ប្រធានគណបក្សខ្មែរឈ្នះ លោក សួង សុភ័ណ្ឌ និយាយថា គម្រោងតវ៉ា៤ថ្ងៃនៅទីលានប្រជាធិបតេយ្យចាប់ពីថ្ងៃចុងសប្ដាហ៍នៃពាក់កណ្ដាលខែនេះ នឹងអាចជំរុញទៅរដ្ឋាភិបាលឱ្យពិចារណាដោះលែងសកម្មជនព្រំដែន លោក រ៉ុង ឈុន។
សមាជិកក្រុមប្រឹក្សាឃ្លាំមើលកម្ពុជា លោក រ៉ុង ឈុន ត្រូវបានសាលាដំបូងរាជធានីភ្នំពេញសម្រេចចោទប្រកាន់ពីបទ«ញុះញង់ឱ្យប្រព្រឹត្តបទល្មើសជាអាទិ៍» និងបញ្ជាឱ្យដាក់ឃុំនៅពន្ធនាគារបណ្ដោះអាសន្នកាលពីថ្ងៃទី១ ខែសីហា។
ការចោទប្រកាន់ប្រធានសហភាពសហជីពកម្ពុជា (CCU) រូបនេះ ត្រូវបានធ្វើឡើងមួយថ្ងៃក្រោយពីលោកត្រូវបានសមត្ថកិច្ចចាប់ខ្លួនទាំងយប់នៅគេហដ្ឋានរបស់គាត់ បន្ទាប់ពីគាត់ចេញរបាយការណ៍មួយដែលលើកឡើងថា បង្គោលឡាក់ព្រំដែនលេខ១១៤និងលេខ១១៩នៃព្រំដែនកម្ពុជា-វៀតណាមនៅក្នុងខេត្តត្បូងឃ្មុំ ត្រូវបានបោះចូលមកទឹកដីកម្ពុជាក្នុងចម្ងាយប្រហែល៥០០ម៉ែត្រ។
លោក សួង សុភ័ណ្ឌ ប្រាប់VODនៅថ្ងៃនេះថា ការចោទប្រកាន់សមាជិកក្រុមប្រឹក្សាឃ្លាំមើលកម្ពុជា លោក រ៉ុង ឈុន ជារឿងអយុត្តិធម៌។
មេបក្សរូបនេះនិយាយទៀតថា ជម្រើសចុងក្រោយដើម្បីជំរុញឱ្យមានយុត្តិធម៌និងដោះលែងលោក រ៉ុង ឈុន គឺការធ្វើយុទ្ធនាការអហិង្សាតាមរយៈការធ្វើបាតុកម្មនៅទីលានប្រជាធិបតេយ្យ ដែលមានមនុស្សរាប់ពាន់នាក់ចូលរួម ដើម្បីផ្ញើសាររួមគ្នាទៅក្រសួងពាក់ព័ន្ធរបស់រដ្ឋាភិបាលឱ្យទម្លាក់ចោលបទចោទលើលោក រ៉ុង ឈុន។
លោក សួង សុភ័ណ្ឌ ប្រាប់ថា៖ «ខ្ញុំយល់ថា មិនត្រឹមតែដោះលែងទេ រដ្ឋាភិបាលដែលដឹកនាំដោយគណបក្សប្រជាជន ត្រូវតែផ្តល់មេដាយមាសជូនលោក រ៉ុង ឈុន ទៀត ចំពោះស្នាដៃលោក រ៉ុង ឈុន ដែលហ៊ានតទល់ប្រឆាំង និយាយការពិតទាក់ទងទៅនឹងព្រំដែនរវាងកម្ពុជានិងសាធារណរដ្ឋសង្គមនិយមវៀតណាម»។
