ក្រសួងអប់រំ យុវជន និងកីឡា នឹងរៀបចំការប្រឡងសញ្ញាបត្រមធ្យមសិក្សាទុតិយភូមិឆ្នាំសិក្សា២០១៩-២០២០ ទាំងគ្រឹះស្ថានអប់រំរដ្ឋនិងឯកជន នៅខែធ្នូខាងមុខ។
យោងតាមសេចក្តីប្រកាសព័ត៌មានរបស់ក្រសួងអប់រំនៅថ្ងៃចន្ទនេះ បានលើកឡើងថា ដោយមានការអនុញ្ញាតពីលោកនាយករដ្ឋមន្ត្រី ហ៊ុន សែន ក្រសួងបានសម្រេចឱ្យសិស្សថ្នាក់ទី៩និងទី១២ នៃគ្រឹះស្ថានសិក្សាសាធារណៈ ចូលរៀនដំណាក់កាលទី២នៃការបើកដំណើរការគ្រឹះស្ថានសិក្សា នៅអំឡុងខែកញ្ញា ឆ្នាំ២០២០នេះ ក្នុងទ្រង់ទ្រាយតូច១៥នាក់ក្នុងមួយថ្នាក់ ដោយគោរពតាមវិធានអនាម័យនៃក្រសួងសុខាភិបាលនិងអង្គការសុខភាពពិភពលោក ដើម្បីត្រៀមចូលរួមការប្រឡង។
ដោយឡែក ចំពោះការរៀបចំការសិក្សានៅតាមគ្រឹះស្ថានសិក្សាសាធារណៈសម្រាស់សិស្សថ្នាក់ដទៃទៀត ក្រសួងនឹងរៀបចំសេចក្តីណែនាំតាមក្រោយ។ ជាមួយគ្នានេះដែរ ក្រសួងនឹងរៀបចំការប្រឡងសញ្ញាបត្រមធ្យមសិក្សាទុតិយភូមិថ្នាក់ជាតិឆ្នាំសិក្សា២០១៩-២០២០ នៅខែធ្នូ ឆ្នាំ២០២០ខាងមុខ។
លោក រស់ សុវាចា អ្នកនាំពាក្យក្រសួងអប់រំ បានមានប្រសាសន៍ថា ចំពោះការប្រឡងសញ្ញាបត្រមធ្យមសិក្សាទុតិយភូមិ សម្រាប់គ្រឹះស្ថានសិក្សាឯកជន (សាលាឯកជន) ដែលគ្រោងធ្វើឡើងនៅថ្ងៃទី២៧និងទី២៨ ខែសីហាខាងមុខនេះ ត្រូវបានគ្រឹះស្ថានសិក្សាឯកជន សម្រេចលុបចោលវិញ ដើម្បីចូលរួមជាមួយការប្រឡងថ្នាក់ជាតិនៅខែធ្នូជាមួយគ្រឹះស្ថានសិក្សាសាធារណៈដែរ។
លោកថា៖ «ចំពោះមុខនេះ សូមសិស្សានុសិស្សទាំងអស់ [ទាំងសាលារដ្ឋនិងឯកជន] បន្តរៀនសូត្រតាមអនឡាញនិងស្វ័យសិក្សា ដើម្បីបន្តការរៀនសូត្រនិងត្រៀមប្រឡង ទន្ទឹមនឹងការចូលរួមគ្រប់គ្រង ទប់ស្កាត់ និងបង្ការការរីករាលដាលនៃជំងឺកូវីដ១៩»។