គណៈកម្មាធិការជាតិសុវត្ថិភាពចរាចរណ៍ផ្លូវគោក បានអំពាវនាវដល់ប្រជាពលរដ្ឋជាអ្នកប្រើប្រាស់ផ្លូវទាំងអស់ បន្តការប្រុងប្រយ័ត្នក្នុងពេលបើកបរនិងចូលរួមគោរពច្បាប់ចរាចរណ៍ ដើម្បីបង្ការនិងទប់ស្កាត់គ្រោះថ្នាក់ចរាចរណ៍ក្នុងអំឡុងឈប់សម្រាកសងថ្ងៃបុណ្យចូលឆ្នាំ។
សេចក្តីអំពាវនាវរបស់គណៈកម្មាធិការជាតិសុវត្ថិភាពចរាចរណ៍ផ្លូវគោកដែលបានផ្សព្វផ្សាយកាលពីថ្ងៃម្សិលមិញ បានលើកឡើងថា រាជរដ្ឋាភិបាលបានអនុញ្ញាតឱ្យឈប់សម្រាកសងថ្ងៃបុណ្យចូលឆ្នាំ ចាប់ពីថ្ងៃទី១៧ ដល់ថ្ងៃទី២១ ខែសីហា សប្តាហ៍ក្រោយនេះ។
ករណីនេះ គណៈកម្មាធិការអំពាវនាវដល់អ្នកប្រើប្រាស់ផ្លូវទាំងអស់ បន្តការយកចិត្តទុកដាក់ ការប្រុងប្រយ័ត្ន និងចូលរួមគោរពច្បាប់ចរាចរណ៍ផ្លូវគោករាល់ពេលធ្វើដំណើរតាមដងផ្លូវ។
គណៈកម្មាធិការ បានបញ្ជាក់ថា៖ «គ្រោះថ្នាក់ចរាចរណ៍ផ្លូវគោកនៅតែជាបញ្ហាប្រឈមចំពោះមុខនិងយូរអង្វែង ដែលអាចកើតមានឡើងភ្លាមៗក្នុងករណីអ្នកប្រើប្រាស់ផ្លូវធ្វេសប្រហែសឬខ្ជីខ្ជាមិនគោរពច្បាប់»។
ជាមួយគ្នានេះដែរ គណៈកម្មាធិការក៏បានសុំការយោគយល់ពីពលរដ្ឋដែលជាអ្នកប្រើប្រាស់ផ្លូវ ចំពោះការប្រកាន់យកវិធានការច្បាប់ដ៏តឹងរ៉ឹងចំពោះបទល្មើសចរាចរណ៍ផ្លូវគោកផងដែរ។
គណៈកម្មាធិការបញ្ជាក់ថា៖ «ដើម្បីចៀសវាងពីការប្រឈមចំពោះផ្លូវច្បាប់ សូមបងប្អូនគោរពអនុវត្តច្បាប់ស្តីពីចរាចរណ៍ផ្លូវគោកឱ្យបានខ្ជាប់ខ្ជួន ដើម្បីការពារអាយុជីវិតខ្លួនផ្ទាល់ ដើម្បីភាពសុខដុមរមនាក្នុងក្រុមគ្រួសារ ដើម្បីការពារទ្រព្យសម្បត្តិរបស់បងប្អូននិងដើម្បីរួមគ្នាលើកកម្ពស់កិត្តិយស សេចក្តីថ្លៃថ្នូររបស់ប្រទេសជាតិយើង»។
របាយការណ៍របស់គណៈកម្មាធិការជាតិសុវត្ថិភាពចរាចរណ៍ផ្លូវគោក កាលពីថ្ងៃទី៧ ខែកក្កដា បានឱ្យដឹងថា គ្រោះថ្នាក់ចរាចរណ៍ផ្លូវគោកក្នុងឆមាសទី១ឆ្នាំនេះ បានកើតឡើងចំនួន១.៦១៩លើក បណ្តាលឱ្យមនុស្សស្លាប់ចំនួន៨៦១នាក់ និងរបួសចំនួន២.៤៤៩នាក់។ មូលហេតុនៃគ្រោះថ្នាក់ភាគច្រើនបណ្តាលមកពីការបើកបរលើសល្បឿនកំណត់ មិនគោរពសិទ្ធិ មិនប្រកាន់ស្តាំ វ៉ាជែង បត់ ស្រវឹង កត្តាយានយន្ត និងងងុយ។
របាយការណ៍បានបន្តថា បើប្រៀបធៀបឆមាសទី១ ឆ្នាំ២០១៩ គ្រោះថ្នាក់ចរាចរណ៍បានថយចំនួន៥៥២លើក ស្មើ២៥% ស្លាប់ថយចំនួន១៧២នាក់ ស្មើ១៧% និងរបួសថយ៧៧៨នាក់ ស្មើ២៤%៕
