ពលរដ្ឋអះអាងថា ប្រជាសហគមន៍ខ្ទង់២០នាក់ នៅស្រុកតំបែរ ខេត្តត្បូងឃ្មុំ ត្រូវបានអាជ្ញាធរចាប់ខ្លួននៅព្រឹកថ្ងៃនេះ នៅពេលចុះអនុវត្តដីការក្សាការពារដីធ្លីជូនក្រុមហ៊ុនចិន ហាម៉ឹនី វីន អ៊ិនវេសមេន ស្ថិតក្នុងភូមិស្រែប្រាំង ឃុំត្រពាំងព្រីង។
លោក ថា លីដា ដែលកំពុងរត់គេចខ្លួនដោយសារបារម្ភខ្លាចសមត្ថកិច្ចចាប់ខ្លួន ប្រាប់វីអូឌីថា អ្នកភូមិប្រហែល២០នាក់ដែលកំពុងមានជម្លោះដីធ្លីជាមួយក្រុមហ៊ុនចិន ស្ថិតក្នុងភូមិស្រែប្រាំងនិងភូមិបុស្សស្នោរ ត្រូវបានសមត្ថកិច្ចចាប់ខ្លួនក្រោយពីចេញមុខតវ៉ាប្រឆាំងនឹងគ្រឿងចក្ររបស់ក្រុមហ៊ុនចូលឈូសឆាយដីធ្លីស្រែចម្ការរបស់ពួកគេ។
ពលរដ្ឋរូបនេះ ឱ្យដឹងថា អាជ្ញាធរខេត្តត្បូងឃ្មុំ នៅព្រឹកថ្ងៃនេះ បានដាក់ពង្រាយកម្លាំងសមត្ថកិច្ចប្រហែល៥០០នាក់ រួមមាន នគរបាល កម្លាំងអាវុធហត្ថ និងអាជ្ញាធរស្រុក ដែលប្រដាប់ដោយកាំភ្លើង ដំបងឆក់ និងខ្នោះដៃ ចូលទៅតាមភូមិ ដើម្បីការពារគ្រឿងចក្ររបស់ក្រុមហ៊ុនដែលចុះកាយផ្តាច់ផ្លូវចេញចូលសហគមន៍និងឈូសឆាយខ្ទម រួមទាំងផលដំណាំរបស់ពួកគេ។
លោក ថា លីដា បន្ថែមថា៖ «ពួកខ្ញុំ គេតាមចាប់ដែរ ដោយសារតែឥលូវហ្នឹង ខាងសន្តិសុខភូមិបានដើរចង្អុលផ្ទះអ្នកដែលមានឈ្មោះតវ៉ាដីធ្លីប្រាប់ទៅខាងកម្លាំងសមត្ថកិច្ច ហើយព្រឹកមិញនេះសមត្ថកិច្ចបានចូលចាប់ពលរដ្ឋដល់លើផ្ទះពួកគាត់តែម្តង។ រឿងនេះវាអយុត្តិធម៌ខ្លាំងសម្រាប់ប្រជាពលរដ្ឋ គេរំលោភយកដីធ្លីហើយ គេចាប់ម្ចាស់ដីទៀត។ ខ្ញុំសូមអំពាវនាវដល់សម្តេច ហ៊ុន សែន ជួយដោះស្រាយនិងអន្តរាគមន៍ដោះលែងអ្នកដែលត្រូវចាប់ខ្លួននោះផង»។
អធិការនគរបាលស្រុកតំបែរ លោក ប៉េង អេងហាក់ បដិសេធបកស្រាយអំពីការចាប់ខ្លួនពលរដ្ឋនេះ ហើយបានរុញឱ្យសាកសួរទៅរដ្ឋបាលសាលាខេត្តត្បូងឃ្មុំវិញ។
នាយករដ្ឋបាលសាលាខេត្តត្បូងឃ្មុំ លោក ម៉ៅ ឌុង បានទទួលស្គាល់ពីការចាប់ខ្លួនពលរដ្ឋទាំងនោះ ប៉ុន្តែលោកមិនអាចបញ្ជាក់បានថាមានចំនួនប៉ុន្មាននាក់ពិតប្រាកដនោះឡើយ។ មន្ត្រីសាលាខេត្តរូបនេះ អះអាងថា ការចាប់ខ្លួនបានកើតឡើងដោយសារពលរដ្ឋទាំងនោះបានរារាំងការចុះអនុវត្តដីការក្សាការពារដីក្រុមហ៊ុន ដើម្បីបណ្តេញចេញពលរដ្ឋដែលលោកថាបានរស់នៅលើដីក្រុមហ៊ុនដែលមានប័ណ្ណកម្មសិទ្ធិត្រឹមត្រូវ។
