ក្រសួងសុខាភិបាលបានបញ្ជាក់ថាគិតត្រឹមថ្ងៃម្សិលមិញ ករណីជំងឺគ្រុនឈីកនៅទូទាំងប្រទេស កម្ពុជាសរុបមានចំនួន១០២០ករណីដែលកើតមានក្នុងខេត្តចំនួន១២។
យោងតាមសេចក្តីជូនព័ត៌មានរបស់ក្រសួងសុខាភិបាលដែលចេញនៅថ្ងៃទី១ ខែសីហា ករណី ជំងឺនេះត្រូវបានរកឃើញមានក្នុងនោះខេត្តសៀមរាប បន្ទាយមានជ័យ ព្រះវិហារ និងកំពង់ចាម ភាគច្រើនជាងគេពោលគឺមានជាង៨០ភាគរយក្នុងចំណោមករណីទាំងអស់។ ដោយឡែកខេត្តឧត្តរមានជ័យ តាកែវ ពោធិ៍សាត់ ស្ទឹងត្រែង បៃលិន ត្បូងឃ្មុំ កំពត និងខេត្តព្រះសីហនុមានប្រមាណជិត២០ភាគរយ។
រដ្ឋមន្រ្តីក្រសួងសុខាភិបាលត្រូវបានដកស្រង់សម្តីមកចុះផ្សាយក្នុងសេចក្តីជូនព័ត៌មាននោះថា៖«ការទប់ស្កាត់ និងការពារជំងឺគ្រុនឈីកនេះ គឺវាដូចទៅនឹងជំងឺគ្រុនឈាមដែរ ដោយផ្អែកទៅលើការការពារកុំឱ្យមូសខ្លាញីខាំ តាមរយៈការលុបបំបាត់វត្ថុដក់ទឹក ដែលជាជម្រកនៃការកកើតសត្វមូសនេះ»។
ខិតបណ្ណរបស់ក្រសួងសុខាភិបាលដែលចេញផ្សាយកាលពីខែមិថុនា ឆ្នាំ២០១៦ បង្ហាញថា ជំងឺគ្រុនឈីកកើតឡើងដោយសារមូសខ្លាខាំ ដែលធ្វើឱ្យអ្នកជំងឺគ្រុនក្តៅពី ៣៩ ទៅ ៤០អង្សាសេ។ អ្នកជំងឺគ្រុនឈីកមានស្នាមកន្ទួលក្រហមលើស្បែក អ្នកជំងឺអាចខ្សោះជាតិទឹកដោយសារក្អួត ហើយសាច់ដុំចុះខ្សោយ ហើមប្រអប់ដៃប្រអប់ជើង ឈឺសន្លាក់ម្រាមដៃម្រាមជើង ឈឺក្បាលខ្លាំង ឈឺចង្កេះ អស់កម្លាំងខ្លាំងជាដើម។ គ្រុនឈីក អាចឱ្យអ្នកជំងឺឈឺរយៈពេលពី ៥ថ្ងៃ ទៅ ១សប្ដាហ៍ ទើបជាសះស្បើយ៕