អ្នកស្រី សុខ ចំរើន កំពុងតែអាំងត្រីនៅផ្ទះរបស់អ្នកស្រី កាលពីព្រឹកថ្ងៃទី១១ ខែកុម្ភៈ ឆ្នាំ២០២០ ក៏មានបុរសប្លែកមុខម្នាក់បានមកសួរអ្នកស្រីថា តើលោក ភុត ថុនា ដែលជាស្វាមីរបស់គាត់នៅផ្ទះដែរឬទេ។
អ្នកស្រីបាននិយាយថា មួយម៉ោងក្រោយមក មន្រ្តីខេត្តនិងមន្រ្តីនគរបាលចំនួនប្រមាណ១០នាក់បានចូលផ្ទះរបស់អ្នកស្រីយ៉ាងប្រញាប់ប្រញាល់ ហើយបានចាប់ខ្លួនប្តីរបស់អ្នកស្រីក្នុងរយៈពេលតែប៉ុន្មានវិនាទីប៉ុណ្ណោះ។ អាជ្ញាធរមិនបានផ្តល់មូលហេតុលម្អិតនៃការចាប់ខ្លួន មុនពេលពួកគេយកប្តីរបស់អ្នកស្រីទៅឃុំឃាំងទេ។
ប៉ុន្តែអ្នកស្រី ចំរើន បាននិយាយថា អ្នកស្រីបានទាយដឹងពីមូលហេតុនៃការចាប់ខ្លួនប្តីអ្នកស្រីរួចហើយ។
អ្នកស្រី ចំរើន ដែលរស់នៅក្នុងសង្កាត់ស្លក្រាម ក្រុងសៀមរាប បាននិយាយថា៖ «នៅពេលពួកគេមករកប្តីខ្ញុំ ខ្ញុំដឹងថាគាត់មានបញ្ហាដោយសារតែការបង្ហោះលើហ្វេសប៊ុករបស់គាត់ទេ»។
លោក ថុនា មានអាយុ៣២ឆ្នាំ ជាអ្នករត់រ៉ឺម៉កកង់បី និងបានបង្ហាញការគាំទ្រចំពោះគណបក្សសង្គ្រោះជាតិដោយបានបង្ហោះសារនិងវីដេអូរបស់មន្រ្តីជាន់ខ្ពស់គណបក្សប្រឆាំងផងដែរ។ លោក ថុនា បានបង្ហោះលើហ្វេសប៊ុករបស់លោកនូវការព្រួយបារម្ភអំពីការខិតខំរបស់រដ្ឋាភិបាលកម្ពុជាក្នុងការតាមដាន និងធ្វើការវិភាគសម្រាប់កូវីដ១៩ដែលមកដល់ខែមីនាបានរីករាលដាលពីប្រទេសចិនទៅកាន់តំបន់អាស៊ីអាគ្នេយ៍។
លោក ថុនា បានបង្ហោះសារកាលពីថ្ងៃទី៥ ខែមិនា ដូច្នេះថា៖ «ពួកហ្អែងចាំមើលណា! បើឆ្លងប៉ះ ចំបងប្អូនអញ អញមិនឱ្យហ្អែងរួចខ្លួនទេ»។ ការបង្ហោះនេះកើតឡើងក្នុងពេលដែលប្រទេសកម្ពុជាទើបតែបានរកឃើញមានករណីកូវីដ១៩ជាលើកដំបូងចំពោះជនជាតិចិនដែលបានមកលេងនៅប្រទេសកម្ពុជា។
ក្រាហ្វិកបច្ចុប្បន្នភាពករណីឆ្លងនិងជាសះស្បើយពីកូវីដ១៩នៅកម្ពុជា
