ក្រសួងទេសចរណ៍ប្រកាសបន្តលើកលែងការបង់ពន្ធប្រចាំខែគ្រប់ប្រភេទរយៈពេលពីរខែបន្ថែមទៀត ចំពោះសណ្ឋាគារ ផ្ទះសំណាក់ ភោជនីយដ្ឋាន និងទីភ្នាក់ងារទេសចរណ៍ក្នុងរាជធានីភ្នំពេញនិងខេត្តមួយចំនួន ខណៈកម្ពុជានៅបន្តមានវិបត្តិជំងឺកូវីដ១៩។
រដ្ឋលេខាធិការប្រចាំការនៃក្រសួងទេសចរណ៍ លោក ទិត ចន្ថា បានលើកឡើងនៅក្នុងលិខិតកាលពីថ្ងៃទី០៣ ខែសីហា ទៅកាន់ប្រធានមន្ទីរទេសចរណ៍រាជធានីនិងខេត្តចំនួន៧ ថា កាលពីថ្ងៃទី៣១ ខែកក្កដា រាជរដ្ឋាភិបាលបានដាក់ចេញនូវវិធានការបន្ថែម ដើម្បីគ្រប់គ្រងផលប៉ះពាល់លើវិស័យសំខាន់ៗនៃសេដ្ឋកិច្ចជាតិ ក្នុងបរិបទនៃវិបត្តិជំងឺកូវីដ១៩ ការស្តារនិងការជំរុញកំណើនសេដ្ឋកិច្ចកម្ពុជា។
លោកបានបន្តថា ករណីនេះ ក្រសួងណែនាំដល់ប្រធានមន្ទីរទេសចរណ៍រាជធានី-ខេត្តទាំងនោះ បន្តលើកលែងការបង់ពន្ធប្រចាំខែចំពោះសណ្ឋាគារ ផ្ទះសំណាក់ ភោជនីយដ្ឋាន និងទីភ្នាក់ងារទេសចរណ៍ដែលបានចុះបញ្ជីជាមួយអគ្គនាយកដ្ឋានពន្ធដារនិងមានសកម្មភាពអាជីវកម្មនៅក្នុងរាជធានីភ្នំពេញ ខេត្តសៀមរាប ខេត្តព្រះសីហនុ ខេត្តកែប ខេត្តកំពត ក្រុងបាវិត (ខេត្តស្វាយរៀង) និងក្រុងប៉ោយប៉ែត (ខេត្តបន្ទាយមានជ័យ) ចាប់ពីខែសីហាដល់ខែកញ្ញា។
លោក ទិត ចន្ថា ក៏បានជូនដំណឹងដល់ម្ចាស់អាជីវកម្មសណ្ឋាគារ ផ្ទះសំណាក់ ភោជនីយដ្ឋាន និងទីភ្នាក់ងារទេសចរណ៍ ដែលបានព្យួរឬ/នឹងត្រូវព្យួរ ដាក់ពាក្យស្នើសុំព្យួរកិច្ចសន្យាការងារនៅក្រសួងការងារ តាមរយៈមន្ទីរការងាររាជធានី-ខេត្ត ដើម្បីទទួលបានប្រាក់ឧបត្ថម្ភ៤០ដុល្លារក្នុងមួយខែ សម្រាប់រយៈពេល២ខែបន្តទៀត ចាប់ពីខែសីហាដល់ខែកញ្ញាពីរាជរដ្ឋាភិបាល។
តែយ៉ាងណា លោកថា សហគ្រាសនិងអាជីវកម្មក្នុងវិស័យទេសចរណ៍ ត្រូវរួមចំណែកតាមគោលការណ៍ស្ម័គ្រចិត្តនិងតាមលទ្ធភាពជាក់ស្តែងបន្ថែមលើអ្វីដែលរាជរដ្ឋាភិបាលបានផ្តល់ជូន។
កាលពីខែកុម្ភៈ រាជរដ្ឋាភិបាលបានចាប់ផ្តើមលើកលែងការបង់ពន្ធប្រចាំខែគ្រប់ប្រភេទចំពោះសណ្ឋាគារនិងផ្ទះសំណាក់ដែលបានចុះបញ្ជីជាមួយអគ្គនាយកដ្ឋានពន្ធដារនិងមានសកម្មភាពអាជីវកម្មនៅក្នុងខេត្តសៀមរាប និងបានបន្តការលើកលែងពន្ធជាបន្តបន្ទាប់ទៀតចំពោះសណ្ឋាគារ ផ្ទះសំណាក់ ភោជនីយដ្ឋាន និងទីភ្នាក់ងារទេសចរណ៍ក្នុងរាជធានីភ្នំពេញនិងខេត្ត និងក្រុងមួយចំនួនទៀតដែលជាគោលដៅទេសចរណ៍សំខាន់របស់កម្ពុជា៕