លោកនាយករដ្ឋមន្ត្រី ហ៊ុន សែន បានអំពាវនាវដល់ប្រជាពលរដ្ឋយកចិត្តទុកដាក់ថែរក្សាសុខភាពនិងការពារខ្លួនពីបាតុភូតធម្មជាតិខ្យល់កន្ត្រាក់នៅក្នុងរដូវភ្លៀងនេះ។
លោកនាយករដ្ឋមន្ត្រី ហ៊ុន សែន បានលើកឡើងនៅក្នុងទំព័រហ្វេសប៊ុករបស់លោកនៅថ្ងៃទី០៦ ខែសីហានេះថា រយៈពេលចុងក្រោយនេះ ស្ថានភាពអាកាសធាតុមានភ្លៀងនិងខ្យល់កន្ត្រាក់ច្រើនបានកើតមានឡើង ដែលធ្វើឱ្យផ្ទះសម្បែងរបស់ប្រជាពលរដ្ឋជាច្រើនខ្នងរងការខូចខាត។
លោកបន្តថា៖ «ដូច្នេះបងប្អូនត្រូវមានការប្រុងប្រយ័ត្នខ្ពស់ជានិច្ច ជាពិសេសក្នុងការធ្វើដំណើរឆ្ងាយ។ ចំពោះបងប្អូនប្រជាពលរដ្ឋដែលរស់នៅតាមដងទន្លេ តាមមាត់សមុទ្រ និងប្រជាពលរដ្ឋដែលប្រកបរបរចុះទូកនេសាទ សូមមានការប្រុងប្រយ័ត្នខ្ពស់ ត្រូវតាមដានឱ្យបានជាប់នូវការផ្សព្វផ្សាយព្យាករណ៍អាកាសធាតុរបស់ក្រសួងធនធានទឹក និងឧតុនិយម»។
សេចក្តីជូនដំណឹងរបស់ក្រសួងធនធានទឹក និងឧតុនិយម កាលពីថ្ងៃទី០៤ ខែសីហា បានឱ្យដឹងថា ចាប់ពីថ្ងៃទី៥ដល់ថ្ងៃទី១១ ខែសីហា កម្ពុជាទទួលរងនូវឥទ្ធិពលជ្រលងសម្ពាធទាបនិងខ្យល់មូសុងនិរតីខ្សោយ។ ក្រសួងបន្តថា ស្ថានភាពនេះនឹងធ្វើឱ្យបណ្តាខេត្តនៅតំបន់វាលទំនាបកណ្តាលនិងតំបន់ជួរភ្នំដងរែកនិងខ្ពង់រាបឦសាន អាចមានភ្លៀងធ្លាក់ក្នុងកម្រិតបរិមាណពីតិចទៅច្រើន ខណៈបណ្តាខេត្តនៅតំបន់មាត់សមុទ្រនឹងមានភ្លៀងធ្លាក់ខ្លាំងកើនឡើង។
ក្រសួងបានបញ្ជាក់ថា៖ «សូមបន្តប្រុងប្រយ័ត្នចំពោះបាតុភូតផ្គរ រន្ទះ ខ្យល់កន្ត្រាក់ និងរលកសមុទ្រដែលនៅបន្តកើតមាន»។
កាលពីដើមសប្តាហ៍នេះ មានករណីលិចទូកដឹកភ្ញៀវទេសចរចំនួន៤គ្រឿង ក្នុងនោះទូក៣គ្រឿង ដែលចតចោល (មិនមានមនុស្ស) នៅសង្កាត់កោះរ៉ុងសន្លឹម ក្រុងកោះរ៉ុង និងទូកឈើមួយគ្រឿងទៀតដឹកភ្ញៀវទេសចរ ដោយសារបញ្ហាអាកាសធាតុ ប៉ុន្តែពុំមានមនុស្សរងគ្រោះថ្នាក់ទេ។
ស្របពេលគ្នានេះដែរ លោកនាយករដ្ឋមន្ត្រី ហ៊ុន សែន ក៏បានអំពាវនាវជាថ្មីដល់ប្រជាពលរដ្ឋការពារខ្លួនកុំឱ្យឆ្លងជំងឺកូវីដ-១៩ ដោយការលាងសម្អាតដៃជាមួយសាប៊ូ ជែលសម្លាប់មេរោគ ឬទឹកអាល់កុល ជាពិសេសអនុវត្តតាមការណែនាំរបស់ក្រសួងសុខាភិបាល។ លោកបានគូសបញ្ជាក់ថា បើទោះជាប្រទេសកម្ពុជាពុំមានអ្នកស្លាប់ដោយសារជំងឺនេះក៏ដោយ ប៉ុន្តែជំងឺរលាកផ្លូវដង្ហើមនេះឆ្លងរាតត្បាតលឿននិងពុំទាន់មានថ្នាំព្យាបាលនៅឡើយ៕
