ក្រុមស្ត្រីនិងសាច់ញាតិរបស់សកម្មជនគាំទ្របក្សប្រឆាំង បានប្រមូលផ្ដុំតវ៉ាជាថ្មីនៅមុខសាលាដំបូងរាជធានីភ្នំពេញនៅព្រឹកថ្ងៃសុក្រនេះ ដែលជាការតវ៉ា៧សប្ដាហ៍ជាប់ៗគ្នា ដើម្បីទាមទារឱ្យដោះលែងស្វាមីរបស់ពួកគេដែលកំពុងជាប់ឃុំ។
ក្រុមអ្នកតវ៉ាមានចំនួនខ្ទង់៣០នាក់ មានទាំងស្ត្រីជាភរិយានិងសាច់ញាតិរបស់សកម្មជនគាំទ្រគណបក្សសង្គ្រោះជាតិ បានប្រមូលផ្ដុំនៅមុខសាលាដំបូងរាជធានីភ្នំពេញ ដោយមានកាន់បដាដែលទាមទារឱ្យដោះលែងស្វាមីរបស់ពួកគេនិងមនុស្សមួយចំនួនសរុប១៧នាក់ ដែលត្រូវបានចាប់ខ្លួនពាក់ព័ន្ធនឹងអ្វីដែលសមត្ថកិច្ចរដ្ឋាភិបាលហៅថា «ចូលរួមក្នុងអំពើក្បត់ជាតិ» ឬក៏«ញុះញង់»។
ដូចរាល់ដងដែរ ការប្រមូលផ្ដុំតវ៉ារបស់ស្ត្រីនិងសាច់ញាតិរបស់សកម្មជនគាំទ្របក្សប្រឆាំងទាំងនោះ ត្រូវបានរារាំងដោយក្រុមសន្តិសុខខណ្ឌ៧មករា បដារបស់ពួកគេត្រូវបានដណ្ដើមយក ហើយពួកគេត្រូវបានរុញច្រានចេញពីមុខតុលាការ។
បន្ទាប់មក ក្រុមអ្នកតវ៉ាបានធ្វើដំណើរទៅដាក់ញត្តិនៅស្ថានទូតបារាំង ស្ថិតនៅម្ដុំរង្វង់មូលជ្រោយចង្វារ ដោយស្នើសុំឱ្យតំណាងប្រទេសមហាអំណាចពិភពលោកមួយនេះជួយអន្តរាគមន៍ដល់ពួកគេ។
អ្នកស្រី សេង ចាន់ថន ដែលជាភរិយារបស់លោក ស៊ុន ធន់ អតីតសមាជិកក្រុមប្រឹក្សាខេត្តកំពង់ធំរបស់បក្សប្រឆាំង ប្រាប់វីអូឌីមុខស្ថានទូតបារាំងថា ស្វាមីរបស់អ្នកស្រីមិនបានប្រព្រឹត្តកំហុសដូចការចោទប្រកាន់ឡើយ។
អ្នកស្រី សេង ចាន់ថន ប្រាប់ថា៖ «អ៊ីចឹង ការចោទប្រកាន់នេះ គឺលេសនយោបាយរបស់គេទេ។ គេចោទប្រកាន់ប្តីខ្ញុំយ៉ាងអយុត្តិធម៌បំផុត។ ប្តីខ្ញុំមិនបានធ្វើសកម្មភាពអ្វីទាំងអស់ ពីព្រោះខ្ញុំជាភរិយារបស់គាត់ ខ្ញុំដឹងពីសកម្មភាពគាត់។ មានតែពួកអស់លោកទេអត់ដឹងថាប្តីខ្ញុំទៅណាធ្វើអី ហើយចេះតែចោទប្រកាន់គ្រួសារខ្ញុំ»។
អ្នកស្រី សុខ បូលីម៉ា ដែលជាភរិយារបស់លោក ឃឹម ភាណា អតីតចៅសង្កាត់គណបក្សសង្គ្រោះជាតិដេប៉ូ៣ និយាយថា ស្វាមីគាត់ត្រូវបានសមត្ថកិច្ចចាប់ខ្លួនកាលពីថ្ងៃទី៤ ខែមេសា ក្រោមការចោទថា«ចូលរួមក្នុងអំពើក្បត់ជាតិ»ដូចសកម្មជនផ្សេងៗទៀតដែរ។
