អភិបាលរាជធានីភ្នំពេញបានណែនាំដល់មន្ត្រីជំនាញពាក់ព័ន្ធ ត្រូវត្រួតពិនិត្យនិងលុបបំបាត់កន្លែងលក់ហ្គាសអនាធិបតេយ្យ ដើម្បីបញ្ចៀសការរំខាននិងបង្ការហានិភ័យដល់ប្រជាពលរដ្ឋ។
លោក ឃួង ស្រេង អភិបាលរាជធានីភ្នំពេញ ត្រូវបាននាយកដ្ឋាននគរបាលបង្ការពន្លត់អគ្គិភ័យនិងសង្គ្រោះ ស្រង់ប្រសាសន៍ក្នុងកិច្ចប្រជុំក្រុមប្រឹក្សារាជធានីភ្នំពេញកាលពីថ្ងៃម្សិលមិញមកថា បច្ចុប្បន្ន នៅរាជធានីភ្នំពេញ មានកន្លែងលក់និងបញ្ចូលហ្គាសជាច្រើន ហើយកន្លែងខ្លះគ្មានស្តង់ដារបច្ចេកទេស ប្រើប្រាស់ធុងហ្គាសចាស់ៗគ្មានគុណភាពឬធុងស្តើងដែលងាយបង្កហានិភ័យនិងគ្រោះថ្នាក់ដល់អ្នកបញ្ចូលហ្គាសនិងអ្នកប្រើប្រាស់។
ករណីនេះ លោកបានណែនាំដល់មន្ត្រីជំនាញពាក់ព័ន្ធ ត្រូវសហការជាមួយអាជ្ញាធរខណ្ឌទាំង១៤ ចុះត្រួតពិនិត្យកន្លែងលក់ហ្គាសក្នុងដែនសមត្ថកិច្ចរបស់ខ្លួននិងត្រូវស្វែងយល់ពីទិដ្ឋភាពច្បាប់ឬលិខិតបទដ្ឋាននានា បច្ចេកទេសស្តង់ដារ និងឧបករណ៍ការពារ ដើម្បីធានាថា អាជីវកម្មនោះគ្មានផលរំខានឬបង្កគ្រោះថ្នាក់ដល់ប្រជាពលរដ្ឋនិងបរិស្ថាន។
លោកថា៖ «កិច្ចការងារនេះគឺជាសន្តិសុខសុវត្ថិភាពរបស់ប្រជាពលរដ្ឋនៅមូលដ្ឋាន ហើយបើកាលណាបង្កឱ្យមានកន្លែងលក់ហ្គាសអនាធិបតេយ្យកាន់តែច្រើន ហានិភ័យកាន់តែខ្ពស់ចំពោះយើង ហើយយើងក៏ប្រឈមពេលជួយអន្តរាគមន៍ សង្គ្រោះ និងពន្លត់ រួមទាំងស្ថានភាពច្រកផ្លូវតូចចង្អៀត ដោយសារបញ្ហាចរាចរណ៍ ដូច្នេះយើងត្រូវតែយកចិត្តទុកដាក់ដោយស្មារតីទទួលខុសត្រូវខ្ពស់»។
ប្រធានមន្ទីររ៉ែ និងថាមពលរាជធានីភ្នំពេញ លោក ងី ប៊ុនលី ពុំទាន់អាចសុំការអត្ថាធិប្បាយបានទេ ដោយប្រាប់ថាជាប់ប្រជុំ។
កាលពីថ្ងៃទី១៨ ខែកក្កដា មានករណីផ្ទុះធុងហ្គាសបង្កជាអគ្គិភ័យកើតឡើង នៅសង្កាត់បឹងរាំង ខណ្ឌដូនពេញ រាជធានីភ្នំពេញ បានបណ្តាលឱ្យមនុស្ស៤នាក់បានស្លាប់និង៥នាក់ទៀតរងរបួសធ្ងន់ស្រាល។
កញ្ញា ម៉ី អាយុ២៨ឆ្នាំ ជាប្រជាពលរដ្ឋរស់នៅសង្កាត់បឹងរាំង ក្បែរផ្ទះលក់ហ្គាសដែលឆេះនោះ បានបង្ហាញការគាំទ្រចំពោះអាជ្ញាធរក្នុងការលុបបំបាត់ការលក់ហ្គាសអនាធិបតេយ្យនៅក្នុងទីប្រជុំជន ដើម្បីបញ្ចៀសហានិភ័យដល់ប្រជាពលរដ្ឋដែលនៅក្បែរនោះ។
កញ្ញាថា៖ «ខ្ញុំថា អាជីវកម្មលក់ហ្គាសហ្នឹងគួរតែលក់នៅជាយក្រុងល្អជាង កុំឱ្យមានលក់នៅជាប់ៗផ្ទះប្រជាពលរដ្ឋក្នុងទីប្រជុំជនអី ដើម្បីការពារសុវត្ថិភាព ហើយក៏ឱ្យអ្នកលក់ហ្នឹងក៏ត្រូវប្រុងប្រយ័ត្ននិងមានឧបករណ៍ការពារដែរពេលមានបញ្ហាដែរ»៕