ក្រសួងសុខាភិបាលបានប្រកាសរកឃើញករណីអ្នកឆ្លងកូវីដ១៩ ចំនួន២៣ករណីថ្មីទៀតដែលនាំឱ្យករណីអ្នកមានកូវីដ១៩សរុបនៅកម្ពុជាកើនដល់២២៥នាក់។
តាមសេចក្តីជូនព័ត៌មានរបស់ក្រសួងសុខាភិបាលដែលចេញនៅថ្ងៃនេះ ក្នុងចំណោមអ្នកឆ្លងថ្មីទាំង២៣នាក់មានជនជាតិខ្មែរចំនួន១៩នាក់ និងឥណ្ឌូនេស៊ី៤នាក់។
ក្រសួងសុខាភិបាលបញ្ជាក់ថា អ្នកឆ្លងថ្មីទាំង២៣នាក់នេះ គឺជាជនជាតិឥណ្ឌូណេស៊ីចំនួន៤នាក់ ដែលធ្វើដំណើរមកតាមជើងហោះហើរ AK 538 និងជនជាតិខ្មែរចំនួន៤នាក់ធ្វើដំណើរតាមជើងហោះហើរ KR708 បន្ទាប់ពីមកដល់ប្រទេសកម្ពុជានៅថ្ងៃទី ២៣ ខែកក្តដា ឆ្នាំ២០២០ ។ ដោយឡែកអ្នកឆ្លងចំនួន១៥នាក់ផ្សេងទៀតគឺជាក្រុមបុរសខ្មែរដែលធ្វើដំណើរមកពីប្រទេសរុស្យ៉ី និងអេហ្ស៊ីបតាមជើងហោះហើរម៉ាឡេស៊ី កាលថ្ងៃទី១៩ ខែកក្តដា ឆ្នាំ២០២០កន្លងទៅបន្ទាប់ពីតេស្តចំនួន៣លើក។
បច្ចុប្បន្នអ្នកឆ្លងថ្មីទាំង២៣នោះកំពុងសម្រាកព្យាបាលនៅមណ្ឌលសុខភាពចាក់អង្រែ មន្ទីរពេទ្យខ្មែរ សូវៀត និងមន្ទីរពេទ្យបង្អែកខេត្តកំពង់ស្ពឺ។
នៅថ្ងៃនេះក្រសួងក៏បានប្រកាសពីការព្យាបាលជាសះស្បើយនូវបុរសខ្មែរវ័យ២៦ឆ្នាំម្នាក់មកពីខេត្តត្បូងឃ្មុំ ដែលជាអ្នកធ្វើដំណើរមកពីប្រទេសឥណ្ឌូនេស៊ី៕