ស្ត្រីរូបនេះឱ្យដឹងថា ពួកគាត់ធ្វើយុទ្ធនាការតវ៉ាសុំដោះលែងស្វាមីនៅរៀងរាល់ថ្ងៃសុក្រនិងបានធ្វើយុទ្ធនាការនេះរយៈពេល៧សប្តាហ៍ហើយ។
អ្នកស្រីបន្ថែមថា៖ «ការតវ៉ានេះ សន្តិសុខបានបង្ក្រាបពួកខ្ញុំ ដែលខ្ញុំជាស្ត្រីជាជនរងគ្រោះដៃទទេអត់មានអី។ គាត់ច្រានពួកខ្ញុំដួលទីងណាត់ទីងណែង។ ទង្វើហ្នឹង គឺជាទង្វើអមនុស្សធម៌ដែលខ្ញុំមិនអាចទទួលយកបានទេ»។
ក្រោយអ្នកតវ៉ាមកដល់មុខស្ថានទូតបារាំង គឺមន្ត្រីស្ថានទូតបានហៅតំណាងអ្នកតវ៉ាចំនួន៦នាក់ចូលទៅក្នុងស្ថានទូត។ បើតាមអ្នកស្រី សេង ចាន់ថន មន្ត្រីស្ថានទូតបារាំងបានទទួលញត្តិពីពួកគាត់ ហើយមន្ត្រីស្ថានទូតប្រាប់ថា ពួកគេនឹងពិភាក្សាគ្នាលើសំណើរបស់ពួកគាត់។
អ្នកនាំពាក្យសមាគមការពារសិទ្ធិមនុស្សអាដហុក លោក ស៊ឹង សែនករុណា បានចាត់ទុកសកម្មភាពរបស់ក្រុមសន្តិសុខនិងសមត្ថកិច្ចខណ្ឌ៧មករាថា ជាការរំលោភសិទ្ធិសម្ដែងមតិដោយសន្តិវិធី ដែលចែងក្នុងច្បាប់ជាតិនិងអន្តរជាតិផងដែរ។
លោក ស៊ឹង សែនករុណា ប្រាប់ថា៖ «អ៊ីចឹងហើយសកម្មភាពទាំងនេះ វាជាការរំលោភទៅលើសិទ្ធិ ទៅលើការសម្តែងមតិរបស់ប្រជាពលរដ្ឋដែលមានសិទ្ធិសម្តែងមតិ ដើម្បីឱ្យសាធារណជនបានដឹងអំពីអ្វីដែលជាការសំណូមពរនិងការទាមទាររបស់ពួកគាត់»។
វីអូឌីមិនអាចសុំការឆ្លើយបញ្ជាក់ពីអភិបាលខណ្ឌ៧មករា លោក លឹម សុភា បានទេ ដោយទូរសព្ទចូលច្រើនដងគ្មានអ្នកទទួល។
ប៉ុន្តែបុរសម្នាក់ស្លៀកពាក់ស៊ីវិលដៃកាន់វិទ្យុទាក់ទង ដែលបញ្ជាទៅក្រុមសន្តិសុខខណ្ឌ៧មករាឱ្យចាប់យកបដាពីអ្នកតវ៉ា ដែលមិនប្រាប់ឈ្មោះ បាននិយាយថា អាជ្ញាធរមិនឱ្យពលរដ្ឋលើកបដានិងស្រែកតវ៉ា គឺដើម្បីរក្សាសណ្តាប់ធ្លាប់មុខតុលាការ។
បុរសរូបនោះបន្ថែមថា៖ «កន្លែងគេធ្វើការ យើងធ្វើអ៊ីចឹង វារំខានដល់គេធ្វើការ។ អ៊ីចឹង យើងត្រូវតែរក្សាសណ្តាប់ធ្លាប់នៅទីនេះ»។
បើតាមអ្នកស្រី សុខ បូលីម៉ា គឺពួកគាត់បានដាក់ញត្តិនៅស្ថានទូតតំណាងឱ្យប្រទេសមហាអំណាចធំៗ មានសហរដ្ឋអាមេរិក សហភាពអឺរ៉ុប អង់គ្លេស អូស្ត្រាលី និងជប៉ុនជាដើម៕