លោកនាយករដ្ឋមន្ត្រី ហ៊ុន សែន បានអំពាវនាវដល់មេដឹកនាំពិភពលោក រួមគ្នាប្រយុទ្ធនឹងជំងឺកូវីដ១៩ ដោយចៀសវាងការរើសអើងជាតិសាសន៍និងការប្រកាន់ជំហរស្តីបន្ទោសដែលនាំដល់ការបែកបាក់សាមគ្គីភាព ខណៈពិភពលោកទាំងមូលកំពុងខិតខំប្រយុទ្ធប្រឆាំងនឹងជំងឺរាតត្បាតនេះ។
ការអំពាវនាវនេះបានធ្វើឡើងក្នុងអំឡុងពេលដែលលោកនាយករដ្ឋមន្ត្រីបានចូលរួមថ្លែងសារគន្លឹះក្នុងមហាសន្និបាតនៃក្តីសង្ឃឹម របស់សហព័ន្ធសន្តិភាពសកល តាមប្រព័ន្ធវីដេអូ (Video conference) ក្រោមប្រធានបទ «ការកសាងនិងបង្កើតជាតិយើងនៅក្នុងពិភពលោកក្រោយវិបត្តិកូវីដ១៩៖ ការពឹងពាក់អាស្រ័យគ្នាទៅវិញទៅមក វិបុលភាពទៅវិញទៅមក និងគុណភាពតម្លៃសកល» ដែលប្រារព្ធធ្វើឡើងនៅសាធារណរដ្ឋកូរ៉េខាងត្បូង កាលពីថ្ងៃម្សិលមិញ។
នៅក្នុងសុន្ទរកថាគន្លឹះរបស់លោកនាយករដ្ឋមន្ត្រី ហ៊ុន សែន ដែលផ្សព្វផ្សាយលើទំព័រហ្វេសប៊ុករបស់លោក បានលើកឡើងថា នាពេលកន្លងមក ការប្រយុទ្ធនឹងជំងឺកូវីដ១៩ ប្រទេសទាំងអស់ភាគច្រើនគឺផ្តោតទៅលើការអនុវត្តនៅផ្ទៃក្នុងប្រទេសរៀងៗខ្លួន។ ករណីនេះ លោកយល់ថា ការប្រយុទ្ធនឹងជំងឺនេះ ក៏ដូចជាការស្តារឡើងវិញនូវសង្គម-សេដ្ឋកិច្ចក្រោយពីវិបត្តិនៃជំងឺនេះ គឺមិនអាចដោះស្រាយត្រឹមកម្រិតប្រទេសនីមួយៗបានឡើយ។
លោកនាយករដ្ឋមន្ត្រី បានគូសបញ្ជាក់ថា៖ «កិច្ចការនេះទាមទារនូវការពង្រឹងកិច្ចសហប្រតិបត្តិការជាអន្តរជាតិលើគ្រប់វិស័យឱ្យកាន់តែស៊ីជម្រៅនិងទូលំទូលាយ បានន័យថា សកលលោកទាំងមូលត្រូវតែពួតដៃគ្នាប្រែក្លាយការប្រយុទ្ធនឹងជំងឺកូវីដ១៩ទៅជាសមរភូមិរួម»។
ជាមួយគ្នានេះដែរ លោកថា កម្ពុជាក៏បានអំពាវនាវដល់មេដឹកនាំពិភពលោក ឱ្យចាត់ទុកវ៉ាក់សាំងបង្ការជំងឺកូវីដ១៩ជាទំនិញរួមសម្រាប់សកលលោក (global common goods) ដែលប្រជាជនគ្រប់រូបនៅគ្រប់ទិសទីអាចទទួលបាន និងត្រូវចៀសវាងការរើសអើងពូជសាសន៍ និងការប្រកាន់ជំហរស្តីបន្ទោសដែលជាល្បែងទម្លាក់កំហុសដ៏អាក្រក់មួយនាំដល់ការបែកបាក់សាមគ្គីភាព ខណៈដែលពិភពលោកទាំងមូលកំពុងខិតខំរួបរួមគ្នាប្រយុទ្ធប្រឆាំងនឹងជំងឺរាតត្បាតនេះ។
ជាទិសដៅទៅមុខ លោកនាយករដ្ឋមន្ត្រី ហ៊ុន សែន ក៏បានជំរុញឱ្យមានការត្រៀមខ្លួនឱ្យបានល្អក្រោយអំឡុងពេលវិបត្តិកូវីដ១៩ ដោយគួររៀបចំផែនការស្តារឡើងវិញប្រកបដោយភាពជាក់លាក់មួយ ដោយដាក់ចេញនូវសេណារីយ៉ូមួយចំនួនសម្រាប់បើកឱ្យដំណើរការជាបណ្តើរៗនូវការធ្វើដំណើរឆ្លងកាត់ព្រំដែន និងប្រតិបត្តិការពាណិជ្ជកម្មរវាងប្រទេសក្នុងតំបន់ និងការស្តារឡើងវិញនូវវិស័យដែលរងផលប៉ះពាល់ធ្ងន់ធ្ងរពីវិបត្តិនេះផងដែរ៕