ពីរថ្ងៃក្រោយមក ក្រសួងសុខាភិបាលបានរាយការណ៍ពីករណីទី២ដែលកើតឡើងលើជនជាតិខ្មែរដំបូងគេ បន្ទាប់ពីបុរសនោះមានទំនាក់ទំនងជាមួយបុរសជនជាតិជប៉ុនម្នាក់ដែលមានលទ្ធផលវិជ្ជមានកូវីដ១៩។
បន្ទាប់មក លោក ថុនា បានបង្ហោះសារមួយទៀតនៅលើហ្វេសប៊ុក ដើម្បីចំអកសេចក្តីថ្លែងការណ៍របស់លោកនាយករដ្ឋមន្រ្តី ហ៊ុន សែន ក្នុងសុន្ទរកថាមួយកាលពីខែកុម្ភៈ ដែលថា នៅថ្ងៃទី៣១ ខែកុម្ភៈ ទើបកម្ពុជាមានឆ្លងជំងឺកូរ៉ូណា។
នៅថ្ងៃទី២១ ខែឧសភា គឺជាងពីរខែបន្ទាប់ពីការចាប់ខ្លួន លោក ថុនា ត្រូវបានកាត់ទោសពីបទផ្សព្វផ្សាយព័ត៌មានមិនពិត ដោយត្រូវបានផ្តន្ទាទោសឱ្យជាប់ពន្ធនាគាររយៈពេលមួយឆ្នាំ។
អ្នកស្រី ចំរើន បានពិភាក្សាគ្នាជាមួយស្វាមីពីការបង្ហោះរបស់គាត់ដែរ ប៉ុន្តែលោក ថុនា បានប្រាប់អ្នកស្រី ចំរើន ថាអ្នកប្រើហ្វេសប៊ុកផ្សេងទៀតក៏បង្ហោះស្រដៀងគាត់ដែរ ដូច្នេះកុំព្រួយបារម្ភអ្វី។
អ្នកស្រីបានលើកឡើងដូច្នេះថា៖ «ខ្ញុំបានប្រាប់គាត់ថា ពេលដែលបងធ្វើអ្វីមួយ សុំបងគិតពីប្រពន្ធនិងកូនៗផង»។
យោងតាមអង្គការឃ្លាំមើលសិទិ្ធមនុស្ស (Human Rights Watch) បានឱ្យដឹងថា លោក ថុនា គឺស្ថិតនៅក្នុងចំណោមនុស្សយ៉ាងហោចណាស់៣០នាក់ ដែលត្រូវបានចាប់ខ្លួន ចោទប្រកាន់ ឬផ្តន្ទាទោសពីបទផ្សាយព័ត៌មានក្លែងក្លាយអំពីជំងឺរាតត្បាតកូវីដ១៩។
អង្គការមួយនេះបានចងក្រងជាឯកសារថា ពលរដ្ឋចំនួន១៣នាក់ដែលភាគច្រើនជាប់ពាក់ព័ន្ធនឹងគណបក្សប្រឆាំង ត្រូវបានបញ្ជូនទៅឃុំខ្លួនបណ្តោះអាសន្នក្រោមការចោទប្រកាន់ពីបទ«ញុះញង់» និង «រៀបចំផែនការក្បត់»។
អង្គការសិទ្ធិមនុស្សមួយនេះក៏បានរាយការណ៍ថា មនុស្ស៣នាក់ប្រឈមនឹងការចោទប្រកាន់ស្រ ដៀងគ្នានេះ ប៉ុន្តែត្រូវបានធានាឱ្យនៅក្រៅឃុំ។ ពលរដ្ឋចំនួន១៤នាក់ផ្សេងទៀត រួមទាំងសិស្ស សាលារៀនម្នាក់មិនទាន់គ្រប់អាយុផង ត្រូវបានបង្ខំឱ្យធ្វើការសុំទោសជាសាធារណៈនិងចុះហត្ថលេខាលើកិច្ចព្រមព្រៀងជាមួយអាជ្ញាធរហាមផ្សព្វផ្សាយព័ត៌មានក្លែងក្លាយ មុនពេលដែលប៉ូលិសធ្វើការដោះលែងពីការឃុំឃាំង។
