ស្ត្រីខ្មែរម្នាក់ បានស្លាប់បាត់បង់ជីវិត ក្នុងហេតុការណ៍ផ្ទុះអាវុធ នៅកន្លែងល្បែងស៊ីសងក្នុងអគារពាណិជ្ជកម្មមួយ ក្នុងក្រុងបាងកក ប្រទេសថៃ កាលពីយប់ថ្ងៃទី៣ ខែសីហា។
យោងតាមការចុះផ្សាយរបស់សារព័ត៌មានបាងកកប៉ុស្តិ៍ (Bangkok Post) បានឲ្យដឹងថា ករណីផ្ទុះអាវុធនេះ បង្កឡើងដោយក្រុមអ្នកចាញ់ល្បែង ដែលសមត្ថកិច្ចថៃសង្ស័យថា កើតឡើងដោយសារមានជម្លោះផ្ទាល់ខ្លួន។
ប្រភពដដែលបានបន្តថា ក្នុងករណីនេះមានអ្នកស្លាប់ចំនួន៤នាក់ ក្នុងនោះ រួមមាននគរបាលម្នាក់ ស្រ្តីម្នាក់ និងបុរសម្នាក់ដែលជាជនជាតិថៃ ព្រមទាំងស្រ្ដីម្នាក់ទៀតដែលជាជនជាតិខ្មែរ។ ទោះយ៉ាងណា សមត្ថកិច្ចថៃ នៅពុំទាន់អាចបញ្ជាក់លម្អិតពីហេតុការណ៍នេះនៅឡើយ។
អ្នកនាំពាក្យក្រសួងការបរទេស និងសហប្រត្តិបត្តិការអន្តរជាតិកម្ពុជា លោក កុយ គួង បានប្រាប់វីអូឌីតាមតេឡេក្រាម(Telegram) នៅថ្ងៃទី៤ខែសីហានេះថា ស្ត្រីខ្មែរដែលស្លាប់នោះ មានឈ្មោះ ម៉ៅ ស្រីពៅ អាយុ២៩ឆ្នាំ មានអាស័យដ្ឋាននៅសង្កាត់ប៉ោយប៉ែត ខេត្តបន្ទាយមានជ័យ។
លោកបន្តថា រហូតមកដល់ពេលនេះ ស្ថានទូតកម្ពុជាប្រចាំប្រទេសថៃ កំពុងធ្វើការជាមួយអាជ្ញាធរថៃ និងបានចុះទៅសង្កេតលើការធ្វើកោសល្យវិច័យនៅកន្លែងតម្កល់សព ព្រមទាំងធ្វើឯកសារស្នើដល់ប្រទេសថៃ ដើម្បីសុំសិទ្ធិយកសពស្រ្ដីជនជាតិខ្មែរនោះ មកធ្វើបុណ្យតាមប្រពៃណីនៅប្រទេសកម្ពុជាវិញ៕
