ក្រសួងសុខាភិបាល បានអះអាងថា មានអ្នកជំងឺកូវីដ១៩ជាស្ត្រីខ្មែរម្នាក់ដែលត្រឡប់មកពីក្រៅប្រទេស បានព្យាបាលជាសះស្បើយ និងមិនមានអ្នកឆ្លងថ្មីឡើយ។
យោងតាមសេចក្ដីប្រកាសព័ត៌មានរបស់ក្រសួងសុខាភិបាលបានបញ្ជាក់នៅថ្ងៃទី៣ ខែសីហា ថាស្រ្តីជនជាតិខ្មែរ អាយុ៣៨ឆ្នាំ ដែលជាសះស្បើយនោះ ជាអ្នកធ្វើដំណើរមកពីប្រទេសឥណ្ឌូនេស៊ី។
ក្រសួងបានបន្តថា ស្រ្តីរូបនោះត្រូវបានក្រសួងអនុញ្ញាតឱ្យចេញពីមណ្ឌលសុខភាពចាក់អង្រែ រាជធានីភ្នំពេញ កាលពីថ្ងៃទី២ ខែសីហា ក្រោយពីទទួលបានលទ្ធផលតេស្ដអវិជ្ជមានវីរុសកូវីដ១៩ ចំនួន២ដង។
បើតាមសេចក្តីប្រកាសព័ត៌មានរបស់ក្រសួង គិតមកត្រឹមព្រឹកថ្ងៃទី៣ ខែសីហានេះ កម្ពុជាបានតេស្តរកឃើញអ្នកឆ្លងជំងឺកូវីដ១៩ សរុបចំនួន២៤០នាក់ ក្នុងនោះមានអ្នកជាសះស្បើយ១៩៧នាក់ ខណៈអ្នកដែលកំពុងសម្រាកព្យាបាលក្នុងមន្ទីរពេទ្យរដ្ឋមានចំនួន៤១នាក់ និងកំពុងសម្រាកព្យាបាលនៅបន្ទប់ដាច់ដោយឡែកក្នុងស្ថានទូតអាមេរិកប្រចាំនៅកម្ពុជាចំនួន២នាក់។
កាលពីថ្ងៃទី២ ខែសីហា លោកនាយករដ្ឋមន្ត្រី ហ៊ុន សែន ក៏បានអំពាវនាវជាថ្មីដល់ប្រជាពលរដ្ឋទាំងអស់ត្រូវថែរក្សាសុខភាពនិងការពារកុំឱ្យឆ្លងជំងឺកូវីដ១៩ ខណៈដែលជំងឺឆ្លងនេះនៅមិនទាន់មានថ្នាំព្យាបាលនៅឡើយ៕
