របាយការណ៍សិក្សាមួយរកឃើញថា អំពើហិង្សាក្នុងគ្រួសារបានធ្លាក់ចុះដល់ទៅ៣២ភាគរយ អំឡុងពេលវិបត្តិសុខភាពសកល ដែលបង្កឡើងដោយការឆ្លងរីករាលដាលនៃវីរុសកូរ៉ូណាកើតឡើងអស់រយៈពេលជាងកន្លះឆ្នាំមកហើយនោះ។
ការរកឃើញបែបនេះ ត្រូវបានបង្ហាញនៅក្នុងរបាយការណ៍នៃការសិក្សាអំពីផលប៉ះពាល់នៃជំងឺកូវីដ១៩លើសេដ្ឋកិច្ច ដែលត្រូវបានធ្វើឡើងរួមគ្នាដោយអង្គការវេទិកាអនាគតនិងក្រុមហ៊ុនអង្គរស្រាវជ្រាវកម្ពុជា តាមរយៈការសម្ភាសពលរដ្ឋជាសំណាកចំនួន១,១៣៤នាក់នៅរាជធានីភ្នំពេញ ខេត្តសៀមរាប កំពង់ស្ពឺ កំពត និងស្វាយរៀង នៅចន្លោះខែមករានិងខែមេសា ក្នុងឆ្នាំ២០២០នេះ។
លទ្ធផលនៃការសិក្សាដែលបានមកពីការសម្ភាសពលរដ្ឋនិងមេភូមិនោះ បានរកឃើញថា អំពើហិង្សាក្នុងគ្រួសារបានធ្លាក់ចុះនៅក្នុងចំណោមគ្រួសារដែលបានផ្ដល់សម្ភាសន៍នៅរាជធានីភ្នំពេញ ខេត្តសៀមរាប និងខេត្តកំពត ប៉ុន្តែបានកើនឡើងនៅខេត្តស្វាយរៀងនិងខេត្តកំពង់ស្ពឺទៅវិញ។
លទ្ធផលនៃការសិក្សាបានបង្ហាញថា អំពើហិង្សាក្នុងគ្រួសារនៅរាជធានីភ្នំពេញបានធ្លាក់ចុះពី១៩ករណីនៅខែមករា មកនៅត្រឹម៦ករណីនៅខែមេសា ខណៈខេត្តសៀមរាបធ្លាក់ចុះពី១៤ករណី មកនៅត្រឹម៩ករណី ហើយអំពើហិង្សាក្នុងគ្រួសារកើតឡើងនៅខេត្តកំពតបានធ្លាក់ចុះពី១១ករណី មកនៅ៦ករណីវិញ។
ប្រធានផ្នែកក្រុមបច្ចេកទេសនៃគម្រោងស្រាវជ្រាវនៅក្រុមហ៊ុនអង្គរស្រាវជ្រាវកម្ពុជា លោក អ៊ាន រ៉េម៉េក (Ian Ramage) បានប្រាប់ថា របាយការណ៍ស្រាវជ្រាវនេះមិនអាចបញ្ជាក់បានច្បាស់លាស់អំពីមូលហេតុនៃការធ្លាក់ចុះអំពើហិង្សាក្នុងគ្រួសារនៅតាមបណ្ដាខេត្តមួយចំនួន និងមូលហេតុនៃការកើនឡើងបញ្ហានេះនៅបណ្ដាខេត្តដទៃទៀតនោះឡើយ។
អ្នកស្រាវជ្រាវរូបនេះប្រាប់ថា ការសិក្សានេះគ្រាន់តែចង់បង្ហាញពីចំណុចអវិជ្ជមានសម្រាប់រដ្ឋាភិបាលយកទៅពិចារណានិងធ្វើកំណែទម្រង់ ដើម្បីធ្វើឱ្យសេដ្ឋកិច្ចនៅកម្ពុជារីកចម្រើន ហើយការសិក្សានេះនឹងត្រូវតាមដានបន្ថែមទៀតនៅ២ខែក្រោយ។
លោក អ៊ាន រ៉េម៉េក ប្រាប់ថា៖ «ខ្ញុំសង្ឃឹមថា ព័ត៌មាននេះនឹងជួយដល់រដ្ឋាភិបាលក្នុងការផ្តោតគោលដៅគាំទ្រពលរដ្ឋនៅវិស័យណាដែលត្រូវការបំផុតនោះ»។
ផ្ទុយពីខេត្តនិងរាជធានីទាំង៣ខាងលើនេះ អ្នកឆ្លើយតបបានរាយការណ៍អំពីការកើនឡើងនៃអំពើហិង្សាក្នុងគ្រួសារនៅក្នុងខេត្ត២ផ្សេងទៀតដែលក្រុមអ្នកស្រាវជ្រាវបានចុះទៅសម្ភាស ក្នុងនោះនៅខេត្តកំពង់ស្ពឺកើនឡើងពី១៣ករណីទៅដល់១៦ករណី ហើយខេត្តស្វាយរៀងកើនឡើងពី២ករណីមក៣ករណីក្នុងអំឡុងពេលដូចគ្នានេះ។
ស្នងការរងនគរបាលខេត្តកំពង់ស្ពឺទទួលផែនប្រឆាំងការជួញដូរមនុស្សនិងការពារអនីតិជន អ្នកស្រី ងិន សុគន្ធា បានប្រាប់ថា អ្នកស្រីមិនយល់ពីការសិក្សានេះទេ ប៉ុន្តែអ្នកស្រីប្រាប់ថា អំពើហិង្សាក្នុងគ្រួសារនៅក្នុងខេត្តមួយនេះបានថយចុះ៣ករណី ពោលគឺបានធ្លាក់ចុះពីចំនួន១០ករណីនៅក្នុងរយៈពេល៦ខែកាលពីឆ្នាំមុន មកនៅត្រឹម៧ករណីប៉ុណ្ណោះនៅឆមាសទី១ឆ្នាំនេះ។
អ្នកស្រី ងិន សុគន្ធា ប្រាប់ថា៖ «វាថយចុះ៣ករណី ដោយសារមូលហេតុយើងបិទខារ៉ាអូខេ។ ណាមួយនៅជំនាន់កូវីដ១៩ យើងចុះផ្សព្វផ្សាយកុំឱ្យប្រជាពលរដ្ឋជួបជុំគ្នា កាត់បន្ថយការផឹក[ស្រា] ហើយមិនមានពិធីមង្គលការ អត់មានការជួបជុំគ្នាក្នុងភូមិនីមួយៗក៏អត់ដែរ។ និយាយរួម បទល្មើសព្រហ្មទណ្ឌ[ផ្សេងទៀត]ក៏ថយចុះដែរ»។
នាយករងទទួលបន្ទុកផ្នែកឃ្លាំមើលសិទ្ធិមនុស្សនៃអង្គការលីកាដូ លោក អំ សំអាត មានប្រសាសន៍ថា ដើម្បីទប់ស្កាត់កុំឱ្យមានអំពើហិង្សាក្នុងគ្រួសារបន្តកើតមាន លុះត្រាតែរដ្ឋាភិបាលនិងដៃគូពាក់ព័ន្ធសហការធ្វើកិច្ចការនេះរួមគ្នា អប់រំប្រជាពលរដ្ឋឱ្យបានទូលំទូលាយ ទើបទទួលបានផលវិជ្ជមាន។
លោក អំ សំអាត ប្រាប់ថា៖ «អំណាចនៃបុរសត្រូវមានការកាត់បន្ថយ អប់រំឱ្យមានការយល់ ហើយជាពិសេសគ្រឿងញៀន គ្រឿងស្រវឹង ត្រូវតែកាត់បន្ថយបញ្ហាទាំងអស់ហ្នឹង ហើយបង្កើនការអប់រំផ្សព្វផ្សាយប្រជាពលរដ្ឋឱ្យបានយល់ ព្រោះអំពើហិង្សាក្នុងគ្រួសារអត់មានអ្វីចំណេញទេ ទីមួយប៉ះពាល់ធ្ងន់ធ្ងរសម្រាប់គ្រួសារទាំងមូល ហើយក៏វាអាចបណ្តាលឱ្យប៉ះពាល់ដល់សង្គមយើងដែរ បើសិនជាអំពើហិង្សាកើតឡើងច្រើន»។
បើតាមអ្នកការពារសិទ្ធិមនុស្សរូបនេះ អំពើហិង្សាក្នុងគ្រួសារទៅលើស្ត្រី បានកើតឡើង៨៨ករណីនៅតាមបណ្ដាខេត្ត-រាជធានី១៤ ដែលអង្គការមួយនេះបានទទួលកាលពីឆ្នាំ២០១៩កន្លងមកនេះ។ ចំណែក៦ខែក្នុងឆ្នាំនេះ លីកាដូបានទទួលនិងផ្តល់សេវាបានចំនួន៥០ករណីជូនអ្នកដែលរងគ្រោះនៃអំពើហិង្សាក្នុងគ្រួសារ៕
