ក្រុមហ៊ុនបច្ចេកវិទ្យាមួយរបស់សហរដ្ឋអាមេរិកឈ្មោះ Coursera ដែលផ្តោតលើការសិក្សាតាមប្រព័ន្ធអនឡាញ បានផ្តល់ចំណាត់ថ្នាក់សម្រាប់ឆ្នាំ២០២០ឱ្យវៀតណាមជាប់លេខ២នៅក្នុងតំបន់អាស៊ីប៉ាស៊ីហ្វិកនិងលេខ២២នៅលើភិពលោក។
ក្រុមហ៊ុន Coursera ជាក្រុមហ៊ុនរៀបចំប្រព័ន្ធកម្មវិធីសិក្សាមុខជំនាញបច្ចេកវិទ្យាតាមបណ្តាញអ៊ីនធឺណិតជាសកល ដោយកំណត់យកប្រទេសចំនួន៦០និងឧស្សាហកម្មចំនួន១០។
តាមប្រភពពីសារព័ត៌មានក្នុងប្រទេសវៀតណាមចុះផ្សាយនៅថ្ងៃអង្គារសប្តាហ៍នេះឱ្យដឹងថា របាយការណ៍សន្ទស្សន៍ជំនាញសកល (GSI) របស់ក្រុមហ៊ុន Coursera គឺផ្អែកលើជំនាញបច្ចេកវិទ្យាសម្រាប់ដោះស្រាយបញ្ហាអាជីវកម្មប្រចាំថ្ងៃ ការបង្កើត ថែទាំ និងគ្រប់គ្រងបច្ចេកវិទ្យា និងជំនាញរៀបចំទិន្នន័យតាមលក្ខណៈវិទ្យាសាស្រ្តសម្រាប់ការអភិវឌ្ឍសេវាកម្មនិងផលិតផលផ្សេងៗ។
តាមរបាយការណ៍ពីកាសែត VnExplorer ក្រុមហ៊ុន Coursera លើកឡើងថា ជំនាញទាំងនេះគឺសុទ្ធតែកំពុងពេញនិយមបំផុតក្នុងចំណោមកម្មវិធីសិក្សាតាមប្រព័ន្ធអនឡាញរបស់ក្រុមហ៊ុន បើគិតពីចំនួនអ្នកចុះឈ្មោះរៀននិងសារសំខាន់សម្រាប់អនាគតការងារ។
នាយកប្រតិបត្តិក្រុមហ៊ុន Coursera លោក Jeff Maggioncalda មានប្រសាសន៍ថា របាយការណ៍ GSI ឆ្នាំ២០២០ បានផ្តល់ចំណាត់ថ្នាក់ដោយផ្អែកលើថាតើការអនុវត្តជំនាញគន្លឹះទាំងនោះក្នុងផ្នែកឧស្សាហកម្មនិងសេដ្ឋកិច្ចបានប្រសិទ្ធភាពកម្រិតណា។
លោកបន្ថែមថា ក្រុមហ៊ុនបានវាយតម្លៃលើទិន្នន័យលទ្ធផលរបស់អ្នកដែលបានចុះឈ្មោះក្នុងរយៈពេល១២ខែចុងក្រោយក្នុងចំណោមសិស្សដែលបានចុះឈ្មោះសរុប៦៥លាននាក់ នៅក្នុងប្រព័ន្ធកម្មវិធីសិក្សាតាមអនឡាញរបស់ក្រុមហ៊ុន។
របាយការណ៍នេះបានផ្តល់ចំណាត់ថ្នាក់ប្រកួតប្រជែងលើជំនាញបច្ចេកវិទ្យាដល់វៀតណាមនៅលំដាប់លេខ២ក្នុងពិភពលោក ដោយនៅពីក្រោយកម្រិតទំនើបបំផុតនិងនៅលើបច្ចេកវិទ្យាកំពុងលូតលាស់លឿននិងលូតលាស់យឺត។
របាយការណ៍ដដែលឱ្យដឹងបន្ថែមថា វៀតណាមមានសមត្ថភាពប្រកួតប្រជែងក្នុងវិស័យបច្ចេកវិទ្យាខ្លាំងបំផុតលើការបង្កើតកម្មវិធីដំណើរការលើប្រព័ន្ធប្រតិបត្តិការឧបករណ៍ចល័ត Android និង iOS។
ប្រភពដដែលបន្ថែមថា វៀតណាមមានសមត្ថភាពប្រកួតប្រជែងកើនឡើងជាបន្តបន្ទាប់លើផ្នែកបច្ចេកវិទ្យាបណ្តាញកុំព្យូទ័រ បណ្តាញឥតខ្សែ ការអភិវឌ្ឍកម្មវិធីដែលទាក់ទាញអ្នកប្រើប្រាស់ កម្មវិធីបកប្រែភាសាម៉ាស៊ីនកុំព្យូទ័រ និងប្រព័ន្ធរក្សាទុកទិន្នន័យគោល។
ក្នុងចំណោមប្រទេសកំពូលទាំង៤នៅតំបន់អាស៊ីប៉ាស៊ីហ្វិកដែលទទួលបានចំណាត់ថ្នាក់ខ្ពស់ៗក្នុងវិស័យបច្ចេកវិទ្យា វៀតណាមបានយកឈ្នះជប៉ុននិងអូស្ត្រាលីដើម្បីឈរនៅចំណាត់ថ្នាក់លេខ២ ដោយតាមពីក្រោយប្រទេសនូវែលសេឡង់ និងឈរនៅលំដាប់លេខរៀងទី២២ក្នុងសកលលោក៕
