រដ្ឋមន្ត្រីក្រសួងព័ត៌មាន លោក ខៀវ កាញារីទ្ធ ជំរុញទៅមន្ត្រីកុំឱ្យចាត់ទុកអ្នកសារព័ត៌មានដែលរាយការណ៍ពីចំណុចអវិជ្ជមានរបស់រដ្ឋាភិបាលថាជាក្រុមប្រឆាំងទាំងអស់ ដោយថា ចំណុចអវិជ្ជមានខ្លះ អ្នកសារព័ត៌មានសរសេរមិនមែនសុទ្ធតែខុសនោះទេ។
ក្នុងសន្និសីទសារព័ត៌មានស្ដីពីវឌ្ឍនភាពការងារឆ្នាំ២០១៩ និងទិសដៅការងារបន្ដឆ្នាំ២០២០ របស់ក្រសួង ស្ថាប័ន និងរដ្ឋបាលរាជធានី-ខេត្ត នៅថ្ងៃនេះ រដ្ឋមន្ត្រីក្រសួងព័ត៌មាន លោក ខៀវ កាញារីទ្ធ លើកឡើងថា ស្ថាប័នដែលរងនូវការចោទពាក់ព័ន្ធព័ត៌មានមិនពិត ស្ថាប័នទាំងនោះមិនត្រូវដេកលក់ទេ តែត្រូវចេញបំភ្លឺដោយព័ត៌មានពិតឱ្យបានឆាប់។
ក្រៅពីចេញបំភ្លឺនោះ រដ្ឋមន្ត្រីរូបនេះបានថា មន្ត្រីទាំងអស់ត្រូវឈប់គិតអវិជ្ជមានចំពោះអ្នកសារព័ត៌មានដែលសរសេរខ្វះខាតថាជាពួកប្រឆាំងទៀត។
លោក ខៀវ កាញារីទ្ធ ថ្លែងថា៖ «មន្ត្រីដាច់ខាតឱ្យតែគេសរសេរអាក្រក់សុទ្ធតែពួកប្រឆាំង [អាហ្នឹង]ឈប់ អាហ្នឹងមួយត្រូវចោល ត្រូវមើលគេសរសេរហ្នឹងពិតទេ ហើយពិតដល់ត្រឹមណា។ យើងដោះស្រាយយ៉ាងម៉េច នេះជាការសំខាន់ មិនមែនរឿងអាណាសរសេរអាក្រក់ សុទ្ធតែរឿងប្រឆាំងហ្នឹង។ ជួនកាលប្រឆាំង គេនិយាយត្រូវដែរ យើងមើលសំខាន់កន្លែងហ្នឹង ហើយការប្រទាំងប្រទើសគ្នាធ្វើឱ្យយើងរកផ្លូវចេញបានល្អ»។
អ្នកនាំពាក្យរដ្ឋាភិបាល លោក ផៃ ស៊ីផាន មានប្រសាសន៍ថា ប្រសិនបើអ្នកនាំពាក្យនៅក្រសួងណាមួយពិបាកឬមិនឆ្លើយតបនោះ លោកថា អ្នកសារព័ត៌មានអាចធ្វើរបាយការណ៍មកកាន់ប្រធានអ្នកនាំពាក្យបាន។
លោក ផៃ ស៊ីផាន ថ្លែងថា៖ «ខ្ញុំបាទ! ជម្រាបជូនអ្នកសារព័ត៌មាន បើសិនទូរសព្ទទៅកាន់អ្នកនាំពាក្យណាមួយពិបាកនឹងធ្វើកិច្ចសហការនោះ សូមធ្វើរបាយការណ៍មកខាងយើងខ្ញុំ! ខ្ញុំនឹងរៀបចំសម្រួលបន្ថែមទៀត។ នេះជាព័ត៌មានជម្រាបជូនឯកឧត្តមរដ្ឋមន្ត្រី»។