លោក ម៉ៅ ឌុង បញ្ជាក់ថា ពលរដ្ឋទាំងនោះត្រូវបានបញ្ជូនទៅសាកសួរតាមនីតិវិធីនៅអធិការដ្ឋាននគរបាលស្រុកតំបែរ។ លោកថា បើពលរដ្ឋណាមិនជាប់ពាក់ព័ន្ធនឹងដីកាចាប់ខ្លួនទេ នឹងត្រូវដោះលែងវិញ ប៉ុន្តែចំពោះពលរដ្ឋដែលមានដីកាចាប់ខ្លួន សមត្ថកិច្ចនឹងបញ្ជូនខ្លួនទៅតុលាការចាត់វិធានការតាមនីតិវិធីច្បាប់។
លោក ម៉ៅ ឌុង បន្ថែមថា៖ «ពលរដ្ឋប៉ុន្មានហ្នឹងគឺគេឃាត់ខ្លួនមែន ឃាត់ខ្លួនដើម្បីយកទៅសួរនាំ។ ជាធម្មតាទេ ពេលគេចុះអនុវត្តអ៊ីចឹង បើអ្នកតវ៉ាមានការប្រឆាំងនឹងមន្ត្រីរាជការ គឺចាប់សិនហើយ។ មិនមែនគាត់មានកំហុសអីទេ តែគេចាប់នេះដោយសាររារាំងការចុះអនុវត្ត»។
មន្ត្រីអង្កេតនៃសមាគមការពារសិទ្ធិមនុស្សប្រចាំខេត្តត្បូងឃ្មុំ លោក ឡេង សេងហាន បានឱ្យដឹងថា លោកទទួលបានដំណឹងពីប្រជាពលរដ្ឋដែលប្រាប់លោកថា មានអ្នកភូមិ២១នាក់ត្រូវបានសមត្ថកិច្ចចាប់ខ្លួន ហើយមិនទាន់ត្រូវបានដោះលែងនៅឡើយទេនៅត្រឹមម៉ោង៥រសៀលថ្ងៃនេះ។ ប៉ុន្តែលោក សេងហាន ប្រាប់ថា លោកមិនទាន់បានចុះអង្កេតដោយផ្ទាល់នៅឡើយទេអំពីករណីនេះ ដោយប្រាប់ថារវល់។
ស្ត្រីម្នាក់ដែលអះអាងថាជាតំណាងក្រុមហ៊ុន ហាម៉ឹនី វីន អ៊ីនវេសមេន ប៉ុន្តែបានបដិសេធប្រាប់ឈ្មោះជាក់លាក់នោះ បានចោទពលរដ្ឋថា តែងតែប្រើអំពើហិង្សាលើកម្មករនិងបំផ្លិចបំផ្លាញទ្រព្យសម្បត្តិរបស់ក្រុមហ៊ុននាពេលកន្លងមក។ ស្ត្រីរូបនេះចោទពលរដ្ឋទៀតថា បានកាន់កាប់ដីក្រុមហ៊ុនដោយខុសច្បាប់ ហើយក្រុមហ៊ុនក៏បានប្ដឹងទៅតុលាការផងដែរ ប៉ុន្តែអ្នកស្រីមិនចាំចំនួនពលរដ្ឋពិតប្រាកដដែលក្រុមហ៊ុនបានប្ដឹងនោះឡើយ។
អ្នកស្រីបន្ថែមថា៖ «គាត់[ពលរដ្ឋតវ៉ា]បានយកចម្ពាមទៅបាញ់បំផ្លាញគ្រឿងចក្ររបស់ក្រុមហ៊ុន ហើយគាត់បាននាំគ្នាទៅវាយសន្តិសុខរបស់ក្រុមហ៊ុនហ្នឹង គឺគេមានភស្តុតាងបានប្តឹងទៅតុលាការ ហើយក្រុមហ៊ុនបានប្តឹងពលរដ្ឋហ្នឹងច្រើននាក់ដែរ។ អ៊ីចឹងសុំឱ្យទៅមើលផ្ទាល់ ហើយចុះព័ត៌មានឱ្យពិតប្រាកដ ដើម្បីផ្តល់យុត្តិធម៌ដល់អ្នករងគ្រោះពិតប្រាកដ»។
