ក្រសួងសុខាភិបាលនៅថ្ងៃនេះ បានប្រកាសពីការរកឃើញករណីកូវីដ១៩ ចំនួន៤ករណីថ្មីទៀត លើកងទ័ពមួកខៀវកម្ពុជាដែលទើបត្រលប់មកពីប្រទេសម៉ាលី។
តាមសេចក្តីជូនដំណឹងរបស់ក្រសួងសុខាភិបាលដែលចេញផ្សាយនៅថ្ងៃនេះ អ្នកទាំង៤នាក់ស្ថិតក្នុងចំណោមកងទ័ពមួកខៀវអង្គការសហប្រជាជាតិរបស់កម្ពុជាចំនួន៨០នាក់ដែលវិលមកប្រទេសកម្ពុជាវិញកាលពីថ្ងៃទី១០ ខែកក្កដា ឆ្នាំ២០២០។
ក្រសួងបានបញ្ជាក់ថានៅពេលពួកគាត់មកដល់កាលពីថ្ងៃទី១០ ខែកក្កដា ក្រសួងបានធ្វើតេស្តលើកទី១ ដោយលទ្ធផលចេញមកអវិជ្ជមានទាំងអស់។ ប៉ុន្តែនៅពេលដែលធ្វើតេស្តជាលើកទី២នាថ្ងៃទី២៣ ខែកក្កដា កងទ័ព៤នាក់ត្រូវបានរកឃើញថាមានកូវីដ១៩ ដែលអ្នកជំងឺចំនួន៣នាក់ដែលជាបុរសកំពុងសម្រាកព្យាបាលនៅមណ្ឌលសុខភាពចាក់អង្រែ និងម្នាក់ទៀតជាស្រ្តីកំពុងសម្រាកនៅមន្ទីរពេទ្យមិត្តភាពខ្មែរ-សូវៀត។
យោងតាមក្រសួងសុខាភិបាល គិតត្រឹមព្រឹកថ្ងៃទី២៤ ខែកក្កដា កម្ពុជារកឃើញករណីកូវីដ១៩សរុបចំនួន២០២នាក់ ដែលក្នុងនោះព្យាបាលជាសះស្បើយសរុបចំនួន១៤២នាក់៕
