រាជរដ្ឋាភិបាលបានសម្រេចឱ្យបើកដំណើរការរោងកុននិងរោងសម្តែងសិល្បៈឡើងវិញ ប៉ុន្តែត្រូវអនុវត្តតាមលក្ខខណ្ឌសុវត្ថិភាពនៃគោលការណ៍ស្តង់ដារប្រតិបត្តិការការពារការចម្លងវីរុសកូវីដ-១៩។
យោងតាមសេចក្តីជូនព័ត៌មានរបស់ក្រសួងវប្បធម៌ និងវិចិត្រសិល្បៈ នៅថ្ងៃព្រហស្បតិ៍នេះ បានលើកឡើងថា ការអនុញ្ញាតឱ្យបើកដំណើរការឡើងវិញ គឺដើម្បីជួយសម្រាលការលំបាកផ្នែកសេដ្ឋកិច្ចនិងជាការលើកទឹកចិត្តដល់កិច្ចខិតខំប្រឹងប្រែងរបស់សិល្បករ-សិល្បការិនី ផលិតករ អាជីវករ ម្ចាស់រោងភាពយន្ត និងរោងសម្តែងសិល្បៈ ក្នុងបុព្វហេតុអភិរក្សនិងលើកស្ទួយវិស័យសិល្បៈវប្បធម៌ជាតិ។
ក្រសួងបានបន្តថា៖ «សិល្បករ-សិល្បការិនី ព្រមទាំងផលិតករ អាជីវកម្ម ម្ចាស់រោងភាពយន្ត និងរោងសម្តែងសិល្បៈ ដែលមានបំណងបើកដំណើរការរោងភាពយន្តនិងរោងសម្តែងសិល្បៈឡើងវិញ ត្រូវមកដាក់ពាក្យស្នើសុំនៅនាយកដ្ឋានសិល្បៈភាពយន្តនិងផ្សព្វផ្សាយ នៃក្រសួងវប្បធម៌ និងវិចិត្រសិល្បៈ នៅរៀងរាល់ម៉ោងធ្វើការ ចាប់ពីថ្ងៃជូនដំណឹងនេះតទៅ»។
តែយ៉ាងណា ក្រសួងបានតម្រូវឱ្យរោងភាពយន្តនិងរោងសម្តែងសិល្បៈទាំងអស់ ត្រូវអនុវត្តលក្ខខណ្ឌមួយចំនួន ដោយត្រូវដាក់ពាក្យស្នើសុំនិងចុះអនុស្សរណៈយោគយល់ជាមួយក្រសួង ដើម្បីធានាថា ការអនុវត្តនូវគោលការណ៍ស្តង់ដារប្រតិបត្តិឱ្យបានត្រឹមត្រូវនិងត្រូវរៀបចំខ្លួនរួចរាល់ក្នុងការអនុវត្តតាមលក្ខខណ្ឌសុវត្ថិភាព ដូចមានចែងក្នុងគោលការណ៍ស្តង់ដារប្រតិបត្តិការការពារការចម្លងវីរុសកូវីដ១៩។
ក្រសួងបានបន្ថែមថា ចំពោះការបើកដំណើរការរោងភាពយន្តនិងរោងសម្តែងសិល្បៈឡើងវិញ ត្រូវឈរលើគោលការណ៍ស្ម័គ្រចិត្តដោយការទទួលខុសត្រូវខ្ពស់និងចូលរួមសហការពេញលេញជាមួយក្រុមការងារចម្រុះរបស់ក្រសួងវប្បធម៌និងក្រសួងសុខាភិបាល។
ប្រធានផ្នែកទីផ្សាររបស់រោងភាពយន្ដ Major Cineplex កញ្ញា គុយ កែវមរកត បានប្រាប់វីអូឌីឱ្យដឹងថា រោងភាពយន្តបានបើកដំណើរការឡើងវិញចាប់ពីម៉ោង១១ព្រឹកនេះទៅ ដោយគោរពតាមការណែនាំរបស់ក្រសួងពាក់ព័ន្ធពីវិធានសុខាភិបាល ក្រោយពីក្រសួងវប្បធម៌បានទទួលពាក្យស្នើសុំពីម្ចាស់អាជីវកម្មរួចមក។
កញ្ញាបន្តថា៖ «រោងភាពយន្ដ Major Cineplex by Smart យើងគោរពតាមគោលការណ៍ស្ដង់ដាររបស់ក្រសួងវប្បធម៌ និងវិចិត្រសិល្បៈ ក៏ដូចជាក្រសួងសុខាភិបាល ដែលណែនាំឱ្យយើងជាមួយប្រតិបត្តិការមួយចំនួនដូចជា ការឆែកវាស់កម្ដៅគ្រប់អតិថិជនដែលដើរចូលមកទីតាំងរបស់រោងភាពយន្ដ ក៏តម្រូវឱ្យប្រជាជនទាំងអស់ពាក់ម៉ាស់»។
លោក ហឿង មិនាង អាយុ២០ឆ្នាំ ជាអតិថិជនម្នាក់របស់រោងភាពយន្ដ Major Cineplex បានគាំទ្រចំពោះការបើកឡើងវិញនូវរោងភាពយន្តនិងរោងសម្តែងសិល្បៈនេះ ដើម្បីជួយសម្រួលដល់សេដ្ឋកិច្ចរបស់ផលិករនិងរោងផលិតកម្មនានា ខណៈដែលលោកសង្កេតឃើញរោងភាពយន្តនេះមានរៀបចំនូវវិធានសុខាភិបាលដើម្បីការពារការឆ្លងវីរុសកូវីដ១៩នេះដែរ។
លោកថា៖ «ព្រោះដោយសារវាមានសុវត្ថិភាព ពេលចូលមកគេមានស្កេនកម្តៅ ហើយនិងលាងសម្អាតដៃ ហើយមើលទៅវាមានផាសុកភាពជាងមុន»។
កាលពីថ្ងៃទី១៧ ខែមីនា ឆ្នាំ២០២០ ក្រសួងសុខាភិបាល បានសម្រេចឱ្យផ្អាកដំណើរការរោងភាពយន្តនិងរោងសម្តែងសិល្បៈនៅទូទាំងប្រទេស ដើម្បីទប់ស្កាត់ការរីករាលដាលនៃជំងឺកូវីដ-១៩៕
