ពលរដ្ឋ២នាក់នៅស្រុកបរិបូណ៍ ស្ថិតក្នុងខេត្តកំពង់ឆ្នាំង ត្រូវបានអាជ្ញាធរខេត្តពោធិ៍សាត់ចាប់ខ្លួន ក្រោយពួកគេតវ៉ាទាមទារដីធ្លីរបស់ខ្លួន ដែលពួកគេអះអាងថា អាជ្ញាធរខេត្តពោធិ៍សាត់បានរំលោភយក។
ពលរដ្ឋ២នាក់ដែលអាជ្ញាធរខេត្តចាប់ខ្លួននោះ រួមមាន លោក សឹង សារិត ហៅ តេវ អាយុ៦០ឆ្នាំរស់នៅភូមិសន្លង់ និងលោក ពឹម ចិត្រា រស់នៅភូមិក្បាលដំរី ដែលភូមិទាំងពីរស្ថិតនៅក្នុងឃុំត្រពាំងចាន់។
លោក អាន សុតេ ដែលអះអាងថា ជាកូនប្រុសលោក សឹង សារិត ប្រាប់វីអូឌីថា ឪពុករបស់លោកត្រូវសមត្ថកិច្ចខេត្តពោធិ៍សាត់ចាប់ខ្លួនកាលពីថ្ងៃទី២៨ ខែកក្កដា ក្រោយអាជ្ញាធរខេត្តនេះ បានដាក់គ្រឿងចក្រឈូសឆាយខ្ទមនិងដីស្រែ ហើយឪពុករបស់លោកចេញទៅហាមឃាត់។
អ្នកភូមិរូបនេះបានរៀបរាប់ទាំងអួលដើមកថា ឪពុកម្ដាយរបស់លោកបានទិញដីទំហំជាង៣ហិកតានៅតំបន់ចាន់ជ្វា ស្ថិតក្នុងភូមិក្បាលដំរី ឃុំអន្សាចំបក់ នៅក្នុងស្រុកក្រគរ ខេត្តពោធិ៍សាត់ ដើម្បីបង្កបង្កើនផលចិញ្ចឹមជីវិតចាប់តាំងពីឆ្នាំ១៩៩០ ដោយសារគ្រួសារលោកពុំមានដីគ្រប់គ្រាន់សម្រាប់ធ្វើស្រែក្នុងឃុំត្រពាំងចាន់ ហើយជីវភាពគ្រួសារក្រលំបាកផងនោះ។
អ្នកភូមិរូបនេះ អះអាងថា ឪពុកម្ដាយលោកបានអាស្រ័យផលលើដីនោះប្រហែល៣០ឆ្នាំមកហើយដោយគ្មានវិវាទអ្វីនោះឡើយ ប៉ុន្តែវិវាទដីធ្លីបានកើតឡើងនៅក្នុងរយៈពេលពីរបីឆ្នាំចុងក្រោយក្នុងឆ្នាំនេះ ក្រោយពីអាជ្ញាធរខេត្តពោធិ៍សាត់បានដាក់គ្រឿងចក្រទៅឈូសឆាយនិងបោះបង្គោលរំលោភយកដីរបស់លោកអស់។
លោកបន្ថែមថា៖ «ខ្ញុំសូមអំពាវនាវដល់សម្តេចជួយដល់គ្រួសារខ្ញុំផង ពីព្រោះប៉ាខ្ញុំអត់បានធ្វើអីផង គេមកចាប់។ វាអយុត្តិធម៌ពេកហើយ មកយកហើយ ចាប់មនុស្សទៀត។ ខ្ញុំសុំឱ្យជួយអន្តរាគមន៍ជួយដោះលែងប៉ាខ្ញុំ និងប្រគល់ដីឱ្យគ្រួសារខ្ញុំបានធ្វើវិញ ព្រោះអីបើខ្ញុំអត់មានដីនៅហ្នឹង គឺអត់មានដីស្រែសោះហ្មង»។
អ្នកស្រី រ័ត្ន សុខន ដែលអះអាងថាជាម្តាយលោក ពឹម ចិត្រា បាននិយាយថា កូនប្រុសអ្នកស្រីត្រូវអាជ្ញាធរខេត្តពោធិ៍សាត់ចាប់ខ្លួនកាលពីម្សិលមិញ ក្រោយពីកូនរបស់គាត់សកម្មចេញមុខតវ៉ាទាមទារដីធ្លី។
អ្នកស្រី រ័ត្ន សុខន ឱ្យដឹងថា កូនរបស់អ្នកស្រីរស់នៅភូមិក្បាលដំរី ស្ថិតនៅតំបន់ព្រំប្រទល់ខេត្តកំពង់ឆ្នាំងនិងខេត្តពោធិ៍សាត់ ដោយដីចំនួន២កន្លែងប្រហែល២ហិកតា នៅតំបន់ទូកមាសនិងតំបន់រូងក្រពើ ស្ថិតក្នុងភូមិក្បាលដំរី ក្រោមដែនរដ្ឋបាលរបស់ខេត្តពោធិ៍សាត់។
