អាជ្ញាធរខេត្តព្រះសីហនុបានប្រើប្រាស់ទូកទេសចរណ៍ខ្នាតធំល្បឿនលឿនចំនួន៣គ្រឿង ដើម្បីអន្តរាគមន៍ដឹកជញ្ជូនភ្ញៀវទេសចរជាតិនិងអន្តរជាតិជាង៦០០នាក់ដែលជាប់គាំងនៅក្រុងកោះរ៉ុង ដោយសារបញ្ហាអាកាសធាតុ ឱ្យត្រឡប់មកដីគោកក្នុងក្រុងព្រះសីហនុវិញ។
រដ្ឋបាលខេត្តព្រះសីហនុបានឱ្យដឹងកាលពីព្រលប់ថ្ងៃទី៤ ខែសីហាថា ភ្ញៀវទេសចរដែលជាប់គាំងនៅក្រុងកោះរ៉ុង (កោះរ៉ុងនិងកោះរ៉ុងសន្លឹម) មានចំនួន៦២១នាក់ ក្នុងនោះមានជនបរទេស៥០នាក់ កុមារ៩៦នាក់ និងទារក៦នាក់។
រដ្ឋបាលខេត្តបានបន្តថា៖ «ពួកគេបានទៅលេងកម្សាន្តនៅក្រុងកោះរ៉ុងមុនថ្ងៃដែលមានភ្លៀងធ្លាក់ខ្លាំងនិងរលកខ្ពស់ដោយរងឥទ្ធិពលពីព្យុះទី៣ ឈ្មោះ ស៊ីនឡាគូ»។
រដ្ឋបាលខេត្តបានបញ្ជាក់ដែរថា ក្នុងកិច្ចអន្តរាគមន៍នោះ បានប្រើប្រាស់ទូកល្បឿនលឿនចំនួន៣គ្រឿង ដោយដឹកជញ្ជូនភ្ញៀវទេសចរចំនួន២ជើង ក្នុងនោះជើងទី១មានចំនួន៤០៥នាក់ និងទី២មាន២១៦នាក់ ហើយភ្ញៀវទេសចរទាំងអស់ត្រូវបានដឹកជញ្ជូនទៅកាន់គោលដៅរៀងៗខ្លួនដោយប្រើប្រាស់រថយន្តក្រុងចំនួន៨គ្រឿង។
កាលពីថ្ងៃទី១ ខែសីហា រដ្ឋបាលខេត្តព្រះសីហនុបានអំពាវនាវដល់ប្រជាពលរដ្ឋបង្កើនការប្រុងប្រយ័ត្ននិងផ្អាកការធ្វើដំណើរតាមផ្លូវទឹកក្នុងករណីមិនចាំបាច់ ដោយសារកម្ពុជារងឥទ្ធិពលព្យុះ ស៊ីនឡាគូ (SINLAKU) ដែលនាំឱ្យខេត្តរួមនឹងតំបន់មួយចំនួន អាចមានភ្លៀងធ្លាក់ច្រើននិងប្រឈមនឹងជំនន់ទឹកភ្លៀង រួមជាមួយនឹងខ្យល់បក់ខ្លាំងនិងរលកសមុទ្រខ្ពស់ៗ ចាប់ពីថ្ងៃទី១ដល់ថ្ងៃទី៥ ខែសីហានេះ៕