កាលពីឆ្នាំមុន ក្រសួងរៀបចំដែនដីបានទទួលស្គាល់ថា ដីទំហំ៤២,១៧០ហិកតា ស្ថិតក្នុងភូមិស្រែប្រាំង បុស្សស្នោរ និងភូមិត្រពាំងព្រីង នៅស្រុកតំបែរ ជាកម្មសិទ្ធិរបស់ក្រុមហ៊ុន ហាម៉ឹនី វីន អ៊ិនវេសមេន ហើយក្រុមហ៊ុនចិនមួយនេះបានដោះស្រាយផលប៉ះពាល់ជូនពលរដ្ឋរួចរាល់ហើយ។ ក្រសួងបញ្ជាក់ថា មន្ទីររៀបចំដែនដីខេត្តក៏បានចុះបញ្ជីដីធ្លីជូនក្រុមហ៊ុនរួចរាល់ហើយដែរ។
នាយករងអង្គការលីកាដូ លោក អំ សំអាត ដែលទទួលបន្ទុកផ្នែកឃ្លាំមើលសិទ្ធិមនុស្ស ប្រាប់ថា មួយរយៈពេលចុងក្រោយនេះ លោកសង្កេតឃើញសកម្មភាពអាជ្ញាធរចាប់ខ្លួននិងចោទប្រកាន់ពលរដ្ឋដោយសារជម្លោះដីធ្លី ហាក់មានការកើនឡើង។
អ្នកសិទ្ធិមនុស្សរូបនេះបន្តថា សង្គមស៊ីវិលចង់ឃើញរដ្ឋាភិបាលដោះស្រាយបញ្ហាដីធ្លីជូនប្រជាពលរដ្ឋប្រកបដោយតម្លាភាព មានយុត្តិធម៌ និងចំឫសគល់នៃបញ្ហា ជាជាងចាប់ប្រជាពលរដ្ឋដាក់ពន្ធនាគារ ដែលអាចនាំឱ្យបញ្ហានេះកាន់តែធំនិងកើតឡើងកាន់តែខ្លាំងនៅពេលខាងមុខ។
លោក អំ សំអាត ប្រាប់ថា៖ «រដ្ឋាភិបាលត្រូវដោះស្រាយដោយសន្តិវិធីដែលអាចទទួលយកបានទាំងអស់គ្នា។ អ៊ីចឹងឫសគល់ដែលត្រូវដោះស្រាយ គឺរឿងបញ្ហាដីធ្លី មិនមែនជារឿងចាប់ចងឬក៏ជាការចោទប្រកាន់នោះទេ។ ការចាប់ចងនិងការចោទប្រកាន់ក៏មិនមែនអាចដោះស្រាយបាននូវបញ្ហាដីធ្លីនោះដែរ។ ជាពិសេស វាកាន់តែបង្កើននូវការខឹងសម្បារពីប្រជាពលរដ្ឋ ហើយបង្កបញ្ហាហ្នឹងឱ្យកាន់តែធំទៀត»។
ពាក់ព័ន្ធនឹងជម្លោះដីធ្លីនេះដែរ តំណាងសហគមន៍ស្រែប្រាំង លោក សែម សាង ត្រូវបានសាលាដំបូងខេត្តត្បូងឃ្មុំសម្រេចកាត់ទោសកាលពីដើមខែមិថុនាកន្លងមក ឱ្យជាប់ពន្ធនាគារ៧ឆ្នាំ ក្រោមបទចោទថា បានកំហែងយកដោយមានអាវុធ។ អ្នកភូមិរូបនេះត្រូវបានសមត្ថកិច្ចស្ទាក់ចាប់ខ្លួននៅឯភូមិស្រែប្រាំងកាលពីខែតុលាឆ្នាំមុន នៅក្នុងជម្លោះដីធ្លីជាមួយក្រុមហ៊ុនចិនមួយនេះ៕
