អាជ្ញាធរខេត្តព្រះសីហនុបានបញ្ជាក់ថាសមត្ថកិច្ចបានជួយសង្រ្គោះភ្ញៀវជិះទូកទេសចរណ៍ ដែលលិចនៅកោះរ៉ុងនារសៀលបានទាំងអស់។
អ្នកនាំពាក្យខេត្តព្រះសីហនុ លោក ឃាង ភារម្យ បានប្រាប់វីអូឌីថាអ្នកទេសចរទាំង១៥ នាក់ក្នុងនោះមានស្រី៨នាក់ ត្រូវបានសមត្ថកិច្ចសង្រ្គោះជីវិតបានទាំងអស់។ លោកបានបន្ថែមថាសមត្ថកិច្ចកំពុងបញ្ជូនអ្នកទាំងនោះទៅកាន់មន្ទីរពេទ្យ ដោយថាមិនមានជនរងគ្រោះណាម្នាក់ មានបញ្ហាធ្ងន់ធ្ងរនោះទេ។ បើតាមអ្នកនាំពាក្យរូបនេះទូកទេសចរណ៍នេះលិចដោយសារតែ បញ្ហាអាកាសធាតុ។
អភិបាលខេត្តព្រះសីហនុ លោក គួច ចំរើន បានបញ្ជាក់បន្ថែមថាទូកនោះបានលិចនៅ ម៉ោង ប្រមាណ៤រសៀលថ្ងៃទី១ ខែសីហានេះ៕
រាយការណ៍បន្ថែមដោយ៖ សាំ ឧត្តម
