មេនគរបាលរាជធានីភ្នំពេញបានឱ្យដឹងថា មនុស្សម្នាក់ត្រូវបានសមត្ថកិច្ចបញ្ជូនទៅតុលាការ ក្រោយពីការចុះបង្ក្រាបនៅទីតាំងក្លឹបកម្សាន្តមួយកន្លែងក្នុងខណ្ឌសែនសុខ ដែលបានឃាត់ខ្លួនមនុស្សដល់ទៅជិត៣០០នាក់កាលពីយប់ថ្ងៃចន្ទកន្លងមកនេះ។
ស្នងការរាជធានីភ្នំពេញ លោក ស ថេត ប្រាប់វីអូឌីនៅថ្ងៃនេះថា សមត្ថកិច្ចបានចុះបង្ក្រាបក្លឹបរាត្រី ហ្គោល ឡាញ (Gold Line) នៅភូមិភ្នំពេញថ្មី កាលពីយប់ថ្ងៃទី២៧ ខែកក្កដា ដោយឃាត់ខ្លួនយុវតីជាង៨០នាក់និងយុវជនជាង១០០នាក់។
មេនគរបាលរូបនេះបញ្ជាក់ថា បុគ្គលិកជិត២០នាក់ទៀត រួមមាន អ្នកអនាម័យ អ្នកលាងចាន អ្នករត់តុ និងអ្នកចាក់ភ្លេង(ឌីជេ)ជាដើម កំពុងស្ថិតក្រោមការសួរនាំដោយសមត្ថកិច្ច ពាក់ព័ន្ធនឹងការមិនគោរពតាមការណែនាំរបស់ក្រសួងសុខាភិបាលក្នុងការទប់ស្កាត់ជំងឺកូវីដ១៩។
ស្នងការរូបនេះឱ្យដឹងទៀតថា ក្រុមយុវជននិងយុវតី១៨០នាក់ ត្រូវបានសមត្ថកិច្ចសម្រេចដោះលែងវិញ ក្រោយពីធ្វើកិច្ចសន្យានិងណែនាំឱ្យឈប់ប្រព្រឹត្តិល្មើសវិធានការណ៍របស់រដ្ឋាភិបាលអំឡុងវិបត្តិសុខភាពសាធារណៈនេះ។
លោក ស ថេត ប្រាប់ថា៖ «ចំពោះមុខ ឥលូវនេះ យើងបញ្ជូនទៅមេការម្នាក់[…]គាត់មិនគោរពទៅតាមវិធានឬក៏សារាចរណែនាំរបស់ក្រសួងក៏ដូចជារដ្ឋបាលរាជធានីភ្នំពេញ ហើយយើងបញ្ជូនទៅព្រះរាជអាជ្ញា។ គាត់ចោទយ៉ាងដូចម្តេច ជាសិទ្ធិរបស់គាត់»។
លោក សេ ថេត បានឱ្យដឹងថា សមត្ថកិច្ចមិនទាន់ដឹងថា នរណាជាម្ចាស់ក្លឹបកម្សាន្តនេះនៅឡើយទេ ប៉ុន្តែលោកថា សមត្ថកិច្ចកំពុងស្រាវជ្រាវរកម្ចាស់ក្លឹបកម្សាន្តមួយនេះ។
អ្នកនាំពាក្យសាលារាជធានីភ្នំពេញ លោក ម៉េត មាសភក្តី ប្រាប់ថា ដើមចមដែលនាំឱ្យសមត្ថកិច្ចចុះបង្ក្រាបទីតាំងក្លឹបកម្សាន្តនោះ ដោយសារតែម្ចាស់ក្លឹបមិនគោរពតាមការណែនាំរបស់ក្រសួងសុខាភិបាលក្នុងការទប់ស្កាត់ជំងឺកូវីដ១៩។
ទីប្រឹក្សាជាន់ខ្ពស់នៃអង្គការកម្មវិធីអភិវឌ្ឍន៍ធនធានយុវជន (YRDP) លោក ជាង សុខា សង្កេតឃើញថា មួយរយៈចុងក្រោយនេះ យុវជន យុវតី និងប្រជាពលរដ្ឋមួយចំនួន ហាក់ធ្វេសប្រហែសច្រើនក្នុងការទប់ស្កាត់នៃការឆ្លងរាលដាលនៃជំងឺកូវីដ១៩។ ករណីនេះ លោកជំរុញទៅសមត្ថកិច្ចត្រូវពង្រឹងការអនុវត្តវិធានការណ៍របស់រដ្ឋាភិបាលនិងក្រសួងសុខាភិបាល ដើម្បីទប់ស្កាត់ការឆ្លងរីករាលដាលនៃជំងឺកូវីដ១៩មានប្រសិទ្ធភាពខ្ពស់។