នគរបាលមានភាពស្រពេចស្រពិលអំពីភស្តុតាងដែលត្រូវបានប្រើដើម្បីជំនួយដល់ការចាប់ខ្លួនទាំងនេះ ដោយមន្រ្តីនគរបាលពីរនាក់បានប្រាប់VODថា អ្នកដែល«បង្កភាពវឹកវរ»ត្រូវបានយកទៅដាក់ពន្ធនាគារហើយ។
មិនមែនជារឿងកំប្លែងទេ
ភាគច្រើននៃការចោទប្រកាន់ពាក់ព័ន្ធនឹងព័ត៌មានក្លែងក្លាយពីកូវីដ១៩ ត្រូវបានបង្ហោះលើហ្វេសប៊ុក ហើយក្នុងករណីខ្លះទៀត ការចាប់ខ្លួនត្រូវបានផ្អែកទៅលើការសន្ទនាតាមទូរសព្ទឬសារជជែកគ្នាឯកជននៅក្នុងក្រុម។ យោងទៅតាមអង្គការសិទ្ធិមនុស្សនេះនិងក្រុមសិទិ្ធមនុស្សផ្សេងទៀត បានឱ្យដឹងថា រដ្ឋាភិបាលនិងនគរបាលមិនបានពន្យល់ពីវិធីដែលថាពួកគេទទួលបានព័ត៌មានប្រាស្រ័យទាក់ទងឯកជនទាំងនេះដោយរបៀបណានោះទេ ឬពន្យល់ថាតើពួកគេវិភាគព័ត៌មានទាំងនោះជាព័ត៌មានក្លែងក្លាយរបៀបណានោះដែរ។
បើយោងតាមហ្វេសប៊ុកផ្លូវការរបស់ស្នងការដ្ឋាននគរបាលខេត្តកំពត បានឱ្យដឹងថា សិស្សសាលាមិនទាន់គ្រប់អាយុដែលរស់នៅក្នុងខេត្តកំពត បានផ្ញើសារជាសំឡេងទៅក្នុងក្រុមបណ្តាញសង្គមហ្វេសប៊ុកឯកជនកាលពីខែមីនា ដោយអះអាងថា មិត្តរួមថ្នាក់ពីរបីនាក់បានស្លាប់ហើយអ្នកផ្សេងទៀតមានជំងឺកូវីដ១៩។ ហ្វេសប៊ុកនោះក៏បានបង្ហាញវីដេអូដែលក្មេងស្រីនោះបានធ្វើការសុំទោសជាសាធារណៈផងដែរ។
នគរបាលបានសាកសួរក្មេងស្រីអាយុ១៤ឆ្នាំរូបនេះនិងបានឱ្យនាងសុំទោសជាសាធារណៈចំពោះមុខមិត្តភក្តិរបស់នាង ដែលវីដេអូសុំទោសនោះត្រូវបានបង្ហោះនៅលើទំព័រហ្វេសប៊ុកនគរបាលខេត្តនិងស្រុកផងដែរ។
សិស្សស្រីរូបនេះ បាននិយាយថា៖ «ខ្ញុំសូមផ្តែផ្តាំទៅប្រជាជនទាំងអស់ដែលលេងនៅលើហ្វេស ប៊ុកថា គឺនៅក្នុងសាលា ហួរ ឈៀវ នេះ មិនមានវីរុសកូរ៉ូណាកើតឡើងទេ។ ដូច្នេះ ខ្ញុំសុំទោស ព័ត៌មានដែលខ្ញុំបាននិយាយកាលពីម្សិលមិញមិនពិតទេ»។
