អ្នកឃ្លាំមើលសិទ្ធិមនុស្សនិងអ្នកច្បាប់ជំរុញឱ្យរដ្ឋាភិបាលនិងស្ថាប័នពាក់ព័ន្ធចាត់វិធានការច្បាប់ទៅលើមន្ត្រីនគរបាលខេត្តព្រៃវែងចំនួន៧នាក់ ដែលបានប្រើប្រាស់ហិង្សាទៅលើជនសង្ស័យបង្កឱ្យមានរបួស ដើម្បីកុំឱ្យមានករណីនេះកើតឡើងនៅពេលក្រោយទៀត។
កាលពីថ្ងៃអង្គារកន្លងមកនេះ អគ្គស្នងការនគរបាលជាតិ លោក នេត សាវឿន បានផ្អាកការងារនគរបាល៧នាក់នៅខេត្តព្រៃវែង ដែលទទួលបន្ទុកផែនប្រឆាំងគ្រឿងញៀន បន្ទាប់ពីពួកគេប្រើប្រាស់អំពើហិង្សាលើជនសង្ស័យពេលចុះបង្រ្កាបបទល្មើសគ្រឿងញៀន។
អ្នកនាំពាក្យអគ្គស្នងការនគរបាលជាតិ លោក ឆាយ គឹមខឿន ប្រាប់វីអូឌីថា ការដាក់ពិន័យទៅលើនគរបាលទាំង៧នាក់នោះ ដោយសារពេលចុះបង្ក្រាបគ្រឿងញៀន ពួកគេធ្វើខុសក្រមសីលធម៌វិជ្ជាជីវ:និងវិន័យរបស់កងកម្លាំងនគរបាលជាតិ ដោយបានប្រើប្រាស់អំពើហិង្សាលើជនសង្ស័យបង្កឱ្យមានរបួសស្នាម។
ស្នងការរងទទួលផែនការងារនគរបាលព្រហ្មទណ្ឌនៃស្នងការដ្ឋាននគរបាលខេត្តព្រៃវែង លោក ពៅ ជីវី មានប្រសាសន៍ថា ក្នុងចំណោមមន្ត្រីនគរបាលចំនួន៧នាក់នោះ គឺមានម្នាក់ត្រូវបានជនរងគ្រោះប្ដឹងមកសមត្ថកិច្ចករណីប្រើប្រាស់អំពើហិង្សាលើពួកគេ។ លោកបន្តថា សមត្ថកិច្ចនឹងបញ្ជូនសំណុំរឿងមន្ត្រីនគរបាលម្នាក់ដែលប្រើប្រាស់អំពើហិង្សាលើជនសង្ស័យទៅតុលាការខេត្តព្រៃវែងក្នុងសប្ដាហ៍នេះ។
លោក ពៅ ជីវី ប្រាប់ថា៖ «យើងទៅមើលអង្គហេតុ តើណាខ្លះអ្នកដែលពាក់ព័ន្ធទៅនឹងអំពើដែលខុសច្បាប់ហ្នឹង ការដែលចុះតាមកំណត់ថាទៅប៉ុន្មានអ្នកៗ គឺយើងមិនបានបញ្ជាក់ទៅជូនទេ ប៉ុន្តែគ្រាន់ថានៅក្នុងបណ្ដឹងនេះ ជនរងគ្រោះប្ដឹង៤០នាក់ទេ បណ្ដឹងរបស់ជនរងគ្រោះប្ដឹងតែម្នាក់ទេ ចង់និយាយថា បណ្ដឹងជនរងគ្រោះ ជនរងគ្រោះបានដាក់ពាក្យបណ្ដឹងមកសមត្ថកិច្ចដើម្បីឱ្យរកយុត្តិធម៌ជូនគាត់»។
លោកមេធាវី សុក សំអឿន មានប្រសាសន៍ថា បើសិនជនសង្ស័យដែលសមត្ថកិច្ចចាប់ខ្លួនគ្មានអាវុធនិងលទ្ធភាពដើម្បីតបតវិញ ប៉ុន្តែបែរជាសមត្ថកិច្ចប្រើប្រាស់អំពើហិង្សាលើជនសង្ស័យនោះ លោកថា ចូលក្នុងបទប្រើប្រាស់ហិង្សាដោយចេតនា។
