វៀតណាមបានប្រកាសនៅថ្ងៃនេះថាមនុស្ស២នាក់ទៀតនៅទីក្រុងដាណាងបានស្លាប់ដោយសារកូវីដ១៩ ដែលនាំឱ្យករណីអ្នកបាត់បង់ជីវិតដោយជំងឺនេះកើនដល់៨នាក់ ខណៈអ្នកជំងឺ១០នាក់ផ្សេងទៀតកំពុងស្ថិតក្នុងស្ថានភាពធ្ងន់ធ្ងរ។
តាមប្រភព Vnexplorer បានឱ្យដឹងថាករណីស្លាប់ទាំងពីរនេះបណ្តាលមកពីស្ថានភាពចុះខ្សោយនៃសុខភាពរបស់ពួកគេ គួបផ្សំនឹងការធ្វើទុក្ខដោយសារវីរុសកូវីដ១៩ផងដែរ។
អនុរដ្ឋមន្រ្តីក្រសួងសុខាភិបាល លោក Nguyen Truong Son បាននិយាយថានៅរយៈពេល ១០ឆ្នាំចុងក្រោយ អ្នកជំងឺលេខរៀងទី៤២៦ បានប្រឈមមុខនឹងការខ្សោយតម្រងនោម និងបានទទួលការព្យាបាលនៅមន្ទីពេទ្យដាណាង តាំងពីថ្ងៃទី១៨ ខែកក្កដាមកម្ល៉េះ បន្ទាប់មកគាត់ត្រូវបានបញ្ជូនបន្តទៅមន្ទីពេទ្យកណ្តាល Hue នៅថ្ងៃទី៣០។
ដោយឡែក អ្នកជំងឺលេខរៀងទី៤៩៦ ត្រូវជាបុរសជនជាតិវៀតណាម វ័យ៦៥ឆ្នាំ ត្រូវបានធ្វើរោគវិនិច្ឆ័យ ហើយបង្ហាញឱ្យឃើញថាមាន ជំងឺខ្សោយតំរងនោមរ៉ាំរ៉ៃដំណាក់កាលចុងក្រោយ ជំងឺវិកលចរិកនិងជំងឺសួត។ ប្រភពដដែលបង្ហាញថា អ្នកជំងឺរូបនេះបានទទួលការព្យាបាលនៅមន្ទីពិសោធន៏ប្រសាទនៃមន្ទីពេទ្យដាណាងនៅអស់រយៈពេល ៥ខែ ហើយបានចេញពីមន្ទីពេទ្យនៅថ្ងៃទី២៤ ខែកក្កដា។
បន្ទាប់មក នៅថ្ងៃទី២៨ គាត់ត្រូវបានបញ្ជូនទៅដាក់ក្នុងបន្ទប់អុកស៊ីសែន ក្រោយពីមានការធ្វើតេស្តរកឃើញជំងឺកូវីដ១៩ ជាមួយនឹងរោគសញ្ញាដង្ហើមធ្ងន់ធ្ងររបស់គាត់ ក្រោយមកនៅព្រឹកថ្ងៃសុក្រ ទី៤ ម៉ោង៨ព្រឹក លោកត្រូវបានរកឃើញថាស្លាប់ក្នុងមន្ទីពេទ្យដាណាង។
អនុរដ្ឋមន្រ្តីក្រសួងសុខាភិបាល លោក Nguyen Truong Son បានកត់សម្គាល់ថានាពេលបច្ចុប្បន្នមានអ្នកជំងឺកូវីដ១៩ មួយចំនួនត្រូវប្រឈមមុខនឹងការស្លាប់ខ្ពស់ ដោយសារភាពដុនដាបនៃសុខភាព និងអាយុរបស់ពួកគេ។
គួរបញ្ជាក់ថា ចាប់តាំងពីមានការឆ្លងរីករាលដាលក្នុងសហគមន៏នៅថ្ងៃទី២៥ ខែកក្កដាមក ទីក្រុងដាណាងបានទទួលអ្នកឆ្លងកូវីដ១៩ ចំនួន ១៤២នាក់ ដែលនេះជាអត្រាមួយខ្ពស់បំផុតរបស់ប្រទេសវៀតណាម៕
