ក្រសួងសុខាភិបាលបានប្រកាសពីរកឃើញអ្នកឆ្លងកូវីដ១៩ចំនួន៧នាក់បន្ថែមទៀត ដែលនាំឱ្យករណីកូវីដ១៩នៅកម្ពុជាកើនដល់២៣៣ករណី។
តាមសេចក្តីជូនព័ត៌មានរបស់ក្រសួងសុខាភិបាលដែលចេញនៅថ្ងៃនេះ ក្នុងចំណោមអ្នកឆ្លងថ្មីទាំង៧នាក់ រួមមាន កងកម្លាំងមួកខៀវកម្ពុជាចំនួន៤នាក់ដែលទើបត្រលប់មកពីប្រទេសម៉ាលីកាលពីថ្ងៃទី១០ ខែកក្កដា និងពលរដ្ឋខ្មែរដែលទើបមកពីប្រទេសឥណ្ឌូនេស៊ីកាលពីថ្ងៃទី២៣ ខែកក្កដា ចំនួន៣នាក់។
ប្រភពដដែលក៏បានឱ្យដឹងថា ក្រុមគ្រូពេទ្យបានព្យាបាលជាសះស្បើយអ្នកជំងឺកូវីដ១៩ចំនួន៧នាក់ទៀតផងដែរ បន្ទាប់ពីទទួលបានលទ្ធផលតេស្តអវិជ្ជមានចំនួន២លើក។
គិតត្រឹមថ្ងៃទី២៩ ខែកក្កដា ឆ្នាំ២០២០ ចំនួនអ្នកឆ្លងកូវីដ១៩ក្នុងប្រទេសកម្ពុជាមានចំនួន២៣៣នាក់ ក្នុងនោះអ្នកជាសះស្បើយចំនួន១៥៤នាក់ និងអ្នកកំពុងសម្រាកព្យាបាលចំនួន៧៩នាក់៕