លោក សុក សំអឿន ប្រាប់ថា៖ «ឧបមាថា ជនល្មើសហ្នឹង គេចាប់បាន ចងហើយ ដល់អ៊ីចឹងជនហ្នឹងមានកម្លាំងអាចធ្វើការវាយប្រហារនគរបាលបានអត់? គឺអត់បានទេ! ដូច្នេះបើសិនជាអត់ហើយនគរបាលទៅវាយគេទៀត អាហ្នឹងវាត្រូវបទប្រើហិង្សាដោយចេតនា។ បាទ! អាហ្នឹងពីបទប្រព្រឹត្តហិង្សាដោយចេតនា ហើយបើសិនដល់ស្លាប់អីទៀត អាហ្នឹងវាជារឿងផ្សេងទៀត»។
កាលពីថ្ងៃទី២០ ខែកក្កដា កម្លាំងជំនាញនៃស្នងការដ្ឋាននគរបាលខេត្តព្រៃវែង បានចុះបង្ក្រាបបទល្មើសជួញដូរគ្រឿងញៀន ស្ថិតនៅភូមិ៦ សង្កាត់កំពង់លាវ ក្រុងព្រៃវែង។
ក្នុងប្រតិបត្តិការចុះបង្រ្កាបនោះ សមត្ថកិច្ចបានចាប់ជនសង្ស័យ ហើយបានដកកាំភ្លើងខ្លីពីចង្កេះ រួចវាយក្បាលពួកគេ និងហៅបក្ខពួកមកព្រួតគ្នាចាប់វាយក្រៀកយកទៅការិយាល័យ ធ្វើទារុណកម្ម ហើយបានទារប្រាក់ចំនួន៤លានរៀលជាថ្នូរនឹងការដោះលែងវិញ។
កាលពីថ្ងៃទី៣០ ខែមិថុនាកន្លងមក មន្ត្រីនគរបាល៣នាក់ នៅសង្កាត់ក្បាលកោះ ដែលចុះបង្ក្រាបមុខសញ្ញាជួញដូរនិងប្រើប្រាស់គ្រឿងញៀន បានចាប់ខ្លួនបុរសម្នាក់ចងដៃទៅក្រោយ ហើយលើកដាក់លើម៉ូតូមួយគ្រឿង ប៉ុន្តែបុរសនោះបានរើបម្រះធ្លាក់ពីលើម៉ូតូ បន្ទាប់មកបុរសម្នាក់បានធាក់ទៅលើបុរសដែលធ្លាក់ពីលើម៉ូតូ ហើយប្រើជង្គង់ទៅសង្កត់លើក្បាលផ្ទប់ទៅនឹងដី។ ក្រោយពីមានហេតុការណ៍នេះ ស្នងការនគរបាលក្រុងភ្នំពេញ លោក ស ថេត បានចេញលិខិតព្រមានមន្ត្រីនគរបាលដែលប្រើប្រាស់ហិង្សាលើបុរសរូបនោះ ប៉ុន្តែមន្ត្រីទាំងនោះមិនត្រូវបានផ្អាកការងារឬបណ្តេញចេញពីក្របខណ្ឌឡើយ។
អ្នកនាំពាក្យសមាគមការពារសិទ្ធិមនុស្សអាដហុក លោក ស៊ឹង សែនករុណា ជំរុញរដ្ឋាភិបាលនិងស្ថាប័នពាក់ព័ន្ធត្រូវចាត់វិធានការច្បាប់លើមន្ត្រីនគរបាលដែលបានប្រើប្រាស់អំពើហិង្សាលើពលរដ្ឋ ជាជាងការសម្រេចផ្អាកការងារ។ លោកបន្តថា ប្រសិនបើមន្ត្រីអនុវត្តន៍ច្បាប់ធ្វើខុសហើយ មិនបានទទួលទោសតាមច្បាប់នោះ លោកថា ករណីនេះនឹងកើតឡើងនៅថ្ងៃក្រោយទៀត។
លោក ស៊ឹង សែនករុណា ប្រាប់ថា៖ «អ៊ីចឹងបើសិនជាយើងមិនចាត់វិធានការអ៊ីចឹងទេ ដូចខ្ញុំលើកឡើងអ៊ីចឹង គឺកន្លងមកយើងឃើញថា មានរឿងមួយចំនួនក៏ចាត់ការ រឿងមួយចំនួនទៀតមិនចាត់ការ ហើយធ្វើឱ្យរឿងហ្នឹងនៅចេះតែបន្ដកើតមានឡើងរហូតដល់រឿងដែលនៅព្រៃវែងហ្នឹងក៏ជាគំរូមួយបន្តពីរឿងមុនៗមកដែរ»៕