វីដេអូនិងរូបថតត្រូវបានផ្សព្វផ្សាយជាលើកដំបូងតាមអ៊ិនធឺណិតកាលពីពាក់កណ្តាលខែមីនាបង្ហាញពីអត្តសញ្ញាណរបស់ក្មេងស្រីមិនទាន់គ្រប់អាយុ ហើយក្រោយមកមុខរបស់នាងត្រូវបានបិទបាំងដោយផ្នែកខ្លះដោយរូបសញ្ញាផ្កាយ។
នៅរាជធានីភ្នំពេញវិញ លោក កុយ សំអាត បានបង្ហោះវីដេអូមួយកាលពីថ្ងៃទី៦ ខែមីនា ប្រតិកម្ម ទាក់ទងនឹងព័ត៌មានដែលមានប្រភពពីប្រទេសវៀតណាម អំពីអ្នកដំណើរជនជាតិជប៉ុនដែលបានចាកចេញពីខេត្តសៀមរាប ដោយធ្វើតេស្តវិជ្ជមានវីរុសកូវីដ១៩ពេលមកដល់ណាហ្គូយ៉ាប្រទេសជប៉ុន ដែលអ្នកដំណើររូបនេះមកពីកម្ពុជាបានឆ្លងកាត់ប្រទេសវៀតណាម។
គាត់បានបង្ហោះនៅលើហ្វេសប៊ុករបស់លោកយ៉ាងដូច្នេះថា៖ «យើងទាំងអស់គួរតែអរគុណយួនទៅ កុំតែបានយួនស្រែកថាប្រទេសកម្ពុជាមានកូវីដ១៩ឬវីរុសកូរ៉ូណាទេ កុំអីប្រជាជនទូទាំង[ប្រទេស]អត់ដឹងថា ប្រទេសកម្ពុជាមានកូវីដ១៩ឬវីរុសកូរ៉ូណានោះទេ»។
គាត់បាននិយាយក្នុងវីដេអូថា៖ «សំណាងហើយដែលយួនស្រែកថាកម្ពុជាមានកូវីដ១៩។ ប្រសិនបើមនុស្សធម្មតាស្រែក ពួកគេអាចនឹងត្រូវបានគេចាប់ខ្លួន»។ បីថ្ងៃក្រោយពីការបង្ហោះនោះ លោក សំអាត ត្រូវបានចាប់ខ្លួននិងឃុំខ្លួនក្រោមបទ«ញុះញង់បង្កឱ្យមានបទឧក្រិដ្ឋ»។
លោក ទេព ផល្លា ដែលមានឈ្មោះក្នុងហ្វេសប៊ុកថា «Saty Fila» បានបង្ហោះអត្ថបទចំនួន២ ដែលក្នុងនោះ មួយនិយាយពីការសន្លប់របស់ក្មេងស្រីម្នាក់នៅវិទ្យាល័យមួយ ហើយករណីមួយទៀតទាក់ទងនឹងការស្លាប់ក្រោមហេតុផលគាំងបេះដូង ហើយលោកថា រដ្ឋាភិបាលត្រូវចាត់វិធានការជាបន្ទាន់ចំពោះវីរុសកូរ៉ូណានេះនៅកម្ពុជា ហើយថា អាជ្ញាធរកំពុងបិទបាំងករណីទាំងនេះ។
លោកបានបន្ថែមថា៖ «កូរ៉ូណានៅខ្មែរ គេប្រែថាខ្យល់គរ។ មិនមែនលេងសើចទេ បងប្អូនប្រយ័ត្ន»។
មនុស្ស៥នាក់ត្រូវបានចាប់ខ្លួន ហើយត្រូវបានដោះលែងបន្ទាប់ពីបានធ្វើការសុំទោសជាសាធារណៈ ពួកគេស្ទាក់ស្ទើរក្នុងការនិយាយជាមួយអ្នកសារព័ត៌មានវីអូឌី ដោយមានការភ័យខ្លាចអាជ្ញាធរមូលដ្ឋានចាប់ខ្លួនឡើងវិញ។
ព័ត៌មានក្លែងក្លាយជាអាវុធនយោបាយ