គណបក្សខ្មែរឈ្នះ តាមលិខិតចុះថ្ងៃទី៥ ខែសីហា បានជូនដំណឹងទៅសាលារាជធានីភ្នំពេញថា គម្រោងប្រមូលផ្តុំគ្នាធ្វើបាតុកម្មនេះ នឹងត្រូវរៀបចំធ្វើឡើងនៅទីលានប្រជាធិបតេយ្យ ស្ថិតក្នុងខណ្ឌឫស្សីកែវ រាជធានីភ្នំពេញ។
លិខិតបញ្ជាក់ថា បាតុកម្មនោះមានអ្នកចូលរួមច្រើនពាន់នាក់មកពីស្ថាប័នគ្រូបង្រៀន កម្មករក្នុងវិស័យកាត់ដេរ និងអ្នកគាំទ្រមួយចំនួនទៀត ដោយប្រើពេល៤ថ្ងៃគឺថ្ងៃទី១៦, ២០, ២៣ និងថ្ងៃ៣០ ខែសីហា។
លោក រ៉ុង ឈុន បានកាន់តំណែងជាប្រធានសមាគមគ្រូបង្រៀនកម្ពុជាឯករាជ្យអស់រយៈពេលជាង១៥ឆ្នាំ មុននឹងត្រូវបានតែងតាំងជាសមាជិកគណៈកម្មាធិការជាតិរៀបចំការបោះឆ្នោត (គ.ជ.ប.) កូតាគណបក្សសង្គ្រោះជាតិនៅឆ្នាំ២០១៤។ ក្រោយបក្សប្រឆាំងនេះត្រូវបានរំលាយនៅចុងឆ្នាំ២០១៧ លោក រ៉ុង ឈុន បានលាឈប់ពី គ.ជ.ប. ហើយត្រូវបានតែងតាំងជាទីប្រឹក្សាជាន់ខ្ពស់នៃសមាគមវិញ។
ប្រធានសមាគមគ្រូបង្រៀនកម្ពុជាឯករាជ្យ អ្នកស្រី អ៊ុក ឆាយាវី ប្រាប់ថា មកដល់ថ្ងៃនេះ អ្នកស្រីមិនទាន់បានដឹងពីគម្រោងធ្វើបាតុកម្មនេះទេ ប៉ុន្តែអ្នកស្រីថា បើបាតុកម្មនេះមានបំណងពិតទាមទារឱ្យដោះលែងលោក រ៉ុង ឈុន សមាគមនឹងចូលរួម។
អ្នកស្រី អ៊ុក ឆាយាវី ប្រាប់ថា៖ «បើសិនជាការតវ៉ាហ្នឹងដើម្បីតែដោះលែងលោក រ៉ុង ឈុន អាហ្នឹងយើងចូលរួម ប៉ុន្តែក្នុងរូបភាពអីទៀត[នយោបាយ] យើងអត់អាចប្រកាន់ជំហរចូលរួមទេ»។
លោក រ៉ុង ឈុន ក៏ជាប្រធានសហភាពសហជីពកម្ពុជា (CCU) ផងដែរ ក្រោយពីចាកចេញពីតំណែងជាសមាជិក គ.ជ.ប.។
ប្រធានសហភាពការងារកម្ពុជា លោក អាត់ ធន់ បានប្រាប់ថា ក្រុមសហជីពរបស់លោកមិនមានផែនការចូលរួមក្នុងបាតុកម្មដែលគ្រោងរៀបចំឡើងដោយបក្សនយោបាយនោះឡើយ ដោយលោកអះអាងពីឯករាជ្យភាពរបស់សហជីពលោក ប៉ុន្តែលោកថា ក្រុមសហជីពលោកក៏បានចូលរួមតាមរយៈសេចក្ដីថ្លែងការណ៍នានាទាមទារឱ្យដោះលែងនិងទម្លាក់ចោលការចោទប្រកាន់លើលោក រ៉ុង ឈុន ផងដែរ។
