អាជ្ញាធរជាតិអប្សរា បាននិងកំពុងកែលម្អ និងធ្វើកំណាយជួសជុលប្រាសាទបាយក្អែក ដែលមានទីតាំងស្ថិតនៅខាងលិចប្រាសាទអង្គរវត្ត ខេត្តសៀមរាប ឲ្យក្លាយជាសារមន្ទីរលម្ហ ដើម្បីអភរិក្ស និងទាក់ទាញទេសចរណ៍។
អាជ្ញាធរជាតិអប្សរា បានលើកឡើងក្នុងទំព័រហ្វេសប៊ុកផ្លូវការរបស់ខ្លួន កាលពីថ្ងៃម្សិលមិញថា បច្ចុប្បន្ន ប្រាសាទបាយក្អែក មានស្ថានភាពបាក់បែកទ្រុឌទ្រោមនៅសល់តែគ្រឹះ និងពុំសូវមានអ្នកស្គាល់នោះទេ។
អាជ្ញាធរជាតិអប្សរា បានបន្តថា បើតាមរចនាសម្ព័ន្ធប្រាសាទ រួមនិងសម្ភារ ស្លាកស្នាមនៅសល់ ជើងទម្រ ព្រះសីសៈព្រះពោធិសត្វប្រាជ្ញបារមីតារចនាបថបាយ័ន និងសសរពេជ្រនោះ ត្រូវបានអ្នកជំនាញសន្និដ្ឋានថា ប្រាសាទនេះ សាងសង់ឡើងនៅចុងសត្សវត្សទី១២ តាមរចនាបថបាយ័ន។
អាជ្ញាធរជាតិអប្សរា បានបញ្ជាក់ថា៖ «នៅជុំវិញប្រាសាទជាទីសក្ការៈនេះ សម្បូរទៅដោយទួលជាច្រើនដែលមនុស្សរស់នៅ ហើយប្រហែលជាអាចមានមនុស្សរស់នៅ មុនមានប្រាសាទក៏ថាបាន»។
លោក ហង់ ពៅ អគ្គនាយកអាជ្ញាធរជាតិអប្សរា ត្រូវបានស្ថាប័នមួយនេះស្រង់ប្រសាសន៍ថា អាជ្ញាធរជាតិអប្សរា បានសម្រេចជាមួយអ្នកជំនាញពាក់ព័ន្ធ រួមគ្នាលើកតម្លៃប្រាសាទបាយក្អែក ឱ្យក្លាយជាសារមន្ទីរលម្ហ ដើម្បីទាក់ទាញទេសចរ និងអភិរក្សសំណង់ប្រាសាទឱ្យផុតពីហានីភ័យនានា។
លោកបន្តថា ក្រុមការងារនឹងដាំដើមឈើ ដាំស្មៅ ស្តារស្រះ តាំងបង្ហាញប្រវត្តិប្រាសាទ និងលទ្ធផលបានពីការកំណាយ ដើម្បីរៀបចំទីតាំងនេះសម្រាប់ទាក់ទាញភ្ញៀវទេសចរមកទស្សនា សម្រាកកាយ និងរៀបចំពិធីផ្សេងៗផង៕