ក្រុមសកម្មជនសិទ្ធិមនុស្ស បាននិយាយថា ការវាយប្រហារការបញ្ចេញមតិដោយសេរីនិងភាពរង្គោះរង្គើនៃប្រព័ន្ធផ្សព្វផ្សាយនៅក្នុងប្រទេសកម្ពុជា បានបង្កើតបរិយាកាសនៃការភ័យខ្លាចដោយប្រជាជនកម្ពុជាជាច្រើនបានជ្រើសរើសការមិនបង្ហាញទស្សនៈរបស់ពួកគេ។
ប្រទេសកម្ពុជាមិនមានច្បាប់ដែលមានស្រាប់ក្នុងការដោះស្រាយដោយផ្ទាល់ជាមួយព័ត៌មានក្លែងក្លាយនោះទេ ប៉ុន្តែលោក ហ៊ុន សែន នៅឆ្នាំ២០១៩ បានចាត់មន្រ្តីឱ្យចាប់ផ្តើមដំណើរការព្រាងច្បាប់នេះ។ រហូតមកដល់ពេលនេះ បទប្បញ្ញត្តិនៃក្រមព្រហ្មទណ្ឌដែលមានស្រាប់ ត្រូវបានប្រើដើម្បីចោទប្រកាន់ប្រជាជនដែលបានផ្សព្វផ្សាយព័ត៌មានក្លែងក្លាយ ទោះបីជាក្រមព្រហ្មទណ្ឌនោះមិនមាននិយមន័យច្បាប់សម្រាប់ធ្វើការចោទប្រកាន់ក៏ដោយ។
លោក Phil Robertson នាយករងប្រចាំតំបន់អាស៊ីរបស់អង្គការឃ្លាំមើលសិទិ្ធមនុស្ស Human Rights Watch បានមានប្រសាសន៍ថា ការចោទប្រកាន់ទាំងនេះគឺមានគោលបំណងបំបិទសំឡេងរិះគន់រដ្ឋាភិបាល ជាពិសេសក្នុងពេលមានជំងឺរាតត្បាតដែលបានបង្កភាពតានតឹងផ្នែកសេដ្ឋកិច្ចយ៉ាងខ្លាំងក្នុងចំណោមប្រជាជនកម្ពុជា។
លោក Phil Robertson បានលើកឡើងថា៖ «ដូចរឿងជាច្រើនផ្សេងៗទៀតដែរ ការចោទប្រកាន់ក្រោមបទព័ត៌មានក្លែងក្លាយ ត្រូវបានប្រើជាអាវុធនយោបាយរបស់លោក ហ៊ុន សែន និងគណបក្សប្រជាជនកម្ពុជា ប្រឆាំងនឹងក្រុមអ្នករិះគន់ដែលពួកគេគិតថាជាអ្នកបង្កឱ្យមានបញ្ហាច្រើនពេក ហើយត្រូវតែបញ្ឈប់»។
លោកបានបន្ថែមទៀតថា និន្នាការនេះមិនមានតែមួយគត់ចំពោះប្រទេសកម្ពុជាទេ ដោយមានការចាប់ខ្លួនស្រដៀងគ្នានេះដែរនៅក្នុងប្រទេសហ្វីលីពីន ថៃ និងម៉ាឡេស៊ី ដើម្បីបង្ក្រាបការប្រឆាំងអំពីការបាត់បង់ការងារ ការបាត់បង់ប្រាក់ចំណូល និងអសន្តិសុខសេដ្ឋកិច្ច។
