ប្រទេសកូរ៉េខាងជើងសម្រេចដាក់ទីក្រុងមួយជាកន្លែងដំណើរការវិស័យឧស្សាហកម្មមមាញឹកនៅក្បែរព្រំដែនជាប់ជាមួយកូរ៉េខាងត្បូង ឱ្យស្ថិតក្នុងស្ថានភាពអាសន្នដោយសារមេរោគកូវីដ១៩ ហើយមនុស្សជាង៣៦០០នាក់ត្រូវដាក់ឱ្យនៅដាច់ដោយឡែក។
នៅថ្ងៃទី២៦ ខែកក្កដា ប្រទេសកូរ៉េខាងជើងបានប្រកាសពីភាពអាសន្នក្នុងប្រទេសរបស់ខ្លួននិងការបិទច្រកព្រំដែននៅទីក្រុងហ្កេសុង បន្ទាប់ពីមានបុគ្គលម្នាក់ដែលបានចំណាកស្រុកទៅកាន់ប្រទេសកូរ៉េខាងត្បូងកាលពី៣ឆ្នាំមុន បានត្រឡប់ចូលប្រទេសវិញ ហើយរកឃើញថា មានផ្ទុកមេរោគកូវីដ១៩។ នេះបើតាមការចុះផ្សាយរបស់ទីភ្នាក់ងារសារព័ត៌មានរ៉យទ័រ។
តាមទីភ្នាក់ងារព័ត៌មានរដ្ឋកូរ៉េខាងជើង KCNA គឺលោក គីម ជុងអ៊ុន អះអាងថា មេរោគកាចសាហាវនេះចាប់ផ្តើមមានឆ្លងនៅក្នុងប្រទេសហើយ។ ទោះយ៉ាងណា ក្រោយពេលប្រកាសលើកដំបូងកាលពីចុងខែកក្កដាមក កូរ៉េខាងជើងមិនបានបង្ហាញព័ត៌មានវិវត្តន៍ផ្សេងៗជុំវិញការឆ្លងមេរោគកូវីដ១៩នេះទេ។
អ្នកតំណាងអង្គការសុខភាពពិភពលោកប្រចាំប្រទេសកូរ៉េខាងជើង លោកវេជ្ជបណ្ឌិត Edwin Salvador ថ្លែងប្រាប់ទីភ្នាក់ងារសារព័ត៌មានរ៉យទ័រថា ការអះអាងរបស់កូរ៉េខាងជើងនេះមិនទាន់មានភាពច្បាស់លាស់នៅឡើយ ព្រោះការធ្វើតេស្តរកមេរោគមិនទាន់បង្ហាញលទ្ធផលផ្លូវការ។
លោកវេជ្ជបណ្ឌិតរូបនេះបញ្ជាក់ថា ចំពោះអ្នកដែលសង្ស័យថាមានទំនាក់ទំនងផ្ទាល់ជាមួយបុរសផ្ទុកកូវីដ១៩ ចំនួន៦៥នាក់ និងមនុស្ស៣៥៧១នាក់ទៀតសង្ស័យមានទំនាក់ទំនងដោយប្រយោលនោះ អាជ្ញាធរដាក់ឱ្យនៅដាច់ដោយឡែកនៅក្នុងការិយាល័យរបស់រដ្ឋាភិបាលក្នុងទីក្រុងនោះរយៈពេល៤០ថ្ងៃ។
លោកថា ទីក្រុងហ្កេសុង ស្ថិតនៅក្រោមការបិទឃុំឃាំង ហើយគ្រូពេទ្យប្រចាំទីក្រុងបានបន្តតាមដានស្ថានភាពមេរោគកូវីដ១៩។
រដ្ឋាភិបាលកូរ៉េខាងជើងក៏បានអំពាវនាវឱ្យប្រជាពលរដ្ឋទូទាំងប្រទេសមានការប្រុងប្រយ័ត្នខ្ពស់ ការពារកុំឱ្យឆ្លងមេរោគកូវីដ១៩ ហើយថា បើមានការធ្វេសប្រហែលនឹងមានផលវិបាកធ្ងន់ធ្ងរ។
ប្រកាសកាលពីថ្ងៃព្រហស្បតិ៍សប្តាហ៍មុន មេដឹកនាំកូរ៉េខាងជើង លោក គីម ជុងអ៊ុន បានប្រកាសជួយផ្គត់ផ្គង់ស្បៀងអាហារនិងថវិកាបន្ថែម ដើម្បីធ្វើយ៉ាងណាទប់ស្កាត់ការឆ្លងរាលដាលមេរោគកូវីដ១៩នេះ។
ហ្កេសុង ជាទីក្រុងដំណើរការវិស័យឧស្សាហកម្មមមាញឹកមួយនៅក្បែរព្រំដែនជាមួយកូរ៉េខាងត្បូង មានប្រជាជនរស់នៅប្រមាណជាង៣៥០ ០០០នាក់៕
