រដ្ឋបាលខេត្តព្រះសីហនុ បានអំពាវនាវដល់ប្រជាពលរដ្ឋបង្កើនការប្រុងប្រយ័ត្ននិងផ្អាកការធ្វើដំណើរតាមផ្លូវទឹកក្នុងករណីមិនចាំបាច់ ដោយសារបញ្ហាអាកាសធាតុមិនអំណោយផល។
ការអំពាវនាវនេះបានធ្វើឡើងក្រោយពីមានករណីទូកឈើដឹកអ្នកទេសចរមួយគ្រឿងបានលិច កាលពីរសៀលថ្ងៃទី១ ខែសីហា ដោយសារបញ្ហាអាកាសធាតុ ប៉ុន្តែពុំបណ្តាលឱ្យមានមនុស្សរងគ្រោះថ្នាក់ដោយសារហេតុការណ៍នេះទេ។
យោងតាមសេចក្ដីជូនដំណឹងរបស់រដ្ឋបាលខេត្តព្រះសីហនុ ចុះថ្ងៃទី០១ ខែកក្កដា ឆ្នាំ២០២០ បានឱ្យដឹងថា ចាប់ពីថ្ងៃទី៣១ ខែកក្កដា កម្ពុជាបានរងនូវវិសម្ពាធទាបមួយដែលវិវត្តទៅជាព្យុះឈ្មោះ ស៊ីនឡាគូ (SINLAKU) ហើយបានបោកបក់មកកាន់តំបន់ភ្នំនិងតំបន់មាត់សមុទ្រ។ រដ្ឋបាលខេត្តបន្តថា ស្ថានភាពនេះអាចនឹងធ្វើឱ្យខេត្តព្រះសីហនុមានភ្លៀងធ្លាក់ច្រើននិងប្រឈមនឹងជំនន់ទឹកភ្លៀង រួមជាមួយនឹងខ្យល់បក់ខ្លាំងនិងរលកសមុទ្រខ្ពស់ៗ ចាប់ពីថ្ងៃទី១ដល់ថ្ងៃទី៥ ខែសីហានេះ។
ករណីនេះ រដ្ឋបាលខេត្តបានអំពាវនាវដល់ក្រុមហ៊ុនដឹកជញ្ជូនដោយជលយាន ប្រជាពលរដ្ឋ ប្រជានេសាទ និងភ្ញៀវទេសចរនានា ឱ្យមានការប្រុងប្រយ័ត្នខ្ពស់ឬផ្អាកការធ្វើដំណើរតាមផ្លូវទឹកក្នុងករណីមិនចាំបាច់ ដើម្បីធានាបាននូវសុវត្ថិភាពនិងចៀសវាងគ្រោះថ្នាក់ផ្សេងៗជាយថាហេតុ។
រដ្ឋបាលខេត្តក៏បានណែនាំដល់អាជ្ញាធរមូលដ្ឋាននិងសមត្ថកិច្ចពាក់ព័ន្ធបន្តយកចិត្តទុកដាក់តាមដានស្ថានភាពអាកាសធាតុនិងអប់រំផ្សព្វផ្សាយដល់ប្រជាពលរដ្ឋ ជាពិសេសត្រៀមអន្តរាគមន៍ជួយដោះស្រាយបញ្ហានានាផងដែរ៕