អ្នកស្រី រ័ត្ន សុខន អះអាងថា គ្រួសារអ្នកស្រីបានកាន់កាប់និងធ្វើស្រែលើដីនោះតាំងពីឆ្នាំ១៩៧៩រហូតមក ប៉ុន្តែពាក់កណ្តាលឆ្នាំ២០២០នេះ អាជ្ញាធរខេត្តពោធិ៍សាត់បានចុះមកហាមឃាត់មិនឱ្យអាស្រ័យផលទៀតឡើយ ហើយអ្នកស្រីបានតវ៉ាជំទាស់។
បើតាមអ្នកស្រី រ័ត្ន សុខន គឺមានពលរដ្ឋរាប់រយគ្រួសារនៅខេត្តកំពង់ឆ្នាំងដែលមានដីធ្លីនៅខេត្តពោធិ៍សាត់ ហើយត្រូវបានអាជ្ញាធរខេត្តនេះរឹបអូសយកទាំងបំពាន ហើយថា កន្លងមកពលរដ្ឋរាប់រយគ្រួសារទាំងនោះបានផ្ទុះការតវ៉ាដូចគ្នាដើម្បីទាមទារដីពួកគេមកវិញ។
អ្នកស្រី រ័ត្ន សុខន បន្ថែមថា៖ «ចាប់កូនខ្ញុំតែម្នាក់ឯងអ៊ីចឹង វាអត់មានភាពយុត្តិធម៌ទេ ពីព្រោះមិនមែនមានតែដីកូនខ្ញុំម្នាក់ទេ គឺពលរដ្ឋទូទាំងភូមិក្បាលដំរី មានមនុស្សរាប់ពាន់នាក់។ ឥលូវ គេចាំតែមើលថា បើសិនកូនខ្ញុំដោះស្រាយអត់ចេញទេ គេនាំគ្នាជិះទៅតវ៉ា ប៉ុន្តែមិនដឹងជាពួកគេគ្រោងទៅខាងណាទេ»។
បើតាមអ្នកស្រី រ័ត្ន សុខន គឺលោក សឹង សារិត និងលោក ពឹម ចិត្រា កំពុងត្រូវបានសមត្ថកិច្ចឃុំខ្លួននិងសាកសួរនៅស្នងការនគរបាលខេត្តពោធិ៍សាត់នៅឡើយ នារសៀលម៉ោង២ថ្ងៃនេះ។
អភិបាលរងខេត្តពោធិ៍សាត់ទទួលបន្ទុកដីធ្លី លោក ចេង ឡៃ អះអាងថា សមត្ថកិច្ចចាប់ពលរដ្ឋទាំង២នាក់នោះ ហើយកំពុងត្រៀមចាប់ខ្លួនពលរដ្ឋផ្សេងទៀត បន្ទាប់ពីពួកគេបានចូលទៅរុករានដីព្រៃច្រើនលើសលុបពេកក្នុងខេត្តពោធិ៍សាត់ និងបានដឹកនាំពលរដ្ឋត្រៀមតវ៉ាបិទផ្លូវជាតិលេខ៥ថែមទៀត។
អភិបាលរងខេត្តរូបនេះ បញ្ជាក់ថា អាជ្ញាធរខេត្តពោធិ៍សាត់រឹបអូសយកដីពលរដ្ឋកំពង់ឆ្នាំងចំពោះតែពលរដ្ឋណារុញដីថ្មីនិងច្រើនហិកតា ហើយមិនបានរស់នៅអចិន្ត្រៃយ៍ប៉ុណ្ណោះ។
លោក ចេង ឡៃ បញ្ជាក់ថា អាជ្ញាធរខេត្តបានដកដីពីពលរដ្ឋកំពង់ឆ្នាំងនិងដីក្រុមហ៊ុនភាពីម៉ិចទំហំជាង៥ពាន់ហិកតា ដើម្បីទុកបែងចែកដីសង្គមកិច្ចទៅឱ្យពលរដ្ឋខេត្តពោធិ៍សាត់នៅឃុំអន្សាចំបក់ជាង៣ពាន់គ្រួសារ ទៅតាម សជណ របស់រដ្ឋាភិបាលដែលបានចេញកាលពីឆ្នាំ២០១០។
លោក ចេង ឡៃ ប្រាប់ថា៖ «ហេតុផលចាប់ខ្លួនទី១ គឺពួកគាត់រំលោភយកដីហ្នឹងហើយ គាត់រំលោភយកដីខេត្តពោធិ៍សាត់ក្នុងបរិមាណច្រើន។ ដល់អ៊ីចឹង ដើម្បីចង់បានដីហ្នឹងច្រើន គាត់បានប្រមូលគ្នីគ្នាដើម្បីធ្វើបាតុកម្ម ហើយយើងរក្សាទុកពលរដ្ឋកំពង់ឆ្នាំងណាដែលគាត់ប្រើប្រាស់ពិតប្រាកដ រស់នៅលើដីហ្នឹងមានផ្ទះសម្បែងរហូត អត់មានធ្វើខ្ទមថ្មីៗទេ»៕
