ព្រះមហាក្សត្រនិងរាជរដ្ឋាភិបាល បានចេញព្រះរាជក្រឹត្យនិងអនុក្រឹត្យ ត្រាស់និងបង្គាប់តែងតាំងតំណែងថ្មីដល់អតីតស្នងការនគរបាលខេត្តចំនួន៥រូប ក្នុងនោះមាន៤រូបជាទីប្រឹក្សាក្រសួងមហាផ្ទៃនិងមួយរូបជាអភិបាលរងខេត្តកោះកុង។
ព្រះរាជក្រឹត្យរបស់ព្រះមហាក្សត្រ ព្រះករុណា ព្រះបាទសម្តេច ព្រះបរមនាថ នរោត្តម សីហមុនី ចុះថ្ងៃទី១០ ខែកក្កដា បានត្រាស់បង្គាប់តែងតាំងអតីតស្នងការនគរបាលខេត្តត្បូងឃ្មុំ លោក បែន រ័ត្ន, អតីតស្នងការនគរបាលខេត្តបាត់ដំបង លោក អ៊ូច សុខុន, អតីតស្នងការនគរបាលខេត្តបន្ទាយមានជ័យ លោក អាត់ ខែម និងអតីតស្នងការនគរបាលខេត្តពោធិ៍សាត់ លោក សារុន ចាន់ធី ត្រូវបានតែងតាំងជាទីប្រឹក្សាក្រសួងមហាផ្ទៃ មានឋានៈស្មើអនុរដ្ឋលេខាធិការ។
ដោយឡែក អនុក្រឹត្យរបស់រាជរដ្ឋាភិបាលចុះថ្ងៃទី២៧ ខែកក្កដា និងត្រូវបានផ្សព្វផ្សាយកាលពីថ្ងៃម្សិលមិញ បានសម្រេចតែងតាំងអតីតស្នងការនគរបាលខេត្តកោះកុង លោក សំ ឃិតវៀន ត្រូវបានតែងតាំងឱ្យទៅកាន់តំណែងជាអភិបាលរងខេត្តកោះកុងវិញ។
អនុក្រឹត្យដដែលក៏បានសម្រេចតែងតាំងលោក ឃឹម ច័ន្ទឌី អភិបាលស្រុកគិរីសាគរ ខេត្តកោះកុង ទៅជាអភិបាលរងខេត្តកោះកុងផងដែរ៕