ក្រុមហ៊ុនចិន ស៊ីណូហាយដ្រូកំចាយ ដែលទទួលសិទ្ធិវិនិយោគទំនប់វារីអគ្គិសនីកំចាយខេត្តកំពត នៅថ្ងៃទី០៤ ខែសីហា បានចេញសេចក្ដីជូនដំណឹងមួយដោយព្រមានពលរដ្ឋឱ្យប្រុងប្រយ័ត្នខ្ពស់បន្ទាប់ពីក្រុមហ៊ុនប្រាប់ពីគម្រោងបើកទ្វារទំនប់ឆាប់ៗដើម្បីរំដោះទឹកចេញពីអាងស្តុក។
លិខិតជូនដំណឹងរបស់ក្រុមហ៊ុនចិន ស៊ីណូហាយដ្រូ ដែលចេញផ្សាយដោយរដ្ឋបាលខេត្តកំពតនៅថ្ងៃនេះ បញ្ជាក់ថា បច្ចុប្បន្នលំហូរទឹកដែលហូរចូលអាងទំនប់វារីអគ្គិសនីមានបរិមាណ ជាង៥៣១ម៉ែតត្រីគុណ (ម៉ែត្រគីប) ក្នុងរយៈពេល១វិនាទី។
លិខិតដដែលសរសេរថា៖ «ការបើកទ្វាររំដោះទឹកត្រូវបានរំពឹងថា អាចនឹងចាប់ផ្ដើមនៅរសៀលថ្ងៃទី០៤ ខែសីហាឬយប់ថ្ងៃទី០៤ ខែសីហា។ អាស្រ័យហេតុនេះ សូមរដ្ឋបាលខេត្តមេត្តានិងអាជ្ញាធរពាក់ព័ន្ធ សូមមេត្តាជូនដំណឹងដល់ប្រជាពលរដ្ឋ កសិករ និងអាជីវកម្មតាមដងព្រែកខាងក្រោមទំនប់ ឱ្យចាត់វិធានការការពារនិងប្រុងប្រយ័ត្នឱ្យបានទាន់ពេលវេលាដើម្បីទប់ស្កាត់ផលប៉ះពាល់ឱ្យទាន់ពេលវេលា»។
ម្ចាស់រីស្សតជាប់មាត់ព្រែកកំពត អ្នកស្រី ពន្លៃ ករិយា មានប្រសាសន៍ថា អ្នកស្រីកំពុងប្រុងជើងការដើម្បីបញ្ចៀសហានិភ័យផ្សេងៗដែលអាចកើតមានឡើងជាយថាហេតុ។ អ្នកស្រីបន្តថា ក្រុមហ៊ុនគួរតែជូនដំណឹងឱ្យបានច្បាស់ថា ទឹកបើកម៉ោងណា ទឹកអាចមានកម្ពស់ប៉ុន្មាន ដើម្បីងាយស្រួលឱ្យក្រុមពលរដ្ឋអាចត្រៀមខ្លួនឆ្លើយតបបានសមស្រប។
អ្នកស្រី ពន្លៃ ករិយា មានប្រសាសន៍ថា៖ «ខ្ញុំដឹងដំណឹងបើកទឹកហ្នឹងតាំងពីព្រឹក យើងចាំមើល ព្រោះគ្រាន់ថាត្រៀម។ ភ្ញៀវក៏គាត់ដឹងពីរឿងហ្នឹងដែរ។ ខ្ញុំទើបមកនៅដែរ[ទើបសង់រីស្សតថ្មី] ដល់អីចឹងទៅ អត់ដឹងថាទឹកហ្នឹងអាចដល់ត្រឹមណាត្រឹមណា ដូច្នេះចេះតែស៊ើបសួរស៊ើបសួរនេះ»។
បុគ្គលិកផ្នែកផ្ដល់ព័ត៌មានរបស់ក្រុមហ៊ុនវារីអគ្គិសនីស៊ីណូហាយដ្រូ កាលពីម៉ោង១៧និង០០នាទីថ្ងៃទី៤ ខែសីហា អ្នកនាង លី ហ្គិច បានថ្លែងប្រាប់អ្នកសារព័ត៌មានវីអូឌីថា ក្រុមហ៊ុនមិនទាន់សម្រេចថានឹងបើកទ្វារទឹកនៅម៉ោងប៉ុន្មាននោះឡើយ ហើយនាងក៏មិនដឹងបើសិនជាទឹកបើកមែន កម្ពស់ទឹកអាចនឹងឡើងដល់កម្ពស់ណានោះដែរ។