លោកបានសរសេរតាមអ៊ីម៉ែលថា៖ «មូលហេតុគឺរដ្ឋាភិបាលទាំងនេះមានការព្រួយបារម្ភថាបន្ទាត់នៃការរិះគន់ឬសម្តែងការមិនពេញចិត្តជាមួយរដ្ឋាភិបាល អាចឈានដល់ចំណុចផ្ទុះដែលមិនអាចគ្រប់គ្រងបាន ដោយទាញយកផលប្រយោជន៍ពីកំហឹងរបស់ប្រជាជនដែលបានបាត់បង់ការងារធ្វើការ បិទក្រុមហ៊ុននានា និងការបាត់បង់ប្រាក់ចំណូល និងសន្តិសុខសេដ្ឋកិច្ច»។
ទោះយ៉ាងណា លោក ហួត សុធី ស្នងការរងនគរបាលខេត្តសៀមរាបដែលជាប់ពាក់ព័ន្ធនឹងការចាប់ខ្លួនលោក ថុនា បាននិយាយថា ការបង្ហោះតាមហ្វេសប៊ុករបស់អ្នករត់ម៉ូតូកង់បី មិនមែនជាការបញ្ចេញមតិដោយសេរីនោះទេ ប៉ុន្តែផ្ទុយទៅវិញ មានគោលបំណងបង្កបញ្ហាដល់សន្តិសុខសាធារណៈ។ ការបង្ហោះតាមហ្វេសប៊ុករបស់ ថុនា ទទួលបានការចូលចិត្តប្រហែល១៥០និង៣០ចែករំលែកលើហ្វេសប៊ុក។
លោក ហួត សុធី មានប្រសាសន៍ថា៖ «ព័ត៌មានក្លែងក្លាយបង្កភាពវឹកវរនិងធ្វើឱ្យប៉ះពាល់ដល់សណ្តាប់ធ្នាប់សាធារណៈនៅក្នុងសង្គមនិងបង្កឱ្យការភ័យខ្លាច»។
មន្រ្តីនគរបាលខេត្តសៀមរាប បាននិយាយថា ក្រុមនគរបាលដែលតាមដានគណនីហ្វេសប៊ុកដើម្បីប្រឆាំងនឹងព័ត៌មានក្លែងក្លាយ នៅពេលសួរថា ហេតុអ្វីបានជាមនុស្សមួយចំនួនត្រូវបានគេដោះលែងដោយមានការព្រមាន ខណៈដែលអ្នកផ្សេងទៀតប្រឈមនឹងការចោទប្រកាន់ដែលត្រូវជាប់ពន្ធនាគាររយៈពេល២ឆ្នាំ លោក សុធី បាននិយាយថា តុលាការបានកំណត់ថា តើការប្រាស្រ័យទាក់ទងមួយណាដែលបង្កើតជាបទឧក្រិដ្ឋ។
លោកបានបន្ថែមថា៖ «ខ្ញុំមិនដឹងទេ! នេះជាតុលាការគេអ្នកចាត់ចែង ពីព្រោះថា ប្រសិនបើតុលាការគេបានឃើញថាមានបទល្មើស រហូតបានធ្វើការចោទប្រកាន់និងឃុំខ្លួន។ ប្រសិនបើគ្មានបទល្មើសទេ គេមិនចោទនោះទេ»។
អ្នកនាំពាក្យនគរបាលជាតិ លោក ឆាយ គឹមខឿន បានបន្ថែមថា តម្រូវការសម្រាប់ការឃ្លាំមើលប្រព័ន្ធផ្សព្វផ្សាយសង្គម ធ្វើឡើងដើម្បីដោះស្រាយអ្នកដែលមានចេតនាអាក្រក់និងកេងបន្លំ។
មន្រ្តីនគរបាលជាន់ខ្ពស់រូបនេះបានអំពាវនាវឱ្យពលរដ្ឋធ្វើការត្រួតពិនិត្យខ្លួនឯងមុនបង្ហោះអ្វីមួយ ប្រសិនបើពួកគេបារម្ភខ្លាចថានគរបាលតាមដានសកម្មភាពតាមអ៊ិនធឺណិតរបស់ពួកគេ។