លោក ជាង សុខា ប្រាប់ថា៖ «ជួនកាលតឹង ជួនកាលធូរទៅ វាធ្វើឱ្យមានហានិភ័យ វាខ្ពស់ដែរសម្រាប់កម្ពុជា បើសិនជាស្ថានភាពនៃកូវីដវាកើនឡើង ព្រោះប៉ុន្មានសប្តាហ៍ចុងក្រោយនេះ ហាក់ដូចជាមានសន្ទះជាថ្មីដែលគួរឱ្យព្រួយបារម្ភនៅពេលដែលប្រជាពលរដ្ឋ កម្រិតនៃការភ័យខ្លាច បើធៀបនឹងការចាប់ផ្តើម កម្រិតនៃការភ័យខ្លាចកាន់តែតិចទៅ ធ្វើឱ្យសកម្មភាព[ការឆ្លងជំងឺកូវីដ១៩]កាន់តែកើនឡើង ដែលអាចធ្វើឱ្យមានហានិភ័យខ្ពស់សម្រាប់ប្រជាពលរដ្ឋទាំងមូល មិនថាតែប្រជាជនទេ»។
វីអូឌីមិនអាចសុំការបំភ្លឺពីអ្នកនាំពាក្យក្រសួងសុខាភិបាល លោកស្រី ឱ វណ្ណឌីន បានទេនៅថ្ងៃនេះ។
ក្នុងសេចក្តីជូនដំណឹងមួយកាលពីថ្ងៃទី៧ ខែកក្កដា សាលារាជធានីភ្នំពេញបានប្រាប់ទៅម្ចាស់អាជីវកម្មក្លឹបកម្សាន្តនិងខារ៉ាអូខេទាំងអស់នៅរាជធានីភ្នំពេញ ឱ្យបើកដំណើរឡើងវិញ ដោយប្រែក្លាយទៅជាភោជនីយដ្ឋាន ប៉ុន្តែម្ចាស់អាជីវកម្មទាំងនោះត្រូវគោរពលក្ខខណ្ឌមួយចំនួនដូចជា ត្រូវស្នើសុំលិខិតអនុញ្ញាតបើកអាជីវកម្មទៅតាមយន្តការច្រកចេញចូលតែមួយរាជធានីភ្នំពេញ គោរពនូវវិធាននៃក្រសួងសុខាភិបាលក្នុងការទប់ស្កាត់ការរីករាលដាលជំងឺកូវីដ១៩ និងវិធានការណ៍សុវត្ថិភាពរបស់ក្រសួងទេសចរណ៍។
កាលពីថ្ងៃទី១៧ ខែមីនា ក្រសួងទេសចរណ៍បានស្នើទៅអភិបាលខេត្ត-រាជធានីទូទាំងប្រទេសចាត់វិធានការណ៍បិទ KTV ក្លឹបកម្សាន្ត (ខារ៉ាអូខេ រង្គសាល ឌីស្កូតែក) ទាំងអស់ ចាប់ពីថ្ងៃទី១៧ ខែមីនា រហូតដល់មានការជូនដំណឹងជាថ្មី។
ក្រសួងទេសចរណ៍ ឱ្យដឹងថា គិតត្រឹមខែមីនាកន្លងមក កម្ពុជាមានមណ្ឌលកម្សាន្តមនុស្សពេញវ័យចំនួន១,២៩៣កន្លែងនៅទូទាំងប្រទេស ក្នុងនោះមានខារ៉ាអូខេ (KTV) ចំនួន១,០៨៤កន្លែង ក្លឹបឌីស្កូតែក (ClubDisco) ១០៩កន្លែង អាជីវកម្មរង្គសាល (Night Club) ១៦កន្លែង អាជីវកម្មបៀរហ្គាឌិន ៨៤កន្លែង ដែលផ្ដល់ការងារ១៨,៣៨១កន្លែងសម្រាប់ពលរដ្ឋកម្ពុជា៕