អាជ្ញាធរឥណ្ឌូនេស៊ីបានឃាត់ទូកនេសាទរបស់វៀតណាមចំនួន២គ្រឿង ដោយចោទថា បានចូលទៅតំបន់ព្រំដែនសមុទ្រដែលមិនទាន់ឯកភាពគ្នា ហើយអ្នកធ្វើការលើទូកនោះវាយបកលើអាជ្ញាធរដើម្បីរត់គេចពីការចាប់ខ្លួន។
អាជ្ញាធរដែនសមុទ្រនៃប្រទេសឥណ្ឌូនេស៊ីបានបញ្ជាក់ថា ពួកគេបានប្រយុទ្ធជាមួយក្រុមទូកនេសាទវៀតណាមអស់រយៈពេល២ម៉ោងបន្ទាប់ពីមានការសង្ស័យថា ទូកនេសាទទាំង២នេះ បានចូលនេសាទហួសព្រំដែនដែលពួកគេអាចនេសាទបាន។ នេះបើតាមទីភ្នាក់ងារសារព័ត៌មាន AFP។
ប្រភពដដែលឱ្យដឹងទៀតថា ការប៉ះទង្គិចគ្នារវាងកម្លាំងសមត្ថកិច្ចឥណ្ឌូនេស៊ីនិងអ្នកនេសាទវៀតណាមនេះ កើតឡើងនៅថ្ងៃពុធ ទី២២ ខែកក្កដា ដែលពេលនោះនាវិកមួយចំនួនបានលោតចូលក្នុងទឹក។
លោក Ma’ruf ដែលជាមេបញ្ជាការនៃនាវាការពារដែនសមុទ្ររបស់ឥណ្ឌូនេស៊ី បាននិយាយថា៖ «មានមេក្រុមម្នាក់មកពីនាវាមួយបានព្យាយាមវាយបកមកយើងវិញដោយកន្ត្រៃ ក៏ប៉ុន្តែពួកយើងបានគ្រប់គ្រងស្ថានការណ៍នេះបាន»។
លោកបន្តថា៖ «ពួកយើងក៏បានជួយនាវិកមួយចំនួនដែលធ្លាក់ចូលក្នុងទឹកផងដែរ»។
ប្រតិបត្តិការបង្រ្កាបនេះ សមត្ថកិច្ចឥណ្ឌូនេស៊ីឃាត់ខ្លួនអ្នកនេសាទវៀតណាមប្រមាណ១០នាក់។ ទោះយ៉ាងណា ករណីនេះ មិនទាន់មានប្រតិកម្មឆ្លើយតបពីរដ្ឋាភិបាលវៀតណាមនៅឡើយទេ។
គួរបញ្ញាក់ផងដែរថា ប្រទេសឥណ្ឌូនេស៊ីគឺជាប្រទេសមួយដែលសម្បូរដោយប្រជុំកោះធំជាងគេនៅលើពិភពលោក ដែលការនេសាទខុសច្បាប់ទាំងឡាយនឹងធ្វើឱ្យខាតបង់សេដ្ឋកិច្ចរបស់ប្រទេសខ្លួនរាប់លានដុល្លារជារៀងរាល់ឆ្នាំ ដូចនេះនាវាបរទេសណាដែលចូលក្នុងដែនទឹកខ្លួន ឥណ្ឌូនេស៊ីនឹងព្យាយាមបញ្ឈប់។
ទីក្រុងចាកាតា បានអះអាងថា តំបន់ខាងត្បូងបំផុតនៃសមុទ្រចិនខាងត្បូងជាតំបន់សេដ្ឋកិច្ចផ្តាច់មុខរបស់ខ្លួន។ គួររំលឹកផងដែរថា កាលពីខែមីនា អាជ្ញាធរដែនសមុទ្រឥណ្ឌូនេស៊ីរឹបអូសបានទូកនេសាទខុសច្បាប់វៀតណាមចំនួន៥គ្រឿងនិងចាប់ខ្លួននាវិកចំនួន៧០នាក់នៅក្នុងនោះ។
ជម្លោះដែនសមុទ្ររវាងឥណ្ឌូនេស៊ីនិងវៀតណាមកើតឡើងក្នុងអំឡុងឆ្នាំ១៩៧០ ដណ្តើមគ្នាកាន់កាប់ដែនទឹកដែលមានទំហំ៣៧ ០០០គីឡូម៉ែត្រការេ។
ប្រទេសទាំង២ចាប់ផ្តើមជជែកគ្នាលើកដំបូងដើម្បីបែងចែកដែនទឹកនេះនៅឆ្នាំ១៩៧២ ប៉ុន្តែមិនមានការឯកភាពគ្នានោះទេ។
ប្រទេសទាំង២ព្យាយាមចរចាស្វែងរកដំណោះស្រាយជាបន្តបន្ទាប់ រហូតដល់ឆ្នាំ២០០៧ ប្រទេសទាំង២បានឈានដល់ការចុះហត្ថលេខាលើកិច្ចព្រមព្រៀងមួយកំណត់ព្រំដែនបណ្ណោះអាសន្ន ដើម្បីបើកផ្លូវចរចាឆ្ពោះទៅរកការឯកភាពគ្នាទាំងស្រុង៕