អាជ្ញាធរខេត្តពោធិ៍សាត់បានឱ្យដឹងថា មានបុរសពីរនាក់បានស្លាប់នៅក្នុងករណីផ្ទុះគ្រាប់មិនទាន់ផ្ទុះ នៅចំណុចភូមិដីក្រហម ឃុំអន្លង់រាប ស្រុកវាលវែង ដោយសង្ស័យថា ជនរងគ្រោះយកគ្រាប់នោះទៅដំលេង។
អធិការនគរបាលស្រុកវាលវែង លោក ធាង ឡេង បានមានប្រសាសន៍នៅថ្ងៃទី០៤ ខែសីហានេះថា ជនរងគ្រោះទាំងពីរនាក់នោះមានឈ្មោះ យ៉ង់ សារី អាយុ៣៩ឆ្នាំ និងឈ្មោះ ដែន ត្រា អាយុ២០ឆ្នាំ បានស្លាប់នៅនឹងកន្លែងកើតហេតុ ក្រោយពីពួកគេបានយកគ្រាប់មិនទាន់ផ្ទុះនោះ មកដំលេងនៅក្នុងរោងឈើក្នុងចំការ។
លោកបានថ្លែងថា៖ «កន្លែងកើតហេតុនោះនៅឆ្ងាយពីភូមិ ដូច្នេះយើងមិនដឹងថាគ្រាប់មិនទាន់ផ្ទុះនោះជាប្រភេទគ្រាប់អ្វីទេ ដោយសារវាបានផ្ទុះខ្ទេចទៅហើយ ហើយជនរងគ្រោះក៏បានស្លាប់ មិនមានសាក្សីនៅទីនោះដែរ ដូច្នេះបានជាយើងដាក់ការសង្ស័យថា ពួកគាត់អាចប្រទះឃើញគ្រាប់នោះហើយយកទៅដំលេងបណ្តាលឱ្យផ្ទុះស្លាប់តែម្តង»។
លោក ហេង រតនា ប្រតិភូរាជរដ្ឋាភិបាលទទួលបន្ទុកជាអគ្គនាយកមជ្ឈមណ្ឌលសកម្មភាពកម្ចាត់មីនកម្ពុជា ហៅកាត់ថា ស៊ីម៉ាក់ (CMAC) បានលើកឡើងក្នុងហ្វេសប៊ុករបស់លោកនៅថ្ងៃអង្គារនេះដែរថា អាជ្ញាធរខេត្តកំពង់ឆ្នាំងក៏បានប្រគល់កាំភ្លើងចំនួន១៨ដើមនិងគ្រាប់បែកដៃចំនួន៤គ្រាប់ដែលខូចគុណភាពដល់មន្ត្រីជំនាញស៊ីម៉ាក់។
លោកបានបន្ថែមថា៖ «កម្លាំងជំនាញបោសសម្អាតមីននិងសំណល់ជាតិផ្ទុះពីសង្គ្រាម បានធ្វើសកម្មភាពយ៉ាងមមាញឹក សំដៅការពារសុវត្ថិភាពប្រជាពលរដ្ឋនិងគាំទ្រការអភិវឌ្ឍមាតុភូមិឡើងវិញ។ ក្រោយសង្គ្រាម មានគ្រាប់មីននិងសំណល់ជាតិផ្ទុះចំនួនជិត៤លានគ្រាប់ហើយដែលបានបោសសម្អាតនិងកម្ទេចចោល»។
ពាក់ព័ន្ធនឹងករណីនេះដែរ អាជ្ញាធរមីនក៏បានអំពាវនាវដល់ប្រជាពលរដ្ឋទាំងអស់ត្រូវមានការប្រុងប្រយ័ត្ននិងជៀសវាងកុំប៉ះពាល់ ដំ គប់លេង ឬយកទៅកែច្នៃនូវគ្រាប់មីននិងគ្រាប់មិនទាន់ផ្ទុះ ដែលអាចបណ្តាលឱ្យផ្ទុះស្លាប់ របួស និងពិការបានគ្រប់ពេល។ អាជ្ញាធរមីនក៏បានអំពាវនាវដល់ប្រជាពលរដ្ឋ ត្រូវរាយការណ៍ទៅអាជ្ញាធរមូលដ្ឋាននិងប្រតិបត្តិករបោសសម្អាតមីនដែលនៅជិតកន្លែងរកឃើញគ្រាប់យុទ្ធភណ្ឌមិនទាន់ផ្ទុះទាំងនោះផងដែរ ដើម្បីឱ្យអ្នកជំនាញយកគ្រាប់ទាំងនោះទៅកម្ទេចចោល។
យោងតាមរបាយការណ៍របស់អាជ្ញាធរមីនបានឱ្យដឹងថា ក្នុងរយៈពេល៦ខែឆ្នាំនេះ មានមនុស្សចំនួន៩នាក់ បានស្លាប់ និង២៧នាក់ បានរងរបួសធ្ងន់និងស្រាល ដោយសារគ្រាប់មីននិងគ្រាប់យុទ្ធភណ្ឌមិនទាន់ផ្ទុះ។ តួលេខនេះមានការថយចុះ៤២ភាគរយ បើធៀបនឹងរយៈពេលដូចគ្នាកាលពីឆ្នាំមុន ដែលមានអ្នកស្លាប់និងរបួសរហូតដល់៦២នាក់។
របាយការណ៍ដដែលបានបន្តថា ខេត្តដែលរកឃើញនិងមានករណីផ្ទុះមីននិងគ្រាប់យុទ្ធភណ្ឌមិនទាន់ផ្ទុះ រួមមាន ខេត្តបាត់ដំបង បន្ទាយមានជ័យ កំពង់ធំ ពោធិ៍សាត់ ក្រចេះ ព្រះវិហារ ប៉ៃលិន ត្បូងឃ្មុំ មណ្ឌលគិរី ស្ទឹងត្រែង និងឧត្តរមានជ័យ៕