គណៈមេធាវីនៃទីក្រុងហុងកុងបាននិយាយថា ការសម្រេចចិត្តលើកថ្ងៃបោះឆ្នោតរបស់រដ្ឋាភិបាលក្រុងហុងកុងសម្រាប់នីតិកាលនេះ អាចចាត់ទុកថាជាអំពើខុសច្បាប់។
តាមការចុះផ្សាយរបស់ទីភ្នាក់ងារព័ត៌មានរ៉យទ័រ លោកស្រី Carrie Lam ប្រមុខរដ្ឋាភិបាលទីក្រុងហុងកុង កាលពីថ្ងៃសុក្រសប្តាហ៍មុន បានពន្យារពេលបោះឆ្នោតក្រុមប្រឹក្សាសភាក្រុងទៅឆ្នាំក្រោយវិញ ដោយលើកឡើងពីផលប៉ះពាល់នៃជំងឺកូវីដ១៩នៅក្នុងទីក្រុង ក៏ប៉ុន្តែការអះអាងនេះត្រូវបានក្រុមអ្នកប្រឆាំងថា ធ្វើឡើងក្រោមហេតុផលនយោបាយ។
ប្រភពដដែលបានឱ្យដឹងថា ការបោះឆ្នោតនីតិកាលនេះគឺជាការបោះឆ្នោតដំបូងជាផ្លូវការរបស់ទីក្រុងហុងកុង ចាប់តាំងពីទីក្រុងប៉េកាំងបានដាក់ចេញច្បាប់សន្តិសុខថ្មីដើម្បីដោះស្រាយនូវបញ្ហាមួយចំនួនដែលរដ្ឋាភិបាលចិនមើលឃើញថាកំពុងកើតមាននៅហុងកុងក្នុងនោះរួមមានចលនាផ្តាច់ខ្លួន ការបង្កើតភាពវឹកវរ អំពើភេរវកម្ម និងការឃុបឃិតខុសច្បាប់ជាមួយជនបរទេស។
គួរបញ្ជាក់ថា ច្បាប់ទីក្រុងហុងកុងដែលស្ថិតនៅក្រោមអាណានិគមអង់គ្លេស បានផ្តល់អំណាចខ្លាំងឱ្យរដ្ឋាភិបាលក្នុងការសម្រេចចិត្តពន្យរពេលបោះឆ្នោតនៅក្នុងករណីមានការគំរាមកំហែងដល់សុវត្ថិភាពសាធារណៈ។ ប៉ុន្តែពេលបច្ចុប្បន្ន ច្បាប់បោះឆ្នោតនៃទីក្រុងនេះត្រូវបានផ្លាស់ប្តូរដោយអនុញ្ញាតឱ្យមានការពន្យារពេលបោះឆ្នោតត្រឹម១៤ថ្ងៃ។
ក្នុងសេចក្តីថ្លែងការណ៍មួយដែលចេញកាលពីថ្ងៃអាទិត្យ គណៈមេធាវីនៃទីក្រុងហុងកុងបាននិយាយថា ច្បាប់បោះឆ្នោតនាពេលបច្ចុប្បន្នមានលក្ខណៈថ្មីនិងច្បាស់លាស់ជាងមុន នៅពេលដែលមានគ្រោះថ្នាក់ដល់សុខភាពសាធារណៈណាមួយកើតឡើងក្នុងអំឡុងពេលបោះឆ្នោត ដែលជាទូទៅច្បាប់ថ្មីគួរដាក់ឱ្យប្រើប្រាស់ជំនួសច្បាប់ចាស់។
សេចក្តីថ្លែងការណ៍ដដែលបានបញ្ជាក់ថា ការពន្យារពេលបោះឆ្នោតដោយអាសន្នបែបនេះ អាចនឹងជាអំពើខុសច្បាប់។
ការពន្យារពេលនេះត្រូវបានប្រកាសបន្ទាប់ពីបេក្ខជនដែលគាំទ្រលទ្ធិប្រជាធិបតេយ្យចំនួន១២រូប ត្រូវបានដកហូតសិទ្ធក្នុងការឈរឈ្មោះបោះឆ្នោត ដោយចោទថា ពួកគេមានចេតនាបំភិតបំភ័យនិងប្រឆាំងច្បាប់សន្តិសុខ។ ក្រុមប្រឆាំងដែលគាំទ្រលទ្ធិប្រជាធិបតេយ្យសង្ឈឹមថា ពួកគេនឹងទទួលបានសំឡេងឆ្នោតច្រើនជាប្រវត្តិសាស្ត្រ បន្ទាប់ពីទទួលបានការគាំទ្រយ៉ាងច្រើនក្នុងការបោះឆ្នោតក្រុមប្រឹក្សាសង្កាត់កាលពីឆ្នាំមុន។
លោកស្រី Carrie Lam បាននិយាយថា រដ្ឋាភិបាលទីក្រុងហុងកុងកំពុងស្វែងរកជំនួយពីសភាជាន់ខ្ពស់របស់ចិន ដើម្បីកែប្រែចំណុចខ្វះខាតដែលបង្កឡើងដោយសភាផុតអាណត្តិ។
រដ្ឋមន្ត្រីក្រសួងការបរទេសអាមេរិក លោក Mike Pompeo បាននិយាយថា៖ «ហុងកុងទំនងមិនអាចមានការបោះឆ្នោតសារជាថ្មីម្តងទៀតសម្រាប់អ្នកណាមួយទៀតបាននោះទេ»។
កាលពីថ្ងៃព្រហស្បតិ៍ ប្រធានាធិបតីសហរដ្ឋអាមេរិក លោក Donald Trump ក៏បាននិយាយពីលទ្ធភាពនៃការពន្យារពេលបោះឆ្នោតជ្រើសតាំងប្រធានាធិបតីនៅថ្ងៃទី៣ ខែវិច្ឆិកាខាងមុខដែរ ប៉ុន្តែរដ្ឋធម្មនុញ្ញបានផ្តល់អំណាចនោះដល់សភា មិនមែនប្រធានាធិបតីនោះទេ៕
