អង្គការសហប្រជាជាតិ កាលពីថ្ងៃអង្គារ ម្សិលមិញនេះ បានចេញលិខិតជាសាធារណៈមួយ ដែលចោទសួរទៅរដ្ឋាភិបាលជុំវិញការចោទថា បាន«គំរាមកំហែង»ទៅលើមន្ត្រីអង្គការលីកាដូ ខណៈរដ្ឋាភិបាលបានបន្តការវាយប្រហារក្រុមនេះចំពោះការចូលរួមជា«បណ្តាញ»អង្គការក្នុងស្រុក និងអន្តរជាតិ ដែលធ្វើការដើម្បី«ប្រឌិត»ព័ត៌មានអំពីកម្ពុជា។
នាយករងនៃអង្គការឃ្លាំមើលសិទ្ធិមនុស្សលីកាដូ លោក អំ សំអាត ត្រូវបានដកស្រង់សម្ដីដោយវិទ្យុអាស៊ីសេរី របស់អាមេរិកកាលពីថ្ងៃទី២៩ ខែមីនាកន្លងមក ដោយបាននិយាយថា ការចាប់ខ្លួនមនុស្សមួយចំនួនជុំវិញការបង្ហោះព័ត៌មានពាក់ព័ន្ធនឹងជំងឺកូវីដ១៩នៅលើបណ្ដាញសង្គមហ្វេសប៊ុក ហាក់មានទាក់ទងនឹងហេតុផលនយោបាយ។ ពីរថ្ងៃក្រោយមក លោកនាយករដ្ឋមន្ត្រី ហ៊ុន សែន ព្រមានចាប់ខ្លួនលោក អំ សំអាត ជុំវិញការអធិប្បាយរបស់លោក។
អង្គការសហប្រជាជាតិ បានផ្ញើលិខិតរបស់ខ្លួនទៅកាន់រដ្ឋាភិបាលកម្ពុជា ២ខែក្រោយពីលោក ហ៊ុន សែន បានព្រមានបែបនេះ។ អង្គការសហប្រជាជាតិបានស្វែងរកការបកស្រាយពីរដ្ឋាភិបាលកម្ពុជាជុំវិញវិធានការដែលអាចបង្កឱ្យមាន«ក្ដីបារម្ភពីផលប៉ះពាល់ទៅលើសេរីភាពនៃការបញ្ចេញមតិ»។
លិខិតដែលសរសេរដោយអ្នករាយការណ៍សិទ្ធិមនុស្ស៤រូបរបស់អង្គការសហប្រជាជាតិ បានរៀបរាប់ថា៖ «យើងពិតជាព្រួយបារម្ភថា ការថ្កោលទោសនិងគំរាមគំហែងចាប់ខ្លួនលោក អំ សំអាត នេះ ហាក់ជាប់ទាក់ទងដោយផ្ទាល់ទៅនឹងការងាររបស់គាត់ក្នុងការការពារសិទ្ធិមនុស្ស និងត្រូវបានរៀបចំឡើងដើម្បីទប់ស្កាត់ការអនុវត្តសិទ្ធិសេរីភាពបញ្ចេញមតិនិងសិទ្ធិរបស់គាត់ក្នុងការការពារសិទ្ធិមនុស្ស»។
លិខិតដដែលនេះ បានស្នើសុំព័ត៌មានអំពីឧប្បត្តិហេតុ និងព្រមទាំងស្នើឱ្យរដ្ឋាភិបាលពន្យល់ពីវិធានការណ៍ណាមួយដែលត្រូវធ្វើ ដើម្បីធានាថា ប្រព័ន្ធផ្សព្វផ្សាយអាចផ្សព្វផ្សាយព័ត៌មានអំពីកូវីដ១៩ ដោយគ្មានការគំរាមកំហែង ឬការបំភិតបំភ័យ។
ការិយាល័យសិទ្ធិមនុស្សរបស់អង្គការសហប្រជាជាតិនៅកម្ពុជា បានចេញលិខិតជាសាធារណៈនៅថ្ងៃអង្គារម្សិលមិញនេះ រួមគ្នាជាមួយការឆ្លើយតបរបស់រដ្ឋាភិបាលកាលពីថ្ងៃទី១៤ ខែកក្កដា ដែលជាផ្នែកមួយនៃគោលនយោបាយរបស់ខ្លួនក្នុងការចេញផ្សាយលិខិតរួមគ្នា និងឆ្លើយតបមុន ៦០ថ្ងៃ បន្ទាប់ពីលិខិតឆ្លើយឆ្លងនេះត្រូវបានបញ្ជូន។
ក្នុងលិខិតឆ្លើយតបរបស់ខ្លួន ស្ថានបេសកកម្មអចិន្រ្តៃយ៍កម្ពុជាប្រចាំនៅអង្គការសហប្រជាជាតិ បានលើកឡើងថា ក្រុមមន្រ្តីសង្គមស៊ីវិលរួមទាំងលោក អំ សំអាត ត្រូវបានការពារពីការបំភិតបំភ័យ ប៉ុន្តែពួកគេចាំបាច់ត្រូវដាក់«ព័ត៌មានឱ្យច្បាស់លាស់ពីការចោទប្រកាន់ថាមានការបំភិតបំភ័យ»នោះ ប្រសិនបើពួកគេចង់ឱ្យអាជ្ញាធរចាត់វិធានការឱ្យបានសមស្រប។
