ប្រជាពលរដ្ឋមួយចំនួនរស់នៅក្នុងរាជធានីភ្នំពេញ បានត្អូញត្អែរអំពីការខូចខាតលំនៅឋាន និងទ្រព្យសម្បត្តិរបស់ពួកគេ បណ្ដាលមកពីជំនន់ទឹកភ្លៀង ដែលបានជន់លិចទីក្រុងមួយនេះកាលពីថ្ងៃម្សិលមិញនេះ។
អ្នកស្រី សុផា អាយុ ៤០ឆ្នាំ មានលំនៅឋានទទឹងប្រហែល ៤គុណនឹងបណ្ដោយប្រហែល ៥ម៉ែត្រ នៅទល់មុខប្រឡាយទឹកស្អុយស្ថិតនៅក្នុងសង្កាត់បឹងទំពុន ក្នុងខណ្ឌមានជ័យ ផ្នែកខាងត្បូងរាជធានីភ្នំពេញ។ ពលរដ្ឋរូបនេះ បានប្រាប់វីអូឌីនៅព្រឹកថ្ងៃនេះថា អ្នកស្រីមករស់នៅសង្កាត់បឹងទំពុនប្រមាណជាង១០ឆ្នាំមកហើយ ក៏ប៉ុន្តែ អ្នកស្រីមិនដែលជួបប្រទះជំនន់ទឹកភ្លៀងខ្លាំងម្តងណាមួយឡើយ ទើបតែពីម្សិលមិញនេះតែប៉ុណ្ណោះ។
អ្នកស្រីបន្តថា កាលពីម្សិលមិញទឹកលិចចូលផ្ទះអ្នកស្រីប្រហែលម៉ោង ៥ល្ងាច ខណៈផ្ទះដែលទាបលិចមុន មុននឹងដល់ផ្ទះរបស់គាត់។
អ្នកស្រី សុផា និយាយថា៖ «យ៉ាប់ណាស់អូនអើយ! វាសើមឥវ៉ាន់នៅក្នុង យើងទៅធ្វើការបាត់មាននៅផ្ទះណា។ ដល់ពេលមកវិញ សើមឥវ៉ាន់អស់អាលីញ។ យើងគិតស្អែកហាល! មានថ្ងៃណាហាលទៀត បើភ្លៀងជាប់គ្នាចឹង មានតែទុកឱ្យស្អុយខូចអស់ហ្នឹង»។
ភ្លៀងមួយមេធំ បានធ្លាក់ជោគជាំនៅរាជធានីភ្នំពេញកាលពីថ្ងៃម្សិលមិញនេះ ដែលបណ្តាលឱ្យផ្លូវនានាក្នុងទីក្រុងស្ថិតនៅក្រោមទឹកភ្លៀង ហើយផ្ទះប្រជាពលរដ្ឋមួយចំនួន ត្រូវទឹកហូរកាត់ ឬជន់លិចផងដែរ។
ជាអ្នកលក់ប្រហិតនៅក្នុងសង្កាត់បឹងទំពុនផងដែរ អ្នកស្រី ញឹក ព្រឿង អាយុ ៦០ឆ្នាំ បានប្រាប់ថា មុខរបរលក់ប្រហិតរបស់គាត់ត្រូវអាក់ខាន បន្ទាប់ពីផ្លូវធ្វើដំណើរមុខផ្ទះគាត់ត្រូវលិចលង់នៅក្រោមជំនន់ទឹកភ្លៀង។
អ្នកប្រកបអាជីវកម្មផលិតសាច់ផាត់នៅភូមិព្រែកទាល់ លោក វេង សុខហៀង បានឱ្យដឹងថា លោកមិនអាចប្រកបអាជីវកម្មរបស់លោកទៀតបានទេ ដោយសារតែទឹកលិចឧបករណ៍ផលិតរបស់គាត់ស្ទើរទាំងស្រុង។
លោក វេង សុខហៀង ប្រាប់ថា៖ «ផលវិបាក គឺទាំងមធ្យោបាយធ្វើដំណើរទាំងអីហ្នឹង យើងចង់ទៅណាក៏វាពិបាក ហើយរស់នៅវាអត់ស្អាតទៀតចឹងហាស»។
កំពុងសម្អាតផ្ទះក្រោយជំនន់ទឹកភ្លៀងជន់លិច ហើយដកថយបន្សល់នូវសំរាមនៅក្នុងផ្ទះនោះ អ្នកស្រី សុខជូ ដែលមានមុខរបរជាអាជីវករ បានប្រាប់ថា សម្ភារប្រើប្រាស់ដូចជា តុ ទូឈើ ទូរទឹកកកជាដើម បានខូចខាតដោយសារជំនន់ទឹកភ្លៀងជន់លិច។
អ្នកស្រី សុខជូ និយាយថា៖ «ណាមួយពីមុនយើងមិនដែលជួបប្រទះមកពីយើងមិនទាន់ចាក់លុបបឹង លុបបួរ លុបក្រលុក គឺឥលូវទូទៅហើយអូនមើលកន្លែងណាត្រូវលុបត្រូវតែផ្ទះល្វែង!អភិវឌ្ឍន៍ត្រូវតែលុបចឹងអាក្បាលៗទឹកនឹង ចឹងវាហូរកាត់ច្រាលមកទាំងអស់»។
លោកស្រីអះអាងថា ប្រមាណជាជិត ២ឆ្នាំមកហើយដែលមិនមានវត្តមានខាងអាជ្ញាធរដឹកនាំ ចុះសម្អាតប្រឡាយក៏ដូចជាយកស្មៅចេញដែលអាចជារនាំងបាំងទឹកមិនឱ្យហូរបាន។
ប្រធានកម្មវិធីអភិវឌ្ឍន៍សមាគមធាងត្នោត លោក ឯម ខេមរា បានឱ្យដឹងថា កត្តាដែលបណ្ដាលឱ្យលិច គឺដោយសារការលុបបឹង ជាពិសេសការលុបបឹងធំៗក្នុងនោះមានបឹងទំពុន និងបឹងតាមោក។
លោកបន្តថា ការលុបផ្ទៃទឹកក្នុងបឹងទាំងអស់ គឺជាផ្នែកមួយរាំងខ្ទប់ទឹកមិនហូរ ចាក់ពីទីក្រុងភ្នំពេញមកកាន់ផ្ទៃទឹកក្នុងបឹងទាំងមូល។
វីអូឌីមិនទាន់អាចធ្វើការទាក់ទងទៅកាន់ អ្នកនាំពាក្យសាលារាជធានីភ្នំពេញ លោក ម៉េត មាសភក្ដី ដើម្បីធ្វើការបកស្រាយជុំវិញបញ្ហាលិចទឹកក្នុងក្រុងបាននៅឡើយទេ នៅរសៀលថ្ងៃទី៧ ខែសីហានេះ។
ក្រសួងធនធានទឹក និងឧតុនិយម បាននិយាយក្នុងសេចក្ដីប្រកាសពីកាលចុងខែកក្កដាថា ភ្លៀងនឹងបន្តធ្លាក់លើផ្ទៃប្រទេសកម្ពុជាក្នុងកម្រិតពីតិចទៅច្រើនចាប់ពីដើមសប្ដាហ៍នេះរហូតដល់ដើមសប្ដាហ៍ក្រោយ៕