ក្រុមអ្នកតស៊ូមតិផ្នែកសិទិ្ធមនុស្សបាននិយាយថា ការចាប់ខ្លួនទាក់ទងនឹងការបញ្ចេញមតិជាសាធារណៈនៅក្នុងប្រទេសកម្ពុជា អាចជះឥទ្ធិពលដល់សាធារណជនដែលបណ្តាលឱ្យមនុស្សភ័យខ្លាចក្នុងការបញ្ចេញមតិដោយសេរី។
លោក ឆាយ គឹមខឿន លើកឡើងថា៖ «បើគាត់ខ្លាចគេតាមដាន តើគាត់បង្ហោះធ្វើអី? មិនមែនតាមដានមើលទេ គាត់បង្ហោះជាសាធារណៈ អ្នកណាក៏គេមើលឃើញដែរ មិនមែនគេព្យាយាមតាមដានមើលទេ។ តែគេត្រូវតែពិចារណា តើអ្នកឯងមានចេតនាដែរទេ? លោកឯងបង្ករឿង ជេរប្រមាថគេ ប្រមាថរដ្ឋាភិបាល អ្នកនិយាយរឿងបំផ្លើស មិនពិត ធ្វើឱ្យចលាចលក្នុងសង្គម គេត្រូវតាមដានមើលហើយ។ គេមិនមែនបិទសិទ្ធទេ តែលោកឯងនិយាយហួសសិទ្ធខ្លួនឯងដែលមាន។ បើថាគេបិទសិទ្ធ គាត់ឈប់បង្ហោះទៅ»។
ការកំណត់មុខសញ្ញានៃអ្នកដែលបង្ហាញការមិនពេញចិត្តចំពោះរាជរដ្ឋាភិបាល ត្រូវបានបង្ហាញកាន់តែច្បាស់នៅថ្ងៃទី១៤ ខែកក្កដា នៅពេលដែលលោកនាយករដ្ឋមន្រ្តី ហ៊ុន សែន គំរាមពលរដ្ឋម្នាក់នៅខេត្តបន្ទាយមានជ័យ ដែលលោកបានហៅឈ្មោះថា«សុធី»។
យោងតាមលោកនាយករដ្ឋមន្រ្តី សុធី បាននិយាយថា ជំនួយពីបរទេសកំពុងត្រូវបានប្រើដើម្បីធ្វើការផ្ទេរសាច់ប្រាក់ទៅឱ្យប្រជាជនក្រីក្រដែលកំពុងប្រឈមនឹងការបាត់បង់ប្រាក់ចំណូលដោយសារតែជំងឺកូវីដ១៩។
លោក ហ៊ុន សែន បាននិយាយថា៖ «ខ្ញុំប្រាប់ទៅលោក សុធី ឯង! សំណាងហើយដែលខ្ញុំមិនបញ្ជាឱ្យចាប់។ ថ្ងៃនោះ ខ្ញុំបញ្ជាឱ្យចាប់ ពេលនេះលោក សុធី ឯងនៅក្នុងគុក»។
វីអូឌីមិនអាចទាក់ទងសុំការអត្ថាធិប្បាយពីលោក សុធី បានទេ ប៉ុន្តែបើតាមលោកនាយករដ្ឋមន្រ្តីហ៊ុន សែន អះអាងថា បុរសនោះបានរត់ទៅប្រទេសថៃហើយ។
ការចាប់ខ្លួនដែលមិននឹកស្មានដល់