ការឆ្លើយតបរបស់ស្ថានបេសកកម្មអចិន្ត្រៃយ៍កម្ពុជាប្រចាំនៅ UN បានបន្ថែមទៀតថា ភាគីពាក់ព័ន្ធទាំងអស់ រួមទាំងប្រព័ន្ធផ្សព្វផ្សាយ ត្រូវតែសង្កេតឱ្យបានត្រឹមត្រូវនូវវិធានការណ៍របស់រដ្ឋាភិបាលលើការស្កាត់ជំងឺកូវីដ១៩។
សេចក្តីថ្លែងការណ៍បានរៀបរាប់ថា៖ «គាត់មិនគួរចូលរួមក្នុងការផ្សព្វផ្សាយនិងបំផ្លើសព័ត៌មាន ដែលអាចបង្កការភ័យខ្លាចដល់ប្រជាជន ហើយនាំឱ្យមានភាពវឹកវរ និងអស្ថិរភាពសង្គមនោះទេ»។
អំឡុងពេលបើកសន្និសីទសារព័ត៌មានកាលពីថ្ងៃម្សិលមិញនេះ អ្នកនាំពាក្យរដ្ឋាភិបាល លោក ផៃ ស៊ីផាន បានព្រមានជុំវិញ«ការប្រឌិត» និងរលកនៃការរិះគន់ថ្មីៗប្រឆាំងនឹងអង្គការលីកាដូ។
អង្គការសិទិ្ធមនុស្សមួយនេះ បានរងការវាយប្រហារពីក្រុមមន្ត្រីរដ្ឋាភិបាលជុំវិញរបាយការណ៍ស្រាវជ្រាវថ្មីៗរបស់ខ្លួន។ អង្គការមួយនេះបានឈរជាសហអ្នកនិពន្ធនៃការស៊ើបអង្កេតនានាទៅក្នុងអំពើរំលោភសិទ្ធិមនុស្សនៅក្នុងឧស្សាហកម្មមីក្រូហិរញ្ញវត្ថុ ដែលនិយាយថា «បំណុលវ័ណ្ឌកក្នុងចំណោមពលរដ្ឋក្រីក្រនៅតាមជនបទ» ត្រូវបានគេនិយាយថា ជាដើមចមបង្កឱ្យមានការដកហូតកម្មសិទ្ធិដីធ្លី។ កាលពីថ្ងៃចន្ទកន្លងមកនេះ អង្គការលីកាដូនិងក្រុមសិទ្ធិមនុស្ស៣ស្ថាប័នទៀត បានចេញផ្សាយការសិក្សាមួយទៅលើផលប្រយោជន៍របស់បុគ្គលមានអំណាចនៅពីក្រោយការចាក់ដីលុបបឹងទំពុននៅរាជធានីភ្នំពេញ។
លោក ផៃ ស៊ីផាន បានចាត់ទុកអង្គការលីកាដូជាផ្នែកមួយនៃបណ្ដាញអង្គការសង្គមស៊ីវិល ដែលសហការគ្នាបង្កើតរបាយការណ៍ទាំងនេះនិងបំពងតាមប្រព័ន្ធផ្សព្វផ្សាយ។
លោក ស៊ីផាន ថ្លែងថា៖ «ថ្មីៗនេះ យើងរកឃើញសកម្មភាពនៃអង្គការមួយចំនួន ដូចជា លីកាដូ និងអង្គការអន្តរជាតិ[ផ្សេងទៀត] មានទំនាក់ទំនងល្អនឹងគ្នាទៅវិញទៅមក អំពីការប្រឌិតព័ត៌មានដែលយើងពិបាកទទួលយក។ នេះគឺជាបណ្ដាញមួយដែលកំពុងបង្កើតរបាយការណ៍ទាំងនេះ បង្កើតព័ត៌មាន និងរៀបចំរឿងរ៉ាវបន្តបន្ទាប់ ដើម្បីបំភ្លៃនិងបំផ្លើសព័ត៌មាន»។
នាយិកាអង្គការលីកាដូ អ្នកស្រី ណាលី ភីឡូហ្គ (Naly Pilorge) ប្រាប់វីអូឌីថា រដ្ឋាភិបាលគួរតែផ្ដល់តម្លៃលើទស្សនៈរបស់សង្គមស៊ីវិលជាជាងព្យាយាមបង្រ្កាបពួកគេ។
អ្នកស្រីបន្ថែមថា ក្រុមអង្គការសង្គមស៊ីវិលពិតជាមានភាពសប្បាយរីករាយនៅពេលដែលការិយាល័យសិទ្ធិមនុស្សរបស់អង្គការសហប្រជាជាតិ បានឆ្លើយតបទៅនឹងការអធិប្បាយរបស់លោក អំ សំអាត។
អ្នកស្រី ណាលី ភីឡូហ្គ ប្រាប់ថា៖ «លោក អំ សំអាត បានលះបង់ពេលវេលាស្ទើរតែមួយជីវិត ដើម្បីការពារសិទ្ធិរបស់ក្រុមងាយរងគ្រោះនៅកម្ពុជា ហើយហ៊ាននិយាយប្រឆាំងនឹងភាពអយុត្តិធម៌និងអំពើហិង្សា។ ដូចអ្នកការពារសិទ្ធិមនុស្សដទៃទៀតដែរ យើងសង្ឃឹមថា រដ្ឋាភិបាលកម្ពុជានឹងឱ្យតម្លៃទៅលើសារៈសំខាន់និងតម្លៃនៃយោបល់របស់សង្គមស៊ីវិល ជាជាងការគាបសង្កត់និងបំបាត់សំឡេងបែបនេះ»៕
អត្ថបទនេះត្រូវបានប្រែសម្រួលដោយ លោក សាំ ឧត្ដម ពីអត្ថបទដើមជាភាសាអង់គ្លេស