កាលពីថ្ងៃទី៦ ខែមីនា ឆ្នាំ២០១៩ លោកនាយករដ្ឋមន្ត្រី ហ៊ុន សែន បានសម្រេចបង្កើតអង្គភាពអ្នកនាំពាក្យរាជរដ្ឋាភិបាល ដើម្បីបង្កើនប្រសិទ្ធភាពការងារឆ្លើយតបនិងផ្សព្វផ្សាយព័ត៌មានផ្លូវការរបស់រដ្ឋាភិបាល។
យោងតាមសេចក្តីសម្រេចដដែលថា អង្គភាពអ្នកនាំពាក្យនេះ ត្រូវពន្យល់និងផ្សព្វផ្សាយអំពីប្រសិទ្ធភាពនៃកម្មវិធីនយោបាយរបស់រដ្ឋាភិបាលទៅកាន់បណ្តាញសារព័ត៌មាន ក៏ដូចជាសាធារណជន ដើម្បីចៀសវាងការបកស្រាយខុសដែលនាំឱ្យមានការវាយតម្លៃអវិជ្ជមានទៅលើរដ្ឋាភិបាល។
បន្ថែមពីលើនេះ អង្គភាពអ្នកនាំពាក្យមានភារកិច្ចប្រមូល តាមដាន អង្កេត និងវិភាគនូវរាល់ព័ត៌មាននិងព្រឹត្តិការណ៍នានាដែលបានកើតឡើង ដើម្បីបំភ្លឺ ព្រមទាំងពន្យល់បញ្ចៀសការផ្សព្វផ្សាយរាល់ព័ត៌មានមិនពិត ដែលមានចរិតញុះញង់នាំឱ្យខូចសន្តិសុខ សណ្តាប់ធ្នាប់ ស្ថិរភាព និងកិត្យានុភាពរបស់រដ្ឋាភិបាលឬស្ថាប័នពាក់ព័ន្ធជាដើម។
អ្នកកាសែតនៅក្រុមហ៊ុនឯកជនមួយ អ្នកស្រី ឡុង គឹមម៉ារីតា ឱ្យដឹងថា មន្ត្រីនាំពាក្យនៅស្ថាប័នខ្លះ ឆ្លើយតបលឿន ប៉ុន្តែអ្នកនាំពាក្យខ្លះពិបាកក្នុងការទាក់ទង ហើយក៏ពិបាកនឹងយកសម្រង់សម្ដីដែរ។ អ្នកស្រីស្នើទៅអ្នកនាំពាក្យគ្រប់ស្ថាប័នទាំងអស់ធ្វើការឆ្លើយតបជាមួយអ្នកសារព័ត៌មានឱ្យបានលឿន ដោយអ្នកស្រីថា ការឆ្លើយតបរបស់អ្នកនាំពាក្យមានសារៈសំខាន់សម្រាប់អ្នកសារព័ត៌មាន រួមទាំងប្រជាពលរដ្ឋផងដែរ។
អ្នកស្រី ឡុង គឹមម៉ារីតា ប្រាប់ថា៖ «យើងទទួលស្គាល់ថា ការងារពួកគាត់ច្រើន ពេលខ្លះក៏គាត់ខកខានដោយអចេតនាក្នុងការឆ្លើយតបពួកយើង ប៉ុន្តែពេលខ្លះយើងមិនគិតថា វាអចេតនាញឹកពេកទេ តេពេលណាក៏រវល់ តេពេលណាក៏ចុចបិទទូរសព្ទ លេខទូរសព្ទរបស់គាត់ត្រូវបានអ្នកផ្សេងលើក ហើយថាមិនមែនជាគាត់អ៊ីចឹង។ ក្នុងនាមយើងជាកាសែត យើងចង់បានប្រភពគ្រប់ជ្រុងជ្រោយ ដើម្បីកុំឱ្យមានការចោទប្រកាន់ថា យើងផ្សាយព័ត៌មានតែភាគីម្ខាង ហើយភាគីម្ខាងទៀតយើងមិនទទួលយកការឆ្លើយតប»។