កាលពីចុងខែមីនា អ្នកស្រី អ៊ុក ចន្ធី បានទទួលទូរសព្ទពីស្វាមីរបស់គាត់គឺលោក យឹម សារ៉េត ជាកម្មករសំណង់នៅសង្កាត់ជើងឯក ខណ្ឌដង្កោ។ គាត់បានប្រាប់អ្នកស្រីថា គាត់ត្រូវបានគេចាប់ខ្លួននៅកន្លែងធ្វើការរបស់គាត់។ នោះជាអ្វីដែលលោក សារ៉េត បាននិយាយ មុនពេលការហៅទូរសព្ទត្រូវបានផ្តាច់។
រហូតមកដល់ល្ងាចនោះ គាត់បានទូរសព្ទមកម្តងទៀតដើម្បីប្រាប់អ្នកស្រី អ៊ុក ចន្ធី ជាភរិយាថាគាត់ត្រូវបានបញ្ជូនទៅឃុំខ្លួនបណ្តោះអាសន្នពីបទ «ញុះញង់ឱ្យប្រព្រឹត្តបទឧក្រិដ្ឋ» ដែលទាក់ទងទៅនឹងការបង្ហោះហ្វេសប៊ុកដែលគាត់បានបង្ហោះប៉ុន្មានថ្ងៃមុន។ មុនការរំលាយគណបក្សសង្គ្រោះជាតិក្នុងឆ្នាំ២០១៧ លោក សារ៉េត ជាជំទប់ទី១ នៃឃុំចន្ទ្រា ខេត្តស្វាយរៀង។ គាត់ក៏ត្រូវបានចោទប្រកាន់ពីបទរៀបចំផែនការក្បត់ ហើយឥលូវនេះប្រឈមមុខនឹងការជាប់ពន្ធនាគាររយៈពេល១២ឆ្នាំ លើបទចោទប្រកាន់ទាំងពីរ។
អ្នកស្រី អ៊ុក ចន្ធី បាននិយាយដោយក្រៀមក្រំថា៖ «ខ្ញុំមិនគិតថា រឿងនេះវាដល់ថ្នាក់ហ្នឹងទេ។ វាហួសហេតុ»។
អ្នកស្រី អ៊ុក ចន្ធី បានជួបស្វាមីនៅពន្ធនាគារព្រៃស រាជធានីភ្នំពេញ ពីរបីថ្ងៃបន្ទាប់ពីគាត់ត្រូវបានឃុំខ្លួន។ លោក យឹម សារ៉េត បានបង្ហោះរូបថតរបស់គាត់នៅថ្ងៃទី២០ ខែមីនា ដោយមានភ្ជាប់ជាមួយសារថា៖
«ខ្ញុំពាក់ម៉ាស់ ពីព្រោះខ្ញុំមិនចង់ស្រូបយកធូលីនិងស៊ីម៉ងត៍ ជាពិសេសកូរ៉ូណា»។
អ្នកស្រី ចន្ធី ថាមន្រ្តីនគរបាលបានបង្ហាញលោក សារ៉េត នូវការបង្ហោះនេះនៅពេលពួកគេចុះចាប់ខ្លួនគាត់នៅការដ្ឋានសំណង់មួយសប្តាហ៍ក្រោយមក។
ស្រ្តីជាកម្មកររោងចក្ររូបនេះបានអះអាងបន្តថា ប្តីរបស់ខ្លួនតែងតែប្រាប់កូនៗទាំងបីឱ្យពាក់ម៉ាស់ជាប្រចាំ ដើម្បីការពារខ្លួនពីវីរុសកូរ៉ូណា ហើយអ្នកស្រីមិនដែលគិតទាល់តែសោះថា ការប្រាប់បែបនេះអាចត្រូវបានគេចោទថាជាការ«ញុះញង់ឱ្យប្រព្រឹត្តបទឧក្រិដ្ឋ»។
អ្នកស្រី អ៊ុក ចន្ធី៖ «គ្មានសេរីភាពទេនៅក្នុងស្រុករបស់យើង។ នៅពេលយើងនិយាយ ប៉ុន្តែពួកគេចង់បំបិទសិទ្ធយើង»៕
អត្ថបទដោយ៖ Mech Dara and Ananth Baliga
