វៀតណាមបានរកឃើញអ្នកមានកូវីដ១៩ចំនួន៤៥ករណីថ្មីទៀតនៅទីក្រុងដាណាង ដែលធ្វើឱ្យចំនួនអ្នកឆ្លងសរុបនៅក្នុងប្រទេសនេះកើនឡើងដល់ ៥៩០ករណី។
ក្រសួងសុខាភិបាលរបស់វៀតណាមបានបញ្ជាក់ថា ករណីវិជ្ជមានថ្មីនេះត្រូវបានរកឃើញពាក់ព័ន្ធនឹងមន្ទីរពេទ្យ មណ្ឌលសុខភាព និងសណ្ឋាគារដែលដាក់អ្នកជំងឺនៅក្នុងទីក្រុងដាណាង។
ប្រភពពីកាសែតក្នុងស្រុកមួយបានបង្ហាញថា អ្នកជំងឺដែលមានអាយុពីចន្លោះ២៧ទៅ៨៧ឆ្នាំចំនួន៣៣នាក់ ត្រូវបានរកឃើញវិជ្ជមានកូវីដ១៩ក្នុងមន្ទីរពេទ្យក្រុងដាណាង ក្នុងនោះមាន៤នាក់ត្រូវបានរកឃើញនៅកន្លែងពិនិត្យជំងឺសួត ២នាក់រកឃើញនៅកន្លែងពិនិត្យជំងឺមហារីក និងអ្នកជំងឺ៤នាក់ផ្សេងទៀតរកឃើញនៅកន្លែងដាក់អ្នកជំងឺតម្រងនោម។ ក្នុងចំណោមករណីថ្មីទាំងនេះមានអ្នកជំងឺចំនួន៩នាក់ ត្រូវបានអះអាងថា ជាសមាជិកគ្រួសារនៃអ្នកជំងឺដែលស្នាក់នៅក្នុងមន្ទីរពេទ្យក្នុងទីក្រុងដាណាង។
ប្រភពដដែលបានបញ្ជាក់ថា មានអ្នកជំងឺកូវីដ១ករណីរកឃើញនៅក្នុងមណ្ឌលសុខភាពក្នុងស្រុកកាឡៃ។
ក្រៅពីនេះ ៤ករណីទៀតត្រូវបានរកឃើញបន្ថែមពីក្នុងសណ្ឋាគារដែលដាក់ឱ្យនៅដាច់ដោយឡែក។
ករណីថ្មីៗនេះកើតឡើងស្របពេលដែលមន្ត្រីវៀតណាមទូទាំងប្រទេស ចាប់ផ្តើមរឹតត្បិតនូវសកម្មភាពផ្សេងៗរបស់ប្រជាពលរដ្ឋដើម្បីបង្ការការឆ្លងរីករាលដាលនៃជំងឺ។
យោងតាមប្រព័ន្ធផ្សព្វផ្សាយ Madison បានឱ្យដឹងថា បន្ទាប់ពីចំនួនអ្នកឆ្លងជំងឺកូវីដ១៩មានការកើនឡើងក្នុងសហគមន៍ ទីក្រុងដាណាងបានចាប់ផ្តើមបង្កើតមន្ទីរពេទ្យបណ្តោះអាសន្នមួយក្នុងសាលមហោស្របកីឡានិងប្រមូលក្រុមគ្រូពេទ្យមកពីគ្រប់ទីក្រុងដើម្បីទប់ស្កាត់។
ទីក្រុងធំរបស់វៀតណាមដូចជា ហាណូយនិងហូជីមិញ ត្រូវបានបញ្ជាឱ្យមានការបិទរង្គសាលនិងពន្យារពេលការជួបជុំធំៗផ្សេងៗ ស្របពេលជាមួយគ្នានេះដែរ អាជ្ញាធរទីក្រុងហាណូយក៏កំពុងធ្វើតេស្តរកវីរុសកូវីដ១៩លើមនុស្សជាង២១ ០០០នាក់ដែលវិលត្រឡប់មកទីក្រុងដាណាងវិញ។
គួរបញ្ជាក់ផងដែរថា ការរកឃើញចំនួនអ្នកឆ្លង៤៥ករណីថ្មីនេះ ជាចំនួនមួយដ៏ធំបំផុតនៃការឆ្លងក្នុងសហគមន៏ក្នុងប្រទេសវៀតណាម រាប់ចាប់តាំងពីមានករណីដំបូងក្នុងតំបន់ត្រូវបានគេរកឃើញលើខ្លួនបុរសជនជាតិវៀតណាម វ័យ៥៧ឆ្នាំម្នាក់ក្នុងទីក្រុងដាណាង។ ការឆ្លងថ្មីនេះធ្វើឱ្យចំនួនករណីវិជ្ជមានក្នុងប្រទេសវៀតណាមមានការកើនឡើងចំនួន៩៣នាក់បន្ថែម ចាប់តាំងពីជំងឺនេះបានផ្ទុះឡើងវិញកាលពីថ្ងៃសៅរ៍សប្តាហ៍មុន៕