អ្នករាយការណ៍ព័ត៌មានវិទ្យុសំឡេងសហរដ្ឋអាមេរិក (វីអូអេ) លោក ស៊ុន ណារិន លើកឡើងថា កន្លងមក មន្ត្រីមួយចំនួនតែងតែរើសអើងអ្នកសារព័ត៌មានដែលសរសេររឿងចំណុចខ្វះចន្លោះឬអវិជ្ជមានរបស់រដ្ឋាភិបាល ហើយចាត់ទុកអ្នកសារព័ត៌មាននោះថាជាក្រុមប្រឆាំងទៅវិញ។
លោក ស៊ុន ណារិន ប្រាប់ថា៖ «អាហ្នឹងគឺជាតួនាទីអ្នកសារព័ត៌មានដែលយើងជ្រើសរើស ដែលមានតម្លៃព័ត៌មាន ដែលមានឥទ្ធិពល រឿងដែលល្អសម្រាប់អ្នកអានរបស់យើង ជាជាងជ្រើសរើសរឿងគ្រាន់តែជាការជូនដំណឹង ហើយដូចថា ប្រជាពលរដ្ឋអត់ទទួលបានការវិភាគឬក៏រឿងដែលយើងសរសេរទៅមានការផ្លាស់ប្ដូរអីមួយ ដូចជាការកំណែទម្រង់របស់រដ្ឋាភិបាល។ អាហ្នឹងគឺជារឿងដែលប្រជាពលរដ្ឋចង់ដឹង»។
អគ្គលេខាធិការក្លឹបអ្នកកាសែតកម្ពុជា លោក ពុយ គា សម្ដែងការគាំទ្រចំពោះការលើកឡើងរបស់រដ្ឋមន្ត្រីក្រសួងព័ត៌មាន ដោយថា អ្នកសារព័ត៌មានដែលសរសេរចំណុចអវិជ្ជមាន មិនមែនជាការប្រឆាំងនឹងរដ្ឋាភិបាលនោះទេ ប៉ុន្តែពួកគេជាអ្នកជួយដល់រដ្ឋាភិបាលទៅវិញ។
លោក ពុយ គា ប្រាប់ថា៖ «ចំណុចអវិជ្ជមានទាំងអស់ហ្នឹងគឺជួយដល់រដ្ឋាភិបាល ដើម្បីកុំឱ្យមានការថ្នាំងថ្នាក់ពីប្រជាពលរដ្ឋ ពីមហាជនកាន់តែច្រើនទៅៗ ដើម្បីកាត់បន្ថយមានតែវិធានការភ្លាមៗ បន្ទាប់ពីអ្នកសារព័ត៌មានបានផ្សាយ។ អ៊ីចឹងហើយតួនាទីអ្នកសារព័ត៌មានដែលផ្សាយពីជ្រុងអវិជ្ជមាននានាគឺដាស់ឱ្យមន្ត្រីហ្នឹងត្រូវធ្វើការ មន្ត្រីពាក់ព័ន្ធតាមស្ថាប័ននីមួយៗរួមទាំងអាជ្ញាធរមូលដ្ឋានផង»។
របាយការណ៍ប្រចាំឆ្នាំ២០២០របស់អង្គការអ្នករាយការណ៍ព័ត៌មានគ្មានព្រំដែន (RSF) ដែលទើបចេញផ្សាយកាលពីខែមីនា បង្ហាញថា សេរីភាពសារព័ត៌មាននៅកម្ពុជាបានធ្លាក់ចុះមួយលេខថែមទៀត មកនៅចំណាត់ថ្នាក់១៤៤នៅឆ្នាំនេះ នៅក្នុងចំណោម១៨០ប្រទេសនៅលើពិភពលោក។ បើធៀបនឹងបណ្ដាប្រទេសក្នុងតំបន់វិញ កម្រិតសេរីភាពសារព័ត៌មាននៅកម្ពុជា ទាបជាងថៃ ម៉ាឡេស៊ី ឥណ្ឌូនេស៊ី ហ្វីលីពីន លើកលែងតែសិង្ហបុរី វៀតណាម ប៊្រុយណេ និងឡាវប៉ុណ្ណោះ៕