ក្រុមផលិតករផលិតភាពយន្ដមួយចំនួនសម្ដែងការព្រួយបារម្ភរបស់ពួកគេ បន្ទាប់ពីមានការចែកចាយព័ត៌មានថា ក្រសួងវប្បធម៌តម្រូវឱ្យផលិតករស្នើសុំច្បាប់អនុញ្ញាតមុននឹងផលិតនិងចេញផ្សាយស្នាដៃភាពយន្តរបស់ពួកគេ។
ប្រធានផ្នែកផលិតភាពយន្ដនៃស្លឹករឹតភាពយន្ដរបស់មជ្ឈមណ្ឌលឯកសារកម្ពុជា លោក អ៊ូច មករា បានប្រាប់វីអូឌីឱ្យដឹងថា តាមគំនិតរបស់លោក ការដែលធ្វើបែបនេះមិនមែនជាការប្រសើរឡើយ។ លោកថា ការផលិតភាពយន្ដនៅក្នុងស្រុកមានចំនួនតិច ដូច្នេះបើសិនជាមានការតឹងរ៉ឹងបែបនេះទៀត នោះវារឹតត្បិតស្នាដៃរបស់អ្នកនិពន្ធជាមិនខាន។
លោក អ៊ូច មករា បន្តថា៖ «ខ្ញុំគិតថា យើងពុំទាន់គួរលើកទឹកចិត្តអ្នកផលិតភាពយន្តក្នុងស្រុកតាមវិធីនេះនៅឡើយទេ។ […] ខ្ញុំយល់ថា ពួកគាត់អាចលើកទឹកចិត្តអ្នកផលិតតាមរយៈការបំផុសគំនិត ឬជាថវិកា ឬសម្រួលទីតាំង ឯកសារ បច្ចេកទេស ឬតំបន់ណាដែលនៅក្រោមអំណាចរបស់ក្រសួង ដើម្បីជួយផ្សព្វផ្សាយឱ្យបានទូលំទូលាយនិងត្រូវតាមទិសដៅរបស់ក្រសួងទៀត ជាជាងយើងដាក់កម្រិតផលិតករទាំងអស់ត្រូវតែយកគំនិតរបស់ខ្លួនមកឆ្លងកាត់សិនមុនការថតនោះ»។
ស្រដៀងគ្នានេះដែរ ជំនួយការផលិតភាពយន្ដនិងជាអ្នកបញ្ចូលសំឡេង លោក ជា សំបាន ការប៉ុនប៉ងពិនិត្យស្នាដៃមុនចេញថតឬចេញផ្សាយ ធ្វើបែបនេះមានផលវិបាកសម្រាប់លោកនិងក្រុមការងាររបស់លោកផ្ទាល់។ អ្នកថតវីដេអូពាក់ព័ន្ធនឹងជីវិតសត្វព្រៃរូបនេះបន្ថែមថា នីតិវិធីនេះនឹងត្រូវចំណាយពេលយូរមុននឹងបានដំណើរការនៃការថតរហូតដល់ផលិតកុនទាំងមូលតែម្ដង។
លោក ជា សំបាន៖ «បើយើងចង់បញ្ចេញភាពយន្ដអីមួយ វាត្រូវយឺតពេល ព្រោះអីស្ថាប័នរបស់រដ្ឋឬក្រសួងនីមួយៗ បើយើងដាក់ស្នើសុំជាការអីមួយឬស្នើសុំជាសិទ្ធអីមួយ គឺវានិយាយទៅគឺវារាងយឺតយ៉ាវបន្តិច អ៊ីចឹងចំពោះការផ្សព្វផ្សាយនិងគំនិតដែលធ្វើភាពយន្ដហ្នឹងនឹងត្រូវយឺតត្រូវគាំងត្រូវស្ទះ»។
លោកស្នើក្រសួងពន្លឿនលើការត្រួតពិនិត្យ ធ្វើយ៉ាងណាឱ្យឆាប់រហ័សនិងលឿនជាងរបៀបធ្វើការបច្ចុប្បន្ន។
ផលិតករវ័យក្មេង លោក សុង សៀកឡេង ដែលជាម្ចាស់ស្នាដៃភាពយន្ដរឿង «ប្របុម្បិតនាគិម្ទន្ដ» បានប្រាប់វីអូឌីថា ការដែលមានការគ្រប់គ្រង ត្រួតពិនិត្យសិល្បៈភាពយន្តនិងវីដេអូ វាក៏អាចប៉ះពាល់ដល់សេរីភាពក្នុងការបង្ហាញចេញនូវស្នាដៃច្នៃប្រឌិតរបស់ផលិតករគ្រប់រូប។ លោកបន្តថា ក្រសួងគួរតែរឹតត្បិតត្រឹមតែភាពយន្តធំៗ ហើយគួរអនុគ្រោះដល់ភាពយន្តខ្នាតតូចនិងភាពយន្តខ្នាតខ្លី។
លោកនិយាយថា៖ «បើយើងរឹតត្បិតរឿងហ្នឹងពេក វានឹងធ្វើឱ្យអ្នកផលិតហ្នឹងបាក់ទឹកចិត្ត»។
លោក សុង សៀកឡេង បន្ថែមថា លោកចង់ឱ្យមន្រ្តីពាក់ព័ន្ធជួយពន្លឿនដំណើរការក្នុងការកែតម្រូវដល់ខ្លឹមសារភាពយន្ដ ដោយហេតុថា កន្លងមក ក្រុមអ្នកផលិតត្រូវរង់ចាំនាយកដ្ឋានត្រួតពិនិត្យរហូតដល់ជិត១ខែទើបសម្រេចថា អនុញ្ញាតឬមិនអនុញ្ញាតឱ្យផលិត។ លោកបញ្ជាក់ថា ការរង់ចាំនេះនាំឱ្យខាតទាំងពេលវេលានិងប៉ះពាល់ដល់សង្វាក់ផលិតកម្មទាំងមូល។
ដោយឡែក កញ្ញា រិទ្ធី លំអរពេជ្រ ស្ថាបនិកនៃគម្រោងបុណ្យភូមិនិងជាអ្នកផលិតភាពយន្ដឯករាជ្យមួយរូប ដែលជាអ្នកដឹកនាំផលិតរឿង «ស្នេហាក្មេងៗ» បានប្រាប់សារព័ត៌មានវីអូឌីឱ្យដឹងថា កញ្ញាមិនទាន់មានមតិអ្វីសម្រាប់បញ្ហាមួយនេះនៅឡើយទេ ដោយសារតែកញ្ញាគិតថា ព័ត៌មាននេះមិនទាន់មានភាពទូលំទូលាយនៅឡើយទេ។
ប៉ុន្តែកញ្ញាបានបន្តថា បើសិនជាព័ត៌មានជាអនុក្រឹត្យរបស់ក្រសួងមែន គួរតែមានការផ្សព្វផ្សាយជាលក្ខណៈទ្រង់ទ្រាយធំផង និងគួរតែមានការបញ្ជាក់ឱ្យបានច្បាស់លាស់និងមានការរៀបរាប់ឱ្យបានក្បោះក្បាយជាងនេះ។ កញ្ញាគិតថា បញ្ហានេះគួរតែមានការបើកជាសន្និបាតប្រកាសពីរឿងមួយនេះ។
ប្រធាននាយកដ្ឋានភាពយន្ត និងផ្សព្វផ្សាយវប្បធម៌ នៃក្រសួងវប្បធម៌ និងវិចិត្រសិល្បៈ លោក ប៉ុក បូរក្ស បញ្ជាក់ថា សេចក្ដីជូនដំណឹងនេះចេញផ្សាយតាំងពីខែវិច្ឆិកា ឆ្នាំ២០១៦ ហើយនាយកដ្ឋានក៏បានប្រកាសរយៈពេល៦ខែមុននឹងធ្វើការអនុវត្តផងដែរ។
លោក ប៉ុក បូរក្ស បានប្រាប់វីអូឌីថា នៅពេលដែលនាយកដ្ឋានគិតថា ភាពយន្តឬវីដេអូរបស់ពួកគេមានចំណុចខ្វះខាតនិងប៉ះពាល់នោះ នាយកដ្ឋាននឹងទាក់ទងពួកគេដើម្បីពិភាក្សា។
ជុំវិញការលើកឡើងរបស់ផលិតករចំពោះដំណើរការយឺតយ៉ាវនៃការពិនិត្យលើខ្លឹមសារភាពយន្ត លោក ប៉ុក បូរក្ស បញ្ជាក់ថា៖ «ខ្ញុំអត់ដែលបានទទួលការស្នើសុំសោះពីខាងពួកគាត់ដែលផលិត ហើយគាត់ត្អូញថា មានការផ្ដល់សេវាយឺតនៃការផ្ដល់ដោយអាជ្ញាធរហ្នឹងណា»។
លោកបន្តថា ក្នុងដំណើរការនៃការត្រួតពិនិត្យនេះ គឺយោងតាមតារាងនៃការផ្ដល់ពេលវេលា ដែលសម្រាប់កុនខ្នាតវែង ផលិតករត្រូវចំណាយពេល១៥ថ្ងៃ ឯកុនខ្នាតខ្លី ត្រូវចំណាយពេល៥ថ្ងៃដើម្បីត្រួតពិនិត្យ។ លោកប្រាប់ថា ក្នុងករណីដែលដល់ថ្ងៃកំណត់ តែខាងនាយកដ្ឋានគ្មានការឆ្លើយតប នោះមានន័យថា ផលិតករត្រូវបានអនុញ្ញាតឱ្យផលិតភាពយន្ដរបស់ពួកគេបាន៕