អ្នកស្រី លី ហ្គិច និយាយថា៖ «ប្រហែលអាចនឹងបើក និយាយទៅ ពលរដ្ឋគាត់ប្រុងប្រៀបការពារទ្រព្យសម្បត្តិគាត់ជាមុនប្រសើរជាង»។
ប្រធានមន្ទីរទេសចរណ៍ខេត្តកំពត លោក សយ ស៊ីណុល មានប្រសាសន៍ថា មន្ទីរទេសចរណ៍បានជូនដំណឹងទៅដល់ម្ចាស់អាជីវកម្មសេវាកម្មទេសចរណ៍នៅតាមបណ្ដោយដងព្រែកកំពតនិងនៅក្នុងខេត្តរួចហើយពីគម្រោងបើកទំនប់វារីអគ្គិសនីនេះ។ លោកថា អាជីវកម្មទេសចរណ៍តាមដងព្រែកអាចនឹងមានផលប៉ះពាល់ បើសិនជាមានទឹកជំនន់កើតឡើង។
លោក សយ ស៊ីណុល មានប្រសាសន៍ថា៖ «វាជារឿងធម្មតាទេ បើបើកទឹកមក ប៉ះចំទឹកជោរនោះ ទឹកមិនងាយស្រកទេ តែបើចំទឹកនាច នោះឆាប់ស្រក។ តែយ៉ាងណា អ្នកទេសចរឬអាជីវកម្មទេសចរណ៍នៅតាមដងព្រែកកំពតនោះ ត្រូវមានការប្រុងប្រយ័ត្នខ្ពស់ ចៀសវាងគ្រោះថ្នាក់ជាយថាហេតុ»។
វីអូឌីមិនអាចទាក់ទងអភិបាលខេត្តកំពត លោក ជាវ តាយ តាមទូរសព្ទបានទេនៅថ្ងៃទី០៤ ខែសីហា ដោយទូរសព្ទលោកមិនមានអ្នកទទួល។
ទោះជាយ៉ាងណាក្ដី ទំព័រហ្វេសប៊ុកផ្លូវការរបស់រដ្ឋបាលខេត្តកំពត សរសេរថា នៅព្រឹកថ្ងៃទី០៤ ខែសីហា លោក ជាវ តាយ បានដឹកនាំមន្ត្រីទៅពិនិត្យប្រព័ន្ធរំដោះទឹកជំនន់ក្នុងក្រុងកំពត។
ទំព័រដដែលសរសេរថា អភិបាលខេត្តកំពត លោក ជាវ តាយ បានបញ្ជាឱ្យមន្ត្រីពាក់ព័ន្ធត្រូវត្រៀមលក្ខណៈគ្រប់មធ្យោបាយ ដើម្បីជួយអន្តរាគមន៍ឬជម្លៀសប្រជាពលរដ្ឋទៅកាន់ទីទួលសុវត្ថិភាព ក្នុងករណីមានហេតុការណ៍ទឹកជំនន់កើតឡើង។
អ្នកនាំពាក្យអាជ្ញាធរជាតិគ្រប់គ្រងគ្រោះមហន្តរាយ លោក ឃុន សុខា ប្រាប់វីអូឌីថា គណៈកម្មាធិការជាតិមួយនេះបានត្រៀមរួចរាល់ហើយ ដើម្បីជួយសង្គ្រោះពលរដ្ឋពីគ្រោះធម្មជាតិនានា។ ទោះយ៉ាងណា លោកមិនទាន់ទទួលបានព័ត៌មានពីស្ថានភាពនៅខេត្តកំពតនៅឡើយទេ។
កាលពីឆ្នាំ២០១៩ ទឹកភ្លៀងខ្លាំងជាប់ៗគ្នាក្នុងខែសីហា បានបង្ខំឱ្យវារីអគ្គិសនីកំចាយបើកទ្វារទឹកចំនួន៥ទ្វារ ដើម្បីរំដោះទឹកចេញ បណ្ដាលឱ្យកើតមានជំនន់នៅក្នុងស្រុកចំនួន៣ រួមមាន ក្រុងកំពត ស្រុកទឹកឈូ និងស្រុកកំពង់ត្រាច ទឹកបានជន់លិចផលដំណាំស្រូវនិងដំណាំរួមផ្សំរាប់ពាន់ហិកតា ផ្ទះសម្បែងពលរដ្ឋរាប់រយខ្នង៕
