ក្រសួងអប់រំ យុវជន និងកីឡា បានធ្វើការសម្រេចអនុញ្ញាតឱ្យគ្រឹះស្ថានសិក្សាឯកជនរៀបចំវិញ្ញាសាប្រឡងសញ្ញាបត្រមធ្យមសិក្សាទុតិយភូមិដោយសាម៉ីសាលានីមួយៗ ប៉ុន្តែត្រូវគោរពតាមគោលការណ៍របស់ក្រសួង។
យោងតាមសេចក្តីណែនាំរបស់ក្រសួងអប់រំ យុវជន និងកីឡា ចេញកាលពីថ្ងៃទី១៤ ខែកក្កដា ការតាក់តែងវិញ្ញាសាប្រឡងសញ្ញាបត្រមធ្យមសិក្សាទុតិយភូមិរបស់សាលាឯកជនទាំងនោះត្រូវធ្វើឡើងស្របតាមកម្មវិធីសិក្សា តាមស្ដង់ដារវិញ្ញាសាចាស់ ត្រូវរាប់វិញ្ញាសាទៅតាមចំនួនបេក្ខជនក្នុងបន្ទប់ប្រឡងទាំងអស់ និងកំណត់វិញ្ញាសាទៅតាមចំនួនបន្ទប់ក្នុងករណីវិញ្ញាសាចម្លងដាក់លើក្ដារខៀន។
ប្រភពដដែលបន្ថែមថា បន្ទាប់ពីដំណើការសរសេរនីមួយៗ គ្រឹះស្ថានសិក្សាឯកជនត្រូវរៀបចំវិញ្ញាសាយ៉ាងមានសុវត្ថិភាព ហើយត្រូវផ្ញើដោយផ្ទាល់ទៅកាន់រដ្ឋមន្ត្រីក្រសួងអប់រំ យុវជន និងកីឡា ដើម្បីពិនិត្យ។ ចំពោះសាលានៅតាមខេត្តអាចបញ្ជូនមកក្រសួងនៅពេលចប់វិញ្ញាសាសរសេរ។
តាមសេចក្ដីណែនាំដដែលនេះ គ្រឹះស្ថានសិក្សាឯកជនត្រូវដាក់សំណើរួមជាមួយបញ្ជីរាយនាមឈ្មោះសិស្សដែលត្រូវប្រឡងទៅខាងក្រសួងអប់រំ យុវជន និងកីឡា ដើម្បីស្នើសុំសិទ្ធិរៀបចំការប្រឡងដោយខ្លួនឯងតាមស្ថាប័នឯកជននីមួយៗឱ្យបានមុនដំណាច់ខែកក្កដា ឆ្នាំ២០២០។
ក្រសួងបានបញ្ជាក់ទៅគ្រឹះស្ថានសិក្សាឯកជនថា គ្រឹះស្ថានសិក្សាឯកជនទាំងអស់ដែលបានស្នើសុំសិទ្ធិការប្រឡងដោយខ្លួនឯង ត្រូវមានការបញ្ជាក់យ៉ាងច្បាស់ថា គ្រឹះស្ថានសិក្សាឯកជនមានលទ្ធភាពគ្រប់គ្រាន់ក្នុងការរៀបចំការប្រឡង បើពុំដូច្នោះទេ ត្រូវរង់ចាំការប្រឡងជាសាធារណៈ។
ការរៀបចំគណៈមេប្រយោគនិងគណៈកម្មាការ ត្រូវបានកំណត់តាមការរៀបចំរបស់គ្រឹះស្ថានសិក្សាឯកជនរៀងៗខ្លួន ហើយដើម្បីធានានូវគុណភាពនៃការប្រឡង ក្រសួងនិងមន្ទីរនឹងចុះទៅផ្ទាល់ដល់គ្រឹះស្ថានសិក្សាឯកជនតាមការចាំបាច់ក្នុងដំណើរការនៃការប្រឡង ដោយយោងតាមសេចក្ដីណែនាំរបស់ក្រសួងអប់រំ យុវជន និងកីឡា។
អ្នកនាំពាក្យក្រសួងអប់រំ យុវជន និងកីឡា លោក រស់ សុវាចា បានបញ្ជាក់ប្រាប់វីអូឌីតាមតេលេក្រាម (Telegram) ថា សម័យប្រលងបាក់ឌុបនៅតាមគ្រឹះស្ថានសិក្សាឯកជនសម្រាប់ឆ្នាំសិក្សា២០១៩-២០២០ នឹងប្រព្រឹត្តទៅនៅថ្ងៃទី២៧-២៨ ខែសីហា ឆ្នាំ២០២០ខាងមុខ។
អ្នកទទួលភ្ញៀវរបស់សាលាអន្ដរជាតិផារ៉ាហ្គន រ៉ានី ឡាហ្វី បានប្រាប់វីអូឌីថា សាលារបស់គាត់មានក្រុមគ្រូបង្រៀនទទួលបន្ទុករៀបចំវិញ្ញាសារួចហើយ។
រ៉ានី ឡាហ្វី ប្រាប់ថា៖ «ដោយសារខាងសាលាហ្នឹងគាត់ឱ្យខាងគ្រូៗគាត់អ្នករៀបចំ។ ចឹងហើយពេលដែលគាត់រៀបចំអីហើយ គាត់ត្រូវការឱ្យក្រសួងពិនិត្យ។ ចឹងទៅ ពេលក្រសួងពិនិត្យគាត់ថាអូខេត្រឹមត្រូវបានហើយ គឺគាត់ជាអ្នក Approve [យល់ព្រម] ឱ្យសាលាថា អាចទទួលយកបានចឹងហ្អាស។ ចឹងក៏គេយល់ព្រមទៅបង»។
ទោះយ៉ាងណាក៏ដោយ លោក រស់ សុវាចា បានប្រាប់វីអូឌីថា ការប្រឡងសញ្ញាបត្រមធ្យមសិក្សាទុតិយភូមិសម្រាប់គ្រឹះស្ថានសិក្សាសាធារណៈ ក្រសួងអប់រំ យុវជន និងកីឡា នឹងជំរាបសាធារណជននៅពេលក្រោយអំពីសម័យប្រឡងជាក់លាក់និងព័ត៌មានពាក់ព័ន្ធនឹងការប្រឡង៕