លោក អាត់ ធន់ ប្រាប់ថា៖ «ខ្ញុំអត់មានព័ត៌មានឬទំនាក់ទំនងអីជាមួយពួកគាត់ទេ តែបើសមាជិកយើងណាមួយចង់ចូលរួម យើងមិនហាមគេទេ។ ប៉ុន្តែសហជីពខ្ញុំអត់បានរៀបចំចូលរួមធ្វើបាតុកម្មហ្នឹងទេ»។
VOD មិនទាន់អាចសុំការបញ្ជាក់ពីអ្នកនាំពាក្យសាលារាជធានីភ្នំពេញ លោក ម៉េត មាសភក្តី បានទេ ដោយទូរសព្ទរបស់លោកគ្មានអ្នកទទួល។
ប៉ុន្តែលោក សួង សុភ័ណ្ឌ អះអាងថា គម្រោងជួបដើម្បីពិភាក្សាជុំវិញលិខិតជូនដំណឹងធ្វើបាតុកម្មនេះ ត្រូវបានសាលារាជធានីភ្នំពេញប្រកាសលើកពេល។
នៅថ្ងៃនេះដែរ គណបក្សខ្មែរឈ្នះបានធ្វើយុទ្ធនាការដាក់ញត្តិទៅស្ថានទូតសហរដ្ឋអាមេរិកនិងបារាំង ជំរុញឱ្យប្រទេសមហាអំណាចទាំងនោះជួយជំរុញឱ្យមានការដោះលែងលោក រ៉ុង ឈុន។
អ្នកនាំពាក្យក្រសួងយុត្តិធម៌ លោក ជិន ម៉ាលីន និយាយថា ការតវ៉ា ការបញ្ចេញមតិ គ្មានឥទ្ធិពលដល់ការសម្រេចរបស់តុលាការ ដែលលោកហៅ «ស្ថាប័នឯករាជ្យ»នោះទេ។
អ្នកនំាពាក្យរូបនេះបន្តថា មធ្យោបាយតែមួយគត់ដើម្បីរកយុត្តិធម៌ឱ្យលោក រ៉ុង ឈុន គឺចូលរួមក្នុងនីតិវីធីតុលាការតាមរយៈការបង្ហាញភស្តុតាង បង្ហាញសក្ខីកម្មដោះបន្ទុក ដើម្បីបញ្ជាក់ថា ជនជាប់ចោទនោះគ្មានពិរុទ្ធភាព។
លោក ជិន ម៉ាលីន ប្រាប់ថា៖ «នេះជាមធ្យោបាយតែមួយគត់តាមផ្លូវច្បាប់នៅក្នុងសង្គមប្រជាធិបតេយ្យនីតិរដ្ឋ»។
យ៉ាងនេះក្តី អង្គការសង្គមស៊ីវិលចំនួន១៤២ស្ថាប័ន កាលពីថ្ងៃទី៣ ខែសីហា បានចេញសេចក្តីថ្លែងការណ៍រួមចាត់ទុកការចាប់ខ្លួននិងចោទប្រកាន់លោក រ៉ុង ឈុន ថាជាការរំលោភសិទ្ធិបញ្ចេញមតិដែលធានាដោយរដ្ឋធម្មនុញ្ញ និងទាមទារឱ្យដោះលែង។
អង្គការឃ្លាំមើលសិទ្ធិមនុស្សអន្តរជាតិ (Human Rights Watch) កាលពីថ្ងៃអង្គារនេះ បាននិយាយក្នុងសេចក្តីថ្លែងការណ៍ ដោយទាមទារទៅរដ្ឋាភិបាលឱ្យទម្លាក់ចោលបទចោទប្រកាន់លើលោក រ៉ុង ឈុន អង្គការឃ្លាំមើលសិទ្ធិមនុស្សអន្តរជាតិមួយនេះហៅការចោទប្រកាន់លោក រ៉ុង ឈុន ថាជាបទចោទបែបប្រឌិត៕