះបីជារាល់ពេលតវ៉ាម្ដងៗកន្លងមកត្រូវទទួលរងការគំរាមកំហែង ចាប់អូស និងរុញច្រានពីសមត្ថកិច្ចនិងក្រុមសន្តិសុខខណ្ឌ៧មករាក៏ដោយ។
អ្នកស្រី ព្រំ ចន្ថា ប្រាប់ថា៖ «ជាបងជាប្អូននិងជាចៅ ត្រូវតែមកដើម្បីស្រែកទាមទារឱ្យដោះលែងពួកគាត់។ ពួកគាត់អត់មានកំហុសទេ ខ្ញុំស្រែកទាមទាររហូតដល់ដោះលែងប្ដីខ្ញុំ អ្នកទាំងអស់គ្នា១៧រូប ដោយសារអីគាត់រងអយុត្តិធម៌ណាស់ គាត់គ្មានកំហុសទេ សូមឱ្យដោះលែងពួកគាត់ឥតលក្ខខណ្ឌ លើកលែងការចោទប្រកាន់ពួកគាត់ទាំងអស់»។
អ្នកស្រី នួន នឿន ដែលអះអាងជាសាច់ញាតិលោក លាស់ ឆេងឡាយ សមាជិកក្រុមប្រឹក្សាស្រុកបវេល លើកឡើងថា ការចាប់ឃុំខ្លួននិងចោទប្រកាន់លើអតីតមន្ត្រីនិងសកម្មជនបក្សប្រឆាំងដាក់ពន្ធនាគារ គឺជារឿងអយុត្តិធម៌។
អ្នកស្រី នួន នឿន ប្រាប់ថា៖ «ខ្ញុំយល់ថាគាត់គ្មានកំហុសទេ ព្រោះគាត់សប្បុរសជនចិត្តទូលាយ។ ពីមុនគាត់ជាប្រតិបត្តិស្រុកបវេល ពេលគេរំលាយបក្សសង្រ្គោះជាតិ គាត់ក៏ឈប់ ហើយគាត់ធ្វើចម្ការ ហើយគាត់ចាំជួយសង្គ្រោះអ្នកក្រីក្រដែកអត់លុយទៅពេទ្យ។ ចុះហេតុអ្វីបានចោទប្រកាន់គាត់ថាក្បត់អីទេ ខ្ញុំអត់បានដឹងគេចោទអីកាត់ខ្លះទេ ប៉ុន្តែខ្ញុំដឹងតែថាគាត់អត់មានទោសទេ ខ្ញុំធានាដោយជីវិតខ្ញុំ»។
វីអូឌីមិនអាចសុំការអត្ថាធិប្បាយពីអភិបាលខណ្ឌ៧មករា លោក លឹម សុភា ពាក់ព័ន្ធនឹងការបំបែកក្រុមភរិយា កូនៗ និងសាច់ញាតិរបស់អតីតមន្ត្រី និងសកម្មជនបក្សសង្គ្រោះជាតិនៅមុខតុលាការនាថ្ងៃនេះបានទេ ដោយទូរសព្ទចូលគ្មានអ្នកទទួល។
បន្ទាប់ពីក្រុមសន្តិសុខខណ្ឌ៧មករាបំបែកមិនឱ្យជួបជុំនៅជាប់របងតុលាការ ក្រុមស្ត្រី កូនៗ និងសាច់ញាតិរបស់មន្ត្រី និងសកម្មជនអតីតបក្សប្រឆាំង បាននាំគ្នាធ្វើយុទ្ធនាការដោយដើរថ្មើរជើងយកញត្តិទៅដាក់នៅស្ថានទូតអង់គ្លេសប្រចាំកម្ពុជា ដើម្បីសុំឱ្យស្ថានទូតជួយអន្តរាគមន៍មករដ្ឋាភិបាលកម្ពុជានិងតុលាការដោះលែងស្វាមីរបស់ពួកគេ។
ប្រាប់អ្នកសារព័ត៌មានបន្ទាប់ពីចូលជួបតំណាងស្ថានទូតអង់គ្លេស អ្នកស្រី ព្រំ ចាន់ដ្ឋា អះអាងថា តំណាងស្ថានទូតបានប្រាប់ពួកគាត់ថានឹងជួយអន្តរាគមន៍ចំពោះរឿងនេះ។
អ្នកស្រី ព្រំ ចាន់ដ្ឋា ប្រាប់ថា៖ «គាត់ឆ្លើយតបយ៉ាងល្អបំផុត គាត់នឹងជួយដោះស្រាយឱ្យពួកខ្ញុំទាំងអស់គ្នា ដើម្បីឱ្យមានដំណោះស្រាយ។ គាត់នឹងជួបប្រជុំទូតដែលខ្ញុំដាក់ញត្តិទាំងប៉ុន្មានហ្នឹង»។
អ្នកនាំពាក្យសមាគមការពារសិទ្ធិមនុស្សអាដហុក លោក ស៊ឹង សែនករុណា ដែលឃ្លាំមើលករណីនេះ បានចាត់ទុកសកម្មភាពរបស់ក្រុមសន្តិសុខនិងសមត្ថកិច្ចរបស់ខណ្ឌ៧មករា ថាជាការរំលោភសិទ្ធិមនុស្ស។
លោក ស៊ឹង សែនករុណា ប្រាប់ថា៖ «ខ្ញុំគិតថា គួរតែមានការសម្រួលជាងហ្នឹង បើមិនឱ្យគាត់នៅ យើងកុំប្រើវិធានការបែបហិង្សា មើលទៅគាត់អាចមានរងរបួស ឃើញចាប់គ្រវាត់ វាជារូបភាពអត់ល្អទេនៅពេលផ្សព្វផ្សាយតាមបណ្ដាញសង្គមឬសារព័ត៌មាន។ អ៊ីចឹង គួរតែមានវិធានការល្អជាងនេះ បើសិនជារារាំងពួកគាត់មិនឱ្យទៅតវ៉ាដល់មុខសាលាដំបូងអ៊ីចឹង»។
មេធាវីការពារក្ដីឱ្យអតីតសកម្មជននិងអ្នកគាំទ្របក្សប្រឆាំង លោក សំ សុគង់ ឱ្យដឹងថា គិតចាប់តាំងពីខែមករាដើមឆ្នាំនេះមក សកម្មជននិងអ្នកគាំទ្របក្សប្រឆាំងចំនួន១៤រូបហើយត្រូវបានសមត្ថកិច្ចចាប់ខ្លួននិងត្រូវបានចោទប្រកាន់ថា បានរួមគំនិតក្បត់ឬការចោទប្រកាន់ពីបទញុះញង់ជាដើម។ រីឯសកម្មជនបក្សប្រឆាំង៣រូបទៀត ត្រូវបានដាក់ឃុំនៅមុនឆ្នាំ២០២០នេះ៕