ក្រុមនិសិត្សខ្មែរដែលបញ្ចប់ការសិក្សានៅប្រទេសថៃជាង៣០នាក់ បានមកដល់មាតុភូមិវិញហើយកាលពីថ្ងៃម្សិលមិញ ក្រោយពីស្ថានទូតកម្ពុជាប្រចាំប្រទេសថៃបានជួយសម្របសម្រួលជាមួយអាជ្ញាធរថៃ ដើម្បីបើកច្រកទ្វារព្រំដែនអន្តរជាតិជូនពួកគេ។
លោក កុយ គួង អ្នកនាំពាក្យក្រសួងការបរទេស និងកិច្ចសហប្រតិបត្តិការអន្តរជាតិកម្ពុជា ថ្លែងប្រាប់វីអូឌីនៅរសៀលថ្ងៃព្រហស្បតិ៍នេះថា ក្រុមនិសិ្សតខ្មែរចំនួន៣២នាក់ដែលបានបញ្ចប់ការសិក្សាថ្នាក់បរិញ្ញាបត្រនិងបរិញ្ញាបត្រជាន់ខ្ពស់នៅសាកលវិទ្យាល័យចំនួន១៦ក្នុងប្រទេសថៃ បានស្នើឱ្យស្ថានទូតកម្ពុជាប្រចាំប្រទេសថៃជួយបញ្ជូនពួកគេមកកម្ពុជាវិញកាលពីថ្ងៃទី០៥ ខែសីហា ឆ្នាំ២០២០ ។
លោកបន្តថា ដើម្បីជាការឆ្លើយតបទៅនឹងសំណើរបស់និសិត្សខ្មែរ ស្ថានទូតនិងអាជ្ញាធរកម្ពុជា បានសហការជាមួយអាជ្ញាធរថៃ ជាពិសេសនៅច្រកទ្វារព្រំដែនអន្តរជាតិខ្លងលឹក-ប៉ោយប៉ែត ដើម្បីជួយសម្រួលដំណើរមាតុភូមិនិវត្តន៍ក្រុមនិស្សិតខ្មែរ ឱ្យបានវិលត្រឡប់មកប្រទេសកម្ពុជាវិញ ប្រកបដោយសុវត្ថិភាពខ្ពស់។
លោកបានថ្លែងថា៖ «នៅពេលដែលសិស្សនិស្សិតស្នើសុំភ្លាម ស្ថានទូតបានចាត់ការភ្លាម»។
កាលពីថ្ងៃទី០១ ខែសីហា ឆ្នាំ២០២០ រដ្ឋាភិបាលប្រទេសថៃបានប្រកាសថា ខ្លួននៅតែបន្តដាក់ប្រទេសក្នុងភាពប្រកាសអាសន្នដដែលរហូតដល់ថ្ងៃទី៣១ ខែសីហា ក្នុងគោលបំណងទប់ស្កាត់ការរីករាលដាលជំងឺកូវីដ-១៩ ក្នុងប្រទេសនិងក្នុងសហគមន៍។
តែយ៉ាងណា ស្ថានទូតកម្ពុជាប្រចាំប្រទេសថៃបានឱ្យដឹងនៅលើទំព័រហ្វេសប៊ុកផ្លូវការរបស់ខ្លួន កាលពីថ្ងៃអង្គារថា រដ្ឋាភិបាលថៃបានអនុញ្ញាតឱ្យសិស្សនិសិ្សតកម្ពុជាអាចធ្វើដំណើរទៅសិក្សានៅក្នុងប្រទេសថៃបាន ដោយគិតចាប់ពីថ្ងៃទី០១ ខែសីហានេះទៅ ប៉ុន្តែពួកគេត្រូវបំពេញលក្ខខណ្ឌនិងភ្ជាប់ជាមួយនូវឯកសារមួយចំនួនដូចជា លិខិតបញ្ជាក់សុខភាព លទ្ធផលតេស្តវីរុសកូវីដ-១៩ និងបណ្ណធានារ៉ាប់រងសុខភាពចំនួន១០ម៉ឺនដុល្លារជាដើម។
ស្ថានទូតបន្តថា នៅពេលទៅដល់ប្រទេសថៃ ក្រុមនិសិត្សក៏ត្រូវឆ្លងកាត់ការត្រួតពិនិត្យកម្តៅ ត្រូវធ្វើដំណើរទៅមណ្ឌលចត្តាឡីស័កដោយមធ្យោបាយដឹកជញ្ជូនរបស់ស្ថាប័នសិក្សានិងធ្វើដំណើរទៅតាមផ្លូវរបស់រដ្ឋបានកំណត់ និងត្រូវធ្វើចត្តាឡីស័ក១៤ថ្ងៃ៕
