មនុស្សរាប់រយនាក់កាលពីថ្ងៃអាទិត្យបានចូលរួមបាតុកម្មប្រឆាំងរដ្ឋាភិបាលនៅទូទាំងប្រទេសថៃ ក្នុងការស្នើសុំឱ្យមានការបោះឆ្នោតថ្មីនិងកែប្រែរដ្ឋធម្មនុញ្ញ។
ទីភ្នាក់ងារសារព័ត៌មានរ៉យទ័របានឱ្យដឹងថា កាលពីថ្ងៃសោរ៍សប្តាហ៍មុនមានបាតុករប្រមាណជាង១០០០នាក់បានធ្វើបាតុកម្មនៅក្នុងទីក្រុងបាងកក បន្ទាប់ពីមានការចាប់ខ្លួនមេធាវីសិទ្ធិមនុស្ស លោក Anon Nampa និងសកម្មជននិសិ្សត លោក Panupong Jadnok បង្ខាំងទុករយៈពេលមួយយប់ ប៉ុន្តែត្រូវបានដោះលែងឱ្យនៅក្រៅឃុំវិញ បន្ទាប់ពីមានការតម្កល់ប្រាក់ធានា។
ការធ្វើបាតុកម្មប្រឆាំងនេះ បានកើតឡើងសារជាថ្មីម្តងទៀតនៅតាមដងផ្លូវមួយចំនួនក្នុងប្រទេសថៃ ដោយអំពាវនាវឱ្យមានការដកហូតរដ្ឋាភិបាលកាន់អំណាចនាពេលបច្ចុប្បន្នរបស់លោក Prayuth Chan-Ocha បន្ទាប់ពីមានភាពរកាំរកូសក្នុងអំឡុងពេលបោះឆ្នោតកាលពីឆ្នាំមុន។
តាមរយៈសារដែលបង្ហោះតាមបណ្តាញសង្គមហ្វេសប៊ុកដោយសហភាពនិស្សិតនៃប្រទេសថៃបានឱ្យដឹងថា មានសកម្មជននិស្សិតចំនួន៣នាក់ត្រូវបានបង្ខាំងទុកក្នុងប៉ុស្តិ៍ប៉ូលិស ដើម្បីបញ្ចៀសពួកគេពីការចូលរួមក្នុងការប្រមូលផ្តុំប្រឆាំងផ្សេងៗនៅខេត្ត Phitsanulok ភាគខាងជើង ក៏ប៉ុន្តែការចោទប្រកាន់នេះត្រូវបានរដ្ឋាភិបាលថៃច្រានចោល។
ប្រធានអនុអង្គភាពល្បាតលេខ៣១ លោក Wisarnpong Soikunbodi បានប្រាប់កាសែតរ៉យទ័រថា៖ «គ្មានអ្វីនៅទីនេះទេ តើអ្នកណាអាចគ្រប់គ្រងពួកគេបាន? តើយើងមានសិទ្ធិអំណាចអ្វីដើម្បីចាប់ពួកគាត់?»
បើយោងទៅតាមសារដែលបង្ហោះក្នុងបណ្តាញ Twitter របស់មេធាវីទទួលបន្ទុកសិទ្ធិមនុស្សរបស់ថៃ បានបង្ហាញថា មានប៉ូលិសប្រមាណជាង៥០នាក់ ត្រូវដាក់ឱ្យមានការឃ្លាំមើលការតវ៉ា នៅភាគខាងជើងនៃខេត្ត Chiang Mai ដែលត្រូវជាកន្លែងសម្រាប់សកម្មជននិស្សិត លោក Anon គ្រោងនឹងឡើងនិយាយនៅថ្ងៃអាទិត្យសប្តាហ៍មុន។
ប្រភពដដែលបានបង្ហាញថា ក្រុមនិស្សិតទាំងនោះ ពួកគេមានគម្រោងនឹងធ្វើការតវ៉ាប្រឆាំងបន្ថែមទៀតនៅក្នុងទីក្រុងបាងកក នាថ្ងៃចន្ទនេះ៕
