ក្រសួងអប់រំ យុវជន និងកីឡា បានអនុញ្ញាតឱ្យដំណើរការឡើងវិញនូវសកម្មភាពហាត់ប្រាណនិងលេងកីឡានៅតាមទីធ្លាសាធារណៈ នៅទូទាំងប្រទេសនិងក្នុងបរិវេណកីឡដ្ឋានអូឡាំពិក។
ក្រសួងអប់រំ យុវជន និងកីឡា បានសម្រេចបែបនេះនៅក្នុងសេចក្តីជូនដំណឹងដែលចេញនៅថ្ងៃនេះ បន្ទាប់ពីមានការអនុញ្ញាតពីសំណាក់លោកនាយករដ្ឋមន្ត្រី ហ៊ុន សែន។
ក្នុងសេចក្ដីជូនដំណឹង ក្រសួងបញ្ជាក់ថា ការសម្រេចបែបនេះគឺឈរលើមូលដ្ឋានថា ការទប់ស្កាត់ការរីករាលនៃជំងឺកូវីដ១៩នៅប្រទេសកម្ពុជាមានភាពល្អប្រសើរ និងដើម្បីលើកកម្ពស់ការថែទាំសុខភាពផ្លូវចិត្តរបស់ប្រជាពលរដ្ឋ។
ក្រសួងបញ្ជាក់ថា សេចក្ដីសម្រេចនេះសម្រាប់តែសកម្មភាពហាត់ប្រាណនិងលេងកីឡាតាមទីធ្លាសាធារណៈនៅតាមរាជធានី-ខេត្តនិងក្នុងបរិវេណកីឡដ្ឋានអូឡាំពិក ប៉ុន្តែសកម្មភាពហាត់ប្រាណតាមក្លឹបកីឡាដែលប្រើប្រាស់សម្ភាររួមគ្នា មិនត្រូវបានអនុញ្ញាតឡើងវិញនៅឡើយទេ។
ក្រសួងអប់រំស្នើឱ្យទីកន្លែងហាត់ប្រាណទាំងអស់ត្រូវបន្តគោរពតាមវិធានសុវត្ថិភាពរបស់ក្រសួងសុខាភិបាលនិងអង្គការសុខភាពពិភពលោក ដូចជា រក្សាអនាម័យជាប្រចាំដោយលាងសម្អាតដៃនឹងសាប៊ូ ទឹកអាល់កុល ជែលសម្លាប់មេរោគ ពាក់ម៉ាស់និងវាស់កម្ដៅ រក្សាគម្លាតសុវត្ថិភាព ទីកន្លែងហាត់ប្រាណត្រូវបាញ់សម្លាប់មេរោគ និងត្រូវធានាថា កន្លែងហាត់ប្រាណមិនមែនជាកន្លែងឆ្លងជំងឺកូវីដ១៩។
ក្រសួងអប់រំបានសម្រេចផ្អាកជាបណ្ដោះអាសន្ននូវរាល់សកម្មភាពកីឡាមានការប្រមូលផ្ដុំនៅតាមទីធ្លាសាធារណៈនិងឯកជន ចាប់តាំងពីថ្ងៃទី៧ ខែមេសាកន្លងមក បន្ទាប់ពីកម្ពុជារកឃើញមនុស្សកាន់តែច្រើនឆ្លងវីរុសកូរ៉ូណា។
គិតត្រឹមថ្ងៃ២៨ ខែកក្កដា ឆ្នាំ២០២០នេះ មនុស្សចំនួន២២៦នាក់ហើយត្រូវបានរកឃើញឆ្លងវីរុសកូរ៉ូណានៅក្នុងប្រទេសកម្ពុជា និង១៤៧នាក់ត្រូវបានព្យាបាលជាសះស្